¹ Sasa vijana wananidhihaki - vijana ambao baba zao wasingeweza hata kuwahudumia mbwa wa kundi langu. ² Kwa kweli, nguvu za mikono ya baba zao, zingenisaidia nini - watu ambao hawakuwa na nguvu wakati wa kukua kwao? ³ Walidhoofishwa na umasikini na njaa; walisaga nchi kavu mafichoni. ⁴ Walichuma mche chumvi na majani ya vichaka; mizizi ya mti wa ufagio ilikuwa ndiyo chakula chao. ⁵ Waliondolewa miongoni mwa watu waliopiga kelele nyuma yao kama ambavyo mtu angempigia kelele mwizi. ⁶ Hivyo walipaswa kuishi katika mabonde ya mto, katika mashimo ya ardhi na miamba. ⁷ Walilia kwa uchungu porini kama punda; chini ya vichaka walikutana. ⁸ Walikuwa uzao wa wapumbavu, hakika, wa watu wasiofaa; waliondolewa duniani kama waarifu. ⁹ Lakini sasa, nimekua sababu ya wimbo wa dhihaka kwa wana wao; hakika, nimekuwa mzaa kwao. ¹⁰ Wananichukia na kusimama mbali nami; hawaachi kunitemea mate usoni. ¹¹ Kwa maana Mungu ameondoa kamba katika upinde wangu na amenipiga, na hivyo watu hawa wanashindwa kujizuia mbele yangu. ¹² Kundi la vijana wabaya wanashambulia nguvu zangu; wananiondolea mbali na kukusanya kinyume changu rundo la kuhusuru. ¹³ Wanaharibu maisha yangu; wanapeleka mbele maangamizi yangu, watu wasio na wakuwazuia. ¹⁴ Wanakuja kinyume changu kama jeshi katika tundu pana katika ukuta wa mji; katikati ya maangamizi wanajizungusha juu yangu. ¹⁵ Hofu zimeniandama; heshima yangu imeondolewa mbali nami kama kwa upepo; mafanikio yangu yameondolewa kama wingu. ¹⁶ Sasa uhai wangu umeondolewa ndani yangu; siku nyingi za maumivu zimenipita. ¹⁷ Mifupa inauma ndani yangu wakati wa usiku; maumivu yanayonisaga hayaishi. ¹⁸ Nguvu kuu ya Mungu imeshika mavazi yangu; yananizunguka kama kala ya vazi langu. ¹⁹ Amenitupa matopeni; nimekuwa kama vumbi na majivu. ²⁰ Nakulilia wewe, Mungu, lakini haunijibu; ninasimama, nawe unaniangalia tu. ²¹ Umegeuka na kuwa mkali kwangu; kwa nguvu za mkono wako umenitesa. ²² Unaniinua katika upepo na kuufanya unikokote; unanirusha huku na kule katika dhoruba. ²³ Kwa maana najua ya kwamba utanipeleka mautini, nyumba ya hatima kwa viumbe vyote. ²⁴ Lakini, je hakuna ainuaye mkono wake kuomba msaada aangukapo? Je hakuna aombaye msaada akiwa tabuni? ²⁵ Je sikulia kwa ajili yake aliyekuwa tabuni? Je sijahuzunika kwa ajili ya mwitaji? ²⁶ Nilipotazamia mema, ndipo yalipokuja mabaya; niliposubiri nuru, giza lilikuja badala yake. ²⁷ Moyo wangu umetaabika na hautulii; siku za mateso zimenipata. ²⁸ Nimekuwa na ngozi nyeusi lakini si kwa sababu ya jua; nasimama katika kusanyiko na kulilia msaada. ²⁹ Nimekuwa ndugu kwa mbwea, mshirika wa mbuni. ³⁰ Ngozi yangu imekuwa nyeusi na inapukutika; mifupa yangu imeunguzwa na joto. ³¹ Kwa hiyo kinubi changu kimefunguliwa kwa nyimbo za maombolezo, zomari yangu kwa kuimba kwao waombolezao.