¹ Hena hubho bhakundwa bhangu, ebho nina ngiru nainywi, ebho nina luizirihio hena kiringo changu. Imukeni nezo hena Mfumwa, nywi bhambuyaa bhangu. ² Nioho nikusemba we Eudia, bhulabhula nioho nikusemba we Sintike, mhunduwe mgurano wa lubhoro ghati yenyu, hena bhula nywi, bhose bheri mugurane na Mfumwa. ³ Hena kididi, nibhasembie bhulabhula nywi bhahiri ndima bhaghenji bhangu, mubhaghenje abha bhache hena kuoka iti bhetumike hamwe na mi hena kuaria kiteto chakwe Mfumwa tukioka hamwe na Kelementi hamwezu na bharuo bhengi bhakwe Mfumwa, ebho mazina mabho matamwa hena idafa la bhumoo. ⁴ Izirihiweni hena Mfumwa misi jose, nighamba waa ,izirihiweni. ⁵ Kuhoia kwenyu kutisibhikane hena bhandu bhose, Mfumwa eoho hafuhi. ⁶ Msikuangajikie hena kindu chochose. Ade yake hireni bhindu bhyenyu bhyose hena zia ya kutasa na kungola haika. Na mikundire yenyu itisibhikane hakwe Izubha. ⁷ Hubho lubhoro lwake Mfumwa elwo luoho lubaha kukela magheshijio mose, lunererinda ngoro na magheshijio menyu hena lughenjo lwake Kristo Yesu. ⁸ Nibhwo, bhamndwetu; gheshijieni muno bhindu bhyose ebhyo bhina kididi, nganyi, bhwedi, bhuzeri, lukundo, na bhila ebhyo bhina rebho jedi, eyo ina bhwedi, hamwe na bhila ebhyo bhikundikane kuisiswa. ⁹ Hireni bhindu bhila ebhyo mkuloshie, ebhyo mubhi uhie ebhyo mbhisikie na ebhyo mbhibhonie kufuma hangu na bhulabhula Papa wetu wa lubhoro eoka nanywi. ¹⁰ Nioho na luizirihiyo lubahamuno wanga yenyu hena Mfumwa hena kuoka iti nywi mwabhonyanya wa kuoka na magheshijio ma kukuguranisha kwenyu wanga ya mikundire yangu hena kididi, aho mboko mwekundie kunitara hena mikundire yangu hata akija ,msipatie ngalo ya kunighenja. ¹¹ Nisioho nighamba hubho nesa nioshole kindu hena wanga ya mikundire yangu amu nikuloshije hena kuringania hena zia jose. ¹² Nitisibhe kuika moo hena bhundu bhwa kuduhukiwa na bhulabhula hena bhundu bhwa kuoka na bhiingi.Hena handu hose ibhi mi na kulosha kobhe ya zia nyingi ya kula hena igheri la zaa, hena bhiingi na kuoka mundu wa kukunda. ¹³ Niidima kuhira ibhi hena kuidimishwa niye eye enanigera zinya. ¹⁴ Hata hubho, mketie chedi kugurana nami hena bhwasi bhwangu. ¹⁵ Nywi bhafilip mutisibhe iti mboko ya bhuchili igheri nifumie Makedonia, hesina nyumba ya itasi eyo iniidimishe hena bhindu ebhyo bhinafumana na kungola na kuuhia esibhwo niiti ninywi bhenye tiki. ¹⁶ Niiti igheri neokie Thesalonike, nywi muniingijie lughenjo kukela kandu kamwe hena wanga ya bhila ebhyo nekundie. ¹⁷ Nisioho nighamba iti nioho nienda lughenjo. Kake nioho nighamba nesa mubhone maduda emo meete makumbio henyu. ¹⁸ Nauhia bhindu bhyose, naiki naizujwa bhindu bhingi. Nauhia bhindu bhyenyu kufuma hakwe epafradito ni bhindu bhyedi bhina mbungo iikae sa mithiri, ebhyo bhina kuitikijiwa ebhyo bhyose ni itasi elo limuizirihija Izubha. ¹⁹ Hena wanga ya iyo, Izubhawangu enerebhaizuja mikundire yenyu hena bhuzuri bhwa kirimi chake hena Yesu Kristo. ²⁰ Iki hena Izubha na Papa wetu uoke na kirimi ndarasi na ndarasi. Esae. ²¹ Ngezia jangu jimfikie bhaitikiji bhose hena Kristo Yesu. Bhakundwa ebhwo nioho nabhwo aha bhabhakezija. ²² Bhulabhula bhaitikiji bhose aha bhabhakezia, Munomuno bhala bha luzungu lake Kaisari. ²³ Na iki mvono wake Mfumwa wetu Yesu Kristo uoke na ngoro jenyu.