¹ Iki hena misi yaiki, igheri uongejeko la bhaloshwa liokie likiongejeka, madughunyiko ma bhayahudi bha kiyunani libhokie wanga ya waebrania, hena iti bhajane bhabho bheokie bhaibhawahena bhughabhi bhwa kila msi wa lughenjo lwa kijo. ² Bhandumi ikumi na bheri bhebhaitange bhakabhatoranya bhose na bhaloshwa na kughamba,'' Esi bhwedi hetu kushigha kiteto cha Izubha na kuhiria mezani. ³ Hena hubho, bhamndwetu, iinare msabhure, bhome bhafungate, kufuma ghati yenyu, bhandu bhedi, bheizuwe Ngoro na macha, ebho tuidima kubhadambikia ndima ii. ⁴ Na swi, twohotuateria ndarasi hena itasi na hena ndima ya kiteto.'' ⁵ Mitetire yabho ikazirihija lutimi lose. hubho, bhakamsabhura Stefano, mundu eizuwe bhuitikiji na Ngoro Mshenenete, na Filipo, Prokoro, Nikanori, Timoni, Parmena, na Nikolao, bhakijwa kufuma Antiokia. ⁶ Bhaitikiji bhebhaetie bhandu abha msongorana ha bhandumi, ebho bhetasie na adeyake bhakabhabhikia maghaza mabho. ⁷ Hubho, kiteto chake Izubha kiendelee kurighalia; na makumbio ma bhaloshwa meokie mekiongejika. UkoYerusalemu; na makumbio mabaha ya bharisha bhaoka bhanganyi bha bhuitikiji. ⁸ Na stefano, eizuwe mvono na zinya, eokie ekihira maitalijo na mifumire mibaha ghati ya bhandu. ⁹ Kake aho bhakabhuka bhatare bha bhandu bhaateri bha isinagogi elo liitangwa la bhahuru, na la Bhakirene na la Bhaeskandaria, na bhatare bhekirukumana na Stefano. ¹⁰ Kake, bhesiidime kujutana na nganyi na Ngoro eyo Stefano eokie ekiihiria hena kuteta. ¹¹ Adeyakwe hena maiho ma mbiso, bhebhaketie bhatare bha bhandu hena mbiso kughamba,'' Twamsikia Stefano ekiteta bhiteto bhya kudaisha wanga ya Musa na wanga yake Izubha.'' ¹² Bhebhasosoiye bhandu, bhaghosi, na bhatami, na kumtongia Stefano, bhakamgura, na kumwete msongorana hena iwani. ¹³ Bhebhaetie bhashahidi bha maongo, ebhobheghambie, ''Mundu uu esishigha kuteta bhiteto bhibhi wanga ya handu aha hezerie na sharia. ¹⁴ Niiti twamsikia ekighamba handu aha na kujigharusha mikare eyotudambikiwe ni Musa.'' ¹⁵ Kila mmwe eyeokie hena iwani akagharusha meso make kumuyua Stefano, nabho bhakabhona bhusho bhwake bhuokie sa bhwa malaika.