¹ Adeyakwe,bhamndwetu izirihiweni hena Mfumwa. Nisibhona kukangishwa kubhatamia waa bhiteto bhilabhila. Ibhi bhindu bhinerebhafika lubhoro. ² Kurindeni na nguro. Kurindeni na bhahiri ndima bhabhibhi, Kurindeni na bhala bhekuchwua miiri yabho. ³ Hena kuoka swi nibho kitabhani. Swi nibho tunaoka tumtasa Izubha hena lughenjo lwa Ngoro. Tukikufutia hena Kristo Yesu, na ebho tusina ng'ria hena muri. ⁴ Hata hubho, kicha hekioka na mundu wa luing'idaki lwa muri uu, mi nikiidima kuhira hubho kukela. ⁵ Hubhu nitabhanwe msi wa kanane, nibhoneke hena mbare ya Bhaisrael. Ni wa mbare yakwe Benjameni. Ni Mwebrania wa bhaibrania. Hena kukoromijia bhuinari bhwa sharia yake Musa, neokie, Mfarisayo. ⁶ Hena kukutata kwangu niangajie bhandubha iyanda lake mzuri. Hena kubaikia bhwedi bhwa sharia, neseokie na idoa la kulahwa hena bhukissharia. ⁷ Kake hena bhindu bhyose ebhyo nibhibhonie iti bhina mbucha hangu mi, nibhitarie sa bhujirari hena wanga ya kumtisibha Kristo. ⁸ Hena kididi, nioho nibhitara bhindu bhyose kuoka kutesha kufumana naiti ni bhwedi hena kumtisibha Kristo Yesu Mfumwa wangu. Hena wanga yake nashigha bhindu bhyose, nabhitara saiti ni bhujirari nesa nimuuhie Kristo. ⁹ na wa nibhonekane ndeni yakwe. Nisina bhwedi ndeni ya mikundire yangu. Hena kufumia hena sharia, kake nina bhukididi ebhwo bhunafumana na bhuitikiji hena Kristo, ebhwo bhunafuma hakwe Izubha,ye eye muimusha hena bhuitikiji. ¹⁰ Hena hubho iki nikundie kumtisibhija ye ena zinya ya bhufufulo bhwake, na ni mmwezu wa bhubhwasi bhwake, nikundie kukoranywa ni Kristo hena fana ya kifwa chakwwe, ¹¹ Nete niidime kuoka na mibharirie hena ufufulo wa bhala bhefuiye. ¹² Esi kididi iti naidima kuuhia bhindu ibhyo, kana iti naoka wedi hena ibhyo. Kake nioho nikutata nesa niidime kuuhia kila echo kifumane na Kristo Yesu. ¹³ Bhamndwetu, nisioho nigheshijia iti naidima kuuhia bhindu ibhi.Kake nioho nihira kindu iki kimwe; nakuibhaja bhibhetie na nibhiyowe bhyoho msongorana. ¹⁴ Nioho nikutata nesa nifikie mibharirie neesa niuhie kiringo cha wanga cha kuitangwa chake Izubha hena Kristo Yesu. ¹⁵ Bhose ebhwo twaheijwa halukio, ituinari kugheshijia saa ubhu. Na ikaoka ungi egheshijia hena kibhungi kuatera kindu chochose, Izubha bhulabhula enerelijughua ilo henyu. ¹⁶ Hata hubho, bhueza bhula ebho twafika na tutonge hena mwikare uho. ¹⁷ Bhamndwetu, nitamaiyeni mi bha yoweni hena bhuaria bhala ebho bheeho bhena mitongire ya fana eyo sayetu. ¹⁸ bheengi bhenaikaa mooni bhala ebho kandu keengi nioho nibhabhura, na iki nabhabhura hena masoji meengi bhena ikaa, saiti ni bharing'a bha kubhambwa kwakwe Kristo. ¹⁹ Lukoromijio lwabho ni lwa bhunyamari hena iti Izubha wabho ni ndeni, na kukukweja kwa bho kuoho hena soni yabho.Bheeho bhegheshijia bhindu bhya isanga . ²⁰ Kake bhuisanga bhwetu bhuoho wanga, eho tumbharirie mkija wetu Yesu Kristo. ²¹ Eneregharusha miiri yetu minana kuoka sa muri wake wa bhuzeri; hena luidimo lula lula elwo lukinda bhindu bhyose.