¹ Yahweh aliendelea kuongea na Ayubu na kusema, ² "Je mtu yeyote anayetaka kukosoa na ajaribu kumsahihisha Mwenye enzi? Na yeye anayehojiana na Mungu, na ajibu yeye." ³ Ndipo Ayubu akamjibu Yahweh na kusema, " ⁴ Tazama, mimi si mtu muhimu; je nawezaje kukujibu? Ninauweka mkono wangu juu ya mdomo wangu. ⁵ Ninazungumza mara moja, na sitakujibu; hakika, mara mbili, lakini sitaendelea zaidi." ⁶ Kisha Yahweh akamjibu Ayubu kutoka katika dhoruba kali na kusema, ⁷ "Jifunge sasa mkanda kiunoni mwako kama mwanaume, kwa kuwa nitakuuliza maswali, nawe lazima unijibu. ⁸ Je waweza kusema kwa hakika kwamba mimi si mwenye haki? Je utanihukumu mimi ili useme wewe ni mwenye haki? ⁹ Je una mkono kama wa Mungu? Je waweza kutoa kishindo kwa sauti kama yeye? ¹⁰ Jivike sasa katika utukufu na katika utu; jivalie mwenyewe heshima na enzi. ¹¹ Sambaza ziada ya hasira yako; mtazame kila mmoja mwenye kiburi na umshushe chini. ¹² Mwangalie kila mmoja mwenye kiburi na umweke chini; wakanyage chini watu waovu mahali wanaposimama. ¹³ Wazike ardhini pamoja; zifunge nyuso zao katika sehemu zilizositirika. ¹⁴ Ndipo pia nitakapokubali ya kwamba mkono wako wa kulia waweza kukuokoa. ¹⁵ Mwangalie sasa kiboko, ambaye niliwafanya kama nilivyokufanya wewe; anakula nyasi kama ng'ombe. ¹⁶ Ona sasa, nguvu zake ziko katika viuno vyake; nguvu zake zi katika mishipa ya tumbo lake. ¹⁷ Yeye huuondoa mkia wake kama mti wa mwerezi; mishipa ya paja lake imeunganishwa pamoja. ¹⁸ Mifupa yake ni kama ya mirija ya shaba; na miguu yake ni kama kipande cha chuma. ¹⁹ Yeye ni mkuu wa viumbe vya Mungu. Ni Mungu pekee, ambaye alimwumba, anaweza kumshinda. ²⁰ Kwa kuwa milima humpatia chakula; hayawani wa mashambani hucheza karibu. ²¹ Hujilaza chini ya mimiea ya kivuli katika makao ya mianzi, na katika bwawa la matope. ²² Miti yenye vivuli humfunika katika vivuli vyake; mierebi ya kijito inamzunguka pande zote. ²³ Tazama, kama mto utazigharikisha kingo zake, hatikisiki; yeye anajiamini, hata kama Mto wa Yordani unajaa hadi katika pua yake. ²⁴ Je mtu yeyote aweza kumnasa kwa ndoano, au kuichoma pua yake kwa mtego?