¹ Igheri Petro na Yohana bheokie bhekirukumana na bhandu, bharisha na mbaha wa iyanda lake Izubha na Masadukayo bhebhatongie. ² Bheokie bhereghije muno wanga yake Petro na Yohana bheokie bhekilosha bhandu wanga yake Yesu na kugonda wanga ya kuokamoo hake kufuma habharefwa. ³ Bhebhaguriye na kubhabhika kichungoni iaze heyabho iyateria, amu yeokie chamagheri. ⁴ Kake bhandu bhengi bheokie bhasikia mondo bhakaitikijia; na uringani wa bhandu ebhobheokie bhaitikijia bhookie sa kuoka bhiku bhisano ⁵ Hata heyabho lake msi uwaterie, bhabaha bhabho, bhaghosi na bhatami, hena hamwe bhakatworania Yerusalemu. ⁶ Anasi mrisha mbahaeokie,na Kayafa, na Yohana, na Iskanda, na bhose bheokie ni bhamndwabho mrisha mbaha. ⁷ Igheri bheokie bhebhabhikie,''Hena luidimo luhi, kana hena izina lihi mwahira ili/'' ⁸ Ade, Petro, ekioka eizue Ngoro mshenenete, akabhabhura,''Nywi bhaitori bha bhandu, na bhaghosi, ⁹ Sa swi msi wa iyo twohotubhujwanywa kuatera muhiro wedi ehiriwe hena mundu uu muaji na hena bhundu mundu uu ekijiwe, ¹⁰ Iki itisibhikane iki henyu hena bhandu bhose bha Israel iti mundu uu eye eimuke msongorana henyu ekioka ni mzima hena izina lake Yesu wa Nazareti,eye mmubhambie, eye Izubha emfufule kufuma hena bhefuiye ni hena izina lake uu mundu eimuke aha msongorana henyu ena bhuzima. ¹¹ Yesu Kristo ni inoo elo nywi bhaareha mulisuie kake elo lahirika kuoka inoo libaha la mbai. ¹² Esina lukio hena mundu ungi wowose. Henawowose ula, amu esina izina lingi siiya majumbi bheingiwe bhandu, hena ilo tuidima kukijwa.'' ¹³ Iki igheri bhebhonie ng'iria yake Petro na Yohana, bhatisibha iti bheokie ni bhandu bhesina malosho, bheitalwe, bhakatisibha iti petro na Yohana bheokie hamwezu naYesu. ¹⁴ Hena bhula bhemmbonie ula mundu eyeedindijwe eimuke hamwe nabho, bhesiokie na kindu cha kuteta wanga ya ili. ¹⁵ Kake igheri bheokie bhakenja kubhaazerija bhandumi bhafume msongorana hena matorano ma ngondi, bhetetie bho bhenye. ¹⁶ Bheghambie, tubhahiriekini bhandu abha/.Ni kididi iti italijo la kuitalija lahirika kubhetia bho ukatisibhikana nakila mmwe eikaa Yerusalemu na tusiidima kulisuwa ilo. ¹⁷ Kake, nesa iti kindu ichi kisitongemlandala ghati ya bhandu, shigha tubhatabhashe bhasichile waa hena mundu wowose hena izina ili. ¹⁸ Bhakabhaitanga Petro na Yohana ndeni na kubhaazerija bhasireze kuchila kana kulosha hena izina lake Yesu. ¹⁹ Kake Petro na Yohana bhakatalua na kubhabhura, ''kicha ni chedi mesoni hake Izubha kubhainga nganyi nywi mbai na Izubha,chuwenichila bhenye. ²⁰ Amu swi tusiidima kushigha kubhichila bhindu ebho twabhibhona na kubhisikia.'' ²¹ Kukenja kubhatabhasha muno Petro na Yohana, bhebhashighie bhatonge. Bhesiidime kubhona kindu chochose cha kubhaingabhwasi, hena bhila bhandu bhose bheokie bhekimwiisisa Izubha hena kila kiokie chahirika. ²² Mundu ula eyeokie auhiya italijo la kudindijwa eokie na bhiyo kukela miaka makumi manne. ²³ Ade ya kubhashigha bhuhuru, Petro na Yohana bhezie hena bhandu bhabho na kubhatisibhija ndumi eyobharisha bhabaha na bhaghosi bheokie bhabhabhura. ²⁴ Igheri bhememasikie hubho, bhekwejie ng'iri jabho hena hamwe hakwe Izubha na kughamba, ''Mfumwa , we ulungie ijumbi na isanga na ipe na kila kindu ndeni yakwe, ²⁵ we eye hena Ngoro mshenenete , kubhetia hena momo wa mruo wako papa wetu Daudi ebhujanye,'Amu ni kini bhandu bha masanga bhahira gonda, na bhandu bhoho bhehirabhisibhe/. ²⁶ Ughambie Bhafumwa bha isanga bhakubhika hamwezu, na bharongori bhatoranika hena hamwe wanga ya Mfumwa na wanga ya mesia wakwe.'' ²⁷ Ni kididi, bhose Herode na Pontio Pilato, hamwe na bhandu bha masanga na bha Israel, bhetoranike hena hamwe hena kighongo ichi wanga ya mruo wako mshenetwa Yesu, eye umtamie Mafuta. ²⁸ Bhetoranike hena hamwe kuhira bhyose ebho ighaza na igheshijo lako uchuiye too aho bhikihirika. ²⁹ Iki, Mfumwa, yayowe makangisho mabho, na kubhaghenja bharuo bhako kuchila kiteto chako hena ng'iria yose. ³⁰ Ronga ighaza lako, kudindija , na maitalijo bhiidime kufumia kubhetia izina la mruo wako Mshenenetwa Yesu.'' ³¹ Igheribhakenja kutasia, handu bheokie bhahiramatorano hamwe likakushwa, na bhose bhaizujwa na ngoro mshenenete na kuteta kiteto chake Izubha hena ng'iria. ³² Mbotu bhaha ya bhala bheitikijie bheokie na ngoro mmwe na ngoro mwezu esina hata mmwe wabho eghambie iti chochose ehoekiitora kiokie cha hakwe mjenye mbai yakwe bheokie na bhindu bhyose habhumwe. ³³ Hena zinya mbaha bhandumi bheokie bhekiubighiandurere bhushuhuda wabho kuatera bhufufulo bhwake Mfumwa Yesu, na mvono mbaha uwokie wanga yabho bhose. ³⁴ Esiokie esina mundu wowose ghati yabho eokiye asobhekewa na chochose hena bhula bhandu bhose bheokie na hati ja bhibhaza kana nyumba, bhebhitaghie na kuete bala ja bhindu ebhobheokie wabhitaghija ³⁵ na kubhibhika sii ya maghu ma bhandumi na bhighabhanywe hena kila mwiitikiji kuringana na mikundire yakwe. ³⁶ Yusufu, mlawi, mundu kufuma Kipro, eingiwe izina lake Barnabasi Barnaba na bhandumi [iyo ikafufunywa, ni mwana wa [kuizirihiwa], kushingira.] ³⁷ Etaghije mteme wakwe, na akaete bhibala, akabhibhika sii ya maghuu ma bhandumi.