¹ Ikaoka iti hena kugerwa ngoro hena Kristo, ikaoka iti hena kushingirwa kufuma hena lukundo lwake, ikaoka hena mgurano wangoro,ikaoka hena lusario na kishighiwa. ² Koromijieni luizirihio lwangu hena migheehijire mimwe mkioka na lukundo lumwe mkioka bhamwe hena ngoro, na mkioka na mibharirie mimwe. ³ Msihire hena kukundia na kukukfutula. Esibhwoiti ni hena kubaika mkibhabhona bhengi ni bhedi kubhakela nywi. ⁴ Kila mwezu wenyu asiyowe tiki mikundire yake mwenye, kake bhulabhula asarie mikundire ya bhengi. ⁵ Muoke na migheshirije saila eyo Kristo Yesu eoho nayo. ⁶ Hata akija yee ni sa Izubha. Kake esikubhonie kula kuoka sa Izubha nikindu cha kuidima kugurana nacho. ⁷ Ade yakwe ekusejie ye mwenye, eonjie fana ya mndumi. Akakufunyirija hena fana ya kimundu. Akabhonekana sa mundu. ⁸ Ye ebaike na aka kuosha mnganyi mhaka kifwa, kifwa cha kigingi. ⁹ Hubho ra Izubha embhushije muna. Ekamuinga izina libaha libhetie kila izina. ¹⁰ Eketie hubho nesa iti hena izina lakwe Yesu kila ikunguro muhaka likondeke.Makunguro mabhala bheeho majumbini na bhala bheeho wanga ya isanga na si ya teri. ¹¹ Niiti eketie hubho nesa iti kila lumi nimhaka luitisie iti Yesu Kristo ni mfumwa, hena kirumi chakwe Izubha Papa. ¹² Hena hubho niiti bhakundwa bhangu sabhundu mna baika misi jose esiitini igheri nioho hamwe nainywi kake iki ni muno igheri nisiho nainywi mukundikane muoke na lukio lwenyu bhenye hena kufoleka na kudedema. ¹³ Hena kuoka iti ni Izubha eye ehoehira ndima ndeni yenyu, nesa kubhaidimisha kuoka na magheshijio mamwe makuhira bhindu bhila ebhyo bhimuizihija ye. ¹⁴ Hireni bhindu bhyose msioke na madughunyiko na kukarambana. ¹⁵ Hireni hubho nesa iti msidughunyikiwe na muoke bhana bhakwe Izubha bhenanganyi bhesina kudughunyikiwa. Hireni hubho nesa iti muoke na kiangaji cha isanga, hena luzungu lwa bhunyamari na bhubhibhi. ¹⁶ Kigureni muno kiteto cha bhumoo nesa iti nioke na kindu cha kumuisisa musi wakwe Kristo, wa ninetwarija iti nisi matuke bhesho na nisiangajike bhesho. ¹⁷ Kake hata kicha niohoniitishwa sa masho wanga ya inoolaitasi na bhuhiri bhwa bhuitikiji bhwenyu, niizihiriwa, na niizihiriwa hamwe nanywi bhose. ¹⁸ Bhulabhula na nywi bhulabhula muoho muizirihiwa na muiizirihiwa hamwe nami. ¹⁹ Kake nina luing'idaki hena Mfumwa Yesu kumutuma Timotheo henywu ubhu afuhi, nesa iti niidime kugerwa ngoro nikazakutisibha bhindu bhenyu. ²⁰ Hena kuoka nisina ungi eye ena mayowa sa make, enamibharirie ya kididi hena wanga yenyu. ²¹ Bhengi bhose ebho niki bhainga mndumi henyu bheeho bheenda bhindu bhyabho bhya kukukundia tiki, na esi bhindu bhyakweYesu Kristo. ²² Kake muitisibhe mbucha yakwe. Hena iti sa bhundu mwana eoho emuhiria bhabhe, nihibho hubho emuhirie hamwe nami hena bhuchili. ²³ Hena hubho ninalusiligi kumutuma maungwangu igheri tiki niretisibha nikini kinerefumia hangu. ²⁴ Kake nihete kididi hena Mfumwa iti mi mwenye bhulabhula ninereza ubhu afuhi. ²⁵ Kake nioho nigheshijia ni bhumbucha ani kumuhundua henyu Epafradito. Yeni mundwetu na muhiri ndima mghenji wangu na mrindi mghenji wangu, mndumi na mhiri wenyu hena wanga ya mikundire yangu. ²⁶ Hena hubho eokie na kufoleka na ekundie aoke hamwe nanywi bhose, hena iti msikie iti eokie muaji. ²⁷ Amu nikididi eokie muaji muno kihindi cha kufwa. Kake Izubha emsarie, na bhwedi ubhwo bhusiokie wanga yakwe tiki, kake bhulabhula bhwookie wanga yangu, nesa iti nisioke na kihebu wanga ya kihebu. ²⁸ Hena hubho na muhundua henyu hena mausara bhundu iidimika, nesa itiigheri munere mbhona wa muidime kuizirihiwa nami igheri ninereoka nangolwa kukangika. ²⁹ Muanjeleni Epafradito hena Mfumwa hena luizirihio lwose. Bhaingeni nganyi bhandu sa ye. ³⁰ Hena kuoka yeokie hena wanga ya ndima yakwe Kristo iti efikie hafuhi kufwa, egerie bhumoo bhwake handenga nesa kunikija mi na akahira kila echo musikiidime kuhira hena kunihiria mi amu mohohae nami.