¹ Ndipo Yahweh alimwita Ayubu kutoka katika dhoruba kali na kumwambia, ² "Huyu ni nani aletaye giza katika mipango kwa njia ya maneno bila maarifa? ³ Basi sasa jifunge kiunoni mwako kama mwanaume kwa kuwa nitakuuliza maswali, nawe lazima unijibu. ⁴ Wewe ulikuwa wapi wakati nilipoitandaza misingi ya dunia? Niambie, kama unao ufahamu zaidi. ⁵ Je ni nani aliyeamuru vipimo vyake? Niambie, kama unajua, ni nani alivinyosha vipimo juu yake? ⁶ Misingi yake ilitandazwa juu ya nini? Ni nani aliyeliweka jiwe lake la pembeni ⁷ wakati nyota za asubuhi zilipoimba pamoja na wana wote wa Mungu walipopiga kelele kwa furaha? ⁸ Ni nani huifunga bahari kwa milango wakati inapofurika, kana kwamba inatoka katika tumbo, ⁹ wakati nilipoyafanya mawingu kuwa ni mavazi yake, na giza nene kuwa mkanda wake wa kujifungia? ¹⁰ Hapo ilikuwa wakati nilipoweka bahari mpaka wangu, na nilipoweka makomeo yake na milango, ¹¹ na wakati nilipoiambia, 'Unaweza kuja hapa kutoka mbali, lakini si zaidi; na hapa ndipo nitauweka mpaka kwa fahari ya mawimbi yako.' ¹² Je tangu mwanzo wa siku zako, ulishawahi kuigiza asubuhi ianze, na kuyafanya mapambazuko yajue sehemu yake katika mpangilio wa vitu, ¹³ ili kwamba ishikilie sehemu za dunia ili watu waovu watikiswe mbali nayo. ¹⁴ Dunia imebadilishwa katika mwonekano kama udongo unavyobadilika chini ya muhuri; vitu vyote husimama juu yake dhahiri kama cha kibindo cha nguo. ¹⁵ 'Mwanga' wao umeondolewa kutoka kwa watu waovu; na mkono wao ulioinuliwa umevunjwa. ¹⁶ Je umeshaenda kwenye vyanzo vya maji ya bahari? Je umeshatembea sehemu za chini kabisa za kilindi? ¹⁷ Je malango ya mauti yamefunuliwa kwako? Je umeshaona malango ya uvuli wa mauti? ¹⁸ Je umeifahamu dunia katika upana wake? Niambie kama unayajua yote hayo. ¹⁹ Je iko wapi njia ya sehemu ya kupumzikia kwa mwanga, na kama ilivyo kwa giza, iko wapi sehemu yake? ²⁰ Je unaweza kuuongoza mwanga na giza katika sehemu zake za kazi? Waweza kuitambua njia ya kurudi katika nyumba zao? ²¹ Bila shaka unajua, kwa kuwa ulizaliwa wakati huo; hesabu ya siku zako ni kubwa sana! ²² Je ulishaingia katika ghala ya barafu, au umeshaiona ghala ya mawe ya mvua, ²³ vitu hivi nimeviweka kwa ajili ya siku za mateso, kwa siku za mapigano na vita? ²⁴ Je iko wapi njia ya mshindo wa mwanga hutokea au je upepo husambazwa kutoka mashariki juu ya dunia? ²⁵ Ni nani aliyezitengeneza mifereji ya gharika ya mvua, au ni nani aliyezifanya njia za milipuko ya radi, ²⁶ na kuifanya mvua inyeshe juu ya nchi ambazo hakuna mtu aishiye ndani yake, na juu ya jangwa, ambayo ndani yake hakuna mtu yeyote, ²⁷ kwa kusudi la kutimiza mahitaji ya mikoa iliyo kame na yenye ukiwa, na kuyastawisha majani mororo? ²⁸ Je kuna baba wa mvua? Ni nani aliyeyafanya matone ya umande? ²⁹ Je barafu ilitoka katika tumbo la nani? Na ni nani aliyeizaa theluji nyeupe katika anga? ³⁰ Maji hujificha menyewe na kuwa kama jiwe; sehemu za juu za vilindi huwa kama barafu. ³¹ Je unaweza kuzifunga minyororo nyota za Kilimia, au kuvifungua vifundo vya Orioni? ³² Je unaweza kuziongoza nyota kutokea katika nyakati zake? Je waweza kuongoza dubu pamoja na watoto wake? ³³ Je unazijua sheria za anga? Wewe uliweza kuanzisha sheria za anga juu ya dunia? ³⁴ Je waweza kupaza sauti yako hadi mawinguni, ili kwamba maji mengi ya mvua yakufunike? ³⁵ Je waweza kuagiza miali ya mwanga ili itokee, na kukwambia, 'Sisi tupo hapa'? ³⁶ Ni nani ameweka hekima katika mawingu au ni nani ameweka ufahamu kwa ukungu? ³⁷ Nani anaweza kuyahesabu mawingu kwa maarifa yake? Na ni nani awezaye kuvimwaga viriba vya anga ³⁸ wakati mavumbi yanapoungana kuwa kitu kigumu na mabonge ya dunia yanaposhikama kwa pamoja? ³⁹ Je waweza kuwinda mawindo kwa ajili ya simba jike au kutosheleza hamu ya watoto wadogo wa simba ⁴⁰ wakati wanapokwaruza kwaruza katika pango lao na kukaa katika kificho ili kulala katika hali ya kuvizia? ⁴¹ Ni nani aletaye mawindo kwa ajili ya kunguru wakati ambapo watoto wao wanapomlilia Mungu na kutangatanga kwa kukosa chakula?