¹ Patswa, Djeso adatoma cupfunzisa ali pabala.Futi Alipenepo mbumba yawanhu idamuunganira mukundu, mwatche nadyari Iye adapinda mumwadiya alimwenemo adakala, mbumba yense ikali mukundu labala ² Iye akawapfunzisa zvinhu zvijinji namitsazaniso atchiwabvunza: ³ Ibvani! Cukana muzvari adabuda kwenda cazvara. ⁴ Pakazvaraiye, inango mbeu idagwira munjira, mbalame zidauya kubvazazdoba. ⁵ Zinango zidagwira pabuwe hapakana bi mataca majinji. Tchiripo-lipotcho zidamera nacutchimbiza, thangue mataca hakana cuzica. ⁶ Napenepo dzuwa lidabuda, iyo idatswa thangwe haikana mizi kubvayaoma. ⁷ Zinango mbeu zidagwira pacati paminga, inei idacula napenepo idaphaiwapaiwa. Nazvenezvo mbeu ineyo haina cubala misapho. ⁸ Mbeu zinango zidagwira pamataca yandimo zidabala misapho nazvenezvo zidawanda zidapindirira cuwanda zinango macumi matatu, zinango mazananamazana. ⁹ Iye adalanga. "Uyo anamacutu acubva, ngaabve!". ¹⁰ Patche Djeso akaliyega, waya wakali duze naiye, naiwo kumi nawairi wadamubvunza nathangwe ya mitsazaniso. ¹¹ Iye adalanga: "Imwepo munapiwa zvacuswisica Zvauculu Hamulungu, apo awo walicunza zvense zvinaithwa namitsazaniso, ¹² cunaawo, wanaona ngawaone, apo hawaonesesi, wanabva ngawabve, apo hawabvesesi, kundu linango deca cubvi iwo wapinduca napenepo Mulungo angadzawalekerere". ¹³ Iye adawabvunza: "Imwe hamuna cubvesesa mutsazaniso uyu? Munabvesesa tani inango? ¹⁴ Muzvari anazvala pfala. ¹⁵ Awo walimunjira ndiwo wanabva, apo angauya sathani napenepo anaba tchiripo-lipotcho pfala linaiwo mumoyomawo lacuti likadazvariwa. ¹⁶ Wenango ndiwo awo cuti wada zvariwa pabuwe wenewo wangati wabva pfala tchiripo-lipotcho anatambira namufanso. ¹⁷ Napenepo iwo hawana mizi patchawo, apo wanapirira pangani idocodoco nadyano cungauya cubonera nacuteweriwa nathagnwe lapfala, nazvinezvo tchiripo-lipotcho iwo wanabwa. ¹⁸ Futi wenango ndiwo wenewaya wadazvariwa pacati paminga. Iwo ndiwo wanabva pfala, ¹⁹ apo zingadzaonekwa mhingampini zamudzico, zvinanyengeza, cupfuma cutchiwa, nazvinango zvinapinda zvitchichipa pfala nazvinezvo hapabariwi misapho. ²⁰ Napenepo walipo awo cuti wadazvariwa pamataca yandimo. Iwo wanabva pfala, wanatambira, nazvenezvo wanabala mhumba zinango macumi matatu zinango zinango macumi matanhatu zinango mazananamaza". ²¹ Djeso adawabvunza: "Imwe munauyisa thotchi mucati mwanyumba mutchiika mpantsi pathengu penu pansi pamubede? Munauisa mutchiika pamhene. ²² Thangwe hacuna zvidaswisica cuti zvinadzalamba cudziwikwa, futi hacuna zvacuswisica cuti hazvidzauyi zvitchidzaonekwa pamhene. ²³ Angati alipo anamacutu ngabve". ²⁴ Iye adawabvunza: "Tetecani mubve, mhimo yanu munawapimira, nditchadzacupimiraniwo futi nditchadzacuthimizirani. ²⁵ Thangwe awo wanazvo, zvizinji wanadzazvipiwazve iwo. Napenepo cuna waya hawana, zvawozvo zvinadzawonekwa watchibudisirwa zvikanaiwozvo". ²⁶ DJeso adalanga: "Uculu Hamulungu hudaita ninga mamuna anazvara mbeu yatche mumataca. ²⁷ Iye ana gona napenepo anamuca, ucu mbeu inamera napenepo inacura, podi zvatche hazvidziwi cuti zvinaita tani. ²⁸ Mumataca mabodzibodziwo inabala misapho: Tchacutoma panaokwa mumera bude penepo poonekwa tsoconho nacufamba kwangani mhumba zodzaza tsoconho. ²⁹ Napenepo zingadzati zacola, tchiripo-lipotcho, munhu ombula nadjeco thangue cunconka kwaswica". ³⁰ Adawabvunzazve: "Ntchanyi tchatinga tsazanise na Uculu Hamulungu? Futi ndimutsanisowanyi wathu tina senzesa cuti ndicupanidzireni? ³¹ Iye ndiye ninga mumba ya mastadi cuti, ingazvaliwa, njidocodoco pazense mbeu zinazvaliwa pansi. ³² Napenepo, ingazvaliwa, inacula futi inakala iculu cupinda zvense zvinarimwa mudimba. Futi unaita mhanda ziculu. Nadyanoco mbalame zacudzaulu zinakwanisa cuita ntsanza zazo mumubvuli wawo". ³³ Nacuwanda kwamitsazaniso zvikazdawabatsira pa pfala ninga cukwanisa cubvesesa. ³⁴ Futi Iye hapakana tchikawalonguera iye , cunza kwa mitsazaniso.napenepo waliwoka akawapfunzisa zvense wapfunzi watche. ³⁵ Pansicu eneyo, kwacudocakwayo adawati: "Hambaini cukundu linango". ³⁶ Watchisiya mbumba, wapfunzi wadatola Djeso, nadyano wadakali mumwadiya. Mwadiya inangozve ikalinaiye. ³⁷ Napenepo cudatanga cuvuluza kwamhepo nakucucu, futi mabimbimbi akapinda nantsimba mumwadiya, cuita ninga ukali duze cudzala na madzi. ³⁸ Apo Djeso akali cumasule kwamwadiya pazdaulu pamubede. Wapfunsi wadamumusa, watchilanga: "Mufpunzisi, iwe hauna basa nazvo cuti tiri duze cuda cufa?" ³⁹ Djeso adaphemhuca, adapasa mutemo mhepo futi adalanga cubvunza bala: "thereca, ita zii". Napenepo mhepo idaema futi cutchibvakwabvekwao zii. ⁴⁰ Iye adawabvunza: Thangweranyi mulicutchya? Imwepo hamasati makala nacunyinda? ⁴¹ Wakadadzarirwa nacutchya cuculu futi watchibvunzana wokawoka: "Mbani uyu cuti mhepo tchaiyo inamubva?".