¹ Cubhuda penepo wadapida Mosisi na Arao cuna Farao, wadamuvhudza: CHAGAMIRE, Mulugu wa Isirael, aloga cunaiwe: Siya waende wadhuwangu cuyaita pwando lagu mutseseti. ² Apo Farao adadaira: Bhani iye CHAGAMIRE, cuti ine dimuvhe fhalalache ndicusieni muende Isiraer? Hadimudziwi CHAGAMIRE, napadhokopo nigasiye Isiraer iyende. ³ Apo iwo wadaloga: Mulugu wawahebreu watisvikira: tinaenda, dhiano, chichino uledo watsiku zitatu cutseseti, apo tinaita zwinapitsiwa cuna CHAGAMIRE wathu Mulugu; cuti alabe cutiuira nautenda penago nabeneti. ⁴ Napenepo mambo waIgipito hadawavhudza: Mosisi na Arao, thaguweranhi munafulira wadhu mumabhasaiyao? dhokoni cumitolo iyanu. ⁵ Hadalogazwe Farao: Wadhu wapatsi wawanda, apo himwe dimwe modhokuwatula mitoloihayo. ⁶ Apo hadatuma Farao tsiku eneiyo cunawanhacuwauswa wadhu wacuti diyo wanhacuwaonerera, apo nacuwa Goverenadori wawo, wachiti: ⁷ Kubudira pano kwenda cumberi musawape uskwa wadhu cuti waite mabuloko, niga dzulo hou niga dzana; walekeni iyo waende oka cuiyaswaca uskwa; ⁸ Apo munadzawaikira bhasa lamabhuloko niga akaita iyo cale, apo musawatapuzirembha nkabhe; thaguwe hapana zwirikuitaiyo, dipo walikuloga wachiti: Gatendeni tiapire zwinapitswa Mulugu wathu. ⁹ Wathimizireni bhasalao cunaiyo, kuti waone zwakuita iyo, apo musavhe masoko hacupwata. ¹⁰ Apo wadabhuda wanhakuuswa wadhu nawa Goverenadore wavo, wadaloga kunawadhu, wachiti: dhianii aloga Farao: Ine hadikupini uskwa. ¹¹ Ndokoni, muvaswake uskwa kwanu munahuonako; bhasalanu halitapuziwi nhe napadokopo. ¹² Napenepo wandhu wadamwazica petse patsi paiGipito wachiswaga matsaga pambutho wauskwa. ¹³ Apo wanhacuwauswa wakawachibizisa, wachiti: Ghalipere bhasalanuli, bhasa latsiku datsicueneiyo, niga zwanu mukapiwa uskwa. ¹⁴ Apo nawaonereri wawana waIsireri, wakuti wauswi wa Farao wakali pamusolo wayo, wachiti: Thaguwe ranhi hamuna cupeza bhasalanu lamabuloco nhamutsi nadzulo, nigakale? ¹⁵ Apo wanhacuonerera wawana waIsiraer wadauya cuna Farao, wachiti: Thaguweranhi unaita izwi nawanhamubhasawaco? ¹⁶ Hawapasiwi uskwa wanhamubasawaco, apo, napenepo, munativhudza: Itani mabuloko. Apo wanhamubhasa wako walipamusolowayo, wadhuwaco walikuchota. ¹⁷ Apo ihe hadadaira: Hapana zwanumulicuita, hapana zwanumulicuita, dizyo mulikuloga: Ngatende tapitse swinapitswa zwaCHAGAMIRE wathu. ¹⁸ Ndokoni, apo, chichino, casewedzeni. Hamupiwi uskwa, apo muchapiwa bhasa lamabuloko. ¹⁹ Napenepo waonereri wawana waIsiraeri wadachuguludzica, nacuti wakadavhudziwa cuti: Hatapuziwibha mabhuloco hanuyo,dibhasalanu latsiku natsiku. ²⁰ Apo wachiswikira Mosisi nha Arao, wakali pamberi pao paowadabhuda cuna Farao, ²¹ Wadawavhudza: Ligani CHAGAMIRE cunaimwe, toguesani; apo ife taphanichiwa pamberi pa Farao nawanhamubhasawache, cuwapasa mabeneti mumajha cuti watiulae. ²² Napenepo Mosisi hadahirira cuna CHAGAMIRE, apo hadaloga: chagamire, thaguweranhi maitisa muladu kuwadhu hawa? cuti muditume? ²³ Thaguweranhi madituma cunaFarao cuti dimuvhudze mudzinalanu, maitisa muladu kuwadhuhawa; apo napadokopo imwe hamuna kubatsira wadhuwanu.