¹ Iki Petro na Yohana bheokie bhekitonga hena iyanda la itasi igheri la itasi, saa kenda. ² Ikaoka mundu msiku, esibhata too kubhoneka, eokie ekibhekwa kila msi na eokie ekiyajwa hena hena lughwi lwa iyanda la itasi uwitangwa wedi, nesa aingwe lughenjo kufuma ha bhandu bheokie bhekiingia ha iyanda la itasi. ³ Ekimebhabhone Petro na Yohana bheho hafuhi kuingia hena iyanda la itasi, esembie lughenjo. ⁴ Petro, akamkuria meso, hamwe na Yohana, ekaghamba ,''Tuyowe swi.'' ⁵ Mundu ula esibhata akabhayowa, ekiyoyia kuuhiya kindu kisiku kufuma habho. ⁶ Kake Petro akaghamba,''Bhibala na arera mi nisihete, kake kila niohonacho nikuinga. Hena izina lake Yesu Kristo wa Nazareti, bhata.'' ⁷ Petro akamuna hena ighaza lake la kuume na kumubhushija wanga; ahoaho maghuu make na bhifundo bhya maghuu make bhikaoka na zinya. ⁸ Ekitoroka wanga ula esibhata akaimuka na kubhoka kubhata; na kuingia ha iyanda la itasi hamwezu na Petro na Yohana, ekibhata,na kutorokatoroka, na kumuisisa Izubha. ⁹ Bhandu bhose bhebhonie ekibhata na kumuisisa Izubha. ¹⁰ Bhakamanya iti eokie ni ula mundu eye eokie ekisemba kuingwa lughenjo la sadaka hena lughwi lwedi lwa iyanda la itasi, bhiitaliswe na maitalijo hena bhula chafumiria hakwe. ¹¹ Ekioka ebhaguriye Petro na Yohana, bhandu bhose hena hamwe bhakabhadindikia hena lusarigho uitwangwa wake Sulemani, bhakaitalwa muno. ¹² Petro ekimebhone iki, ye akabhataluwa bhandu,''Nywi bhandu bha Israel ni kini muohomwitalwa/ Nikini mwohomtuyowa swi, sa iti twamwinga uu abhate hena zinya jetubhenye kana luidimo bhwetu/.'' ¹³ Izubha wake Ibrahimu, na wake Isaka, na wake Yakobo, Izubha wa bhapapa bhetu, ammwinga kirumi mruo wake Yesu.Uu niye eye nywi mumwii ngije na kumsuwa msongorana bhushoni bhwa Pilato, hata itiye eokie aitikijia kumshighiria mahuru. ¹⁴ Mumusuiye mshenenetwa na mwenye kuinari,na mbai yakwe mkakunda mkomi ashighiwe mahuru. ¹⁵ Nywi mmukomie mbhoka wa bhumoo, eye Izubha emfufule kufuma hena, bhefuiye, swi ni bhashahidi bha ili. ¹⁶ Iki, hena bhuitikiji hena izina lakwe, mundu uu, eye mwambona na kumtwarija, eoshiwe kuoka na zinya. Bhuitikiji ebhwo kubhetia hena Yesu bhamuinga kuoka na bhuzima ubhu bhukoromike msongorana henyu bhose. ¹⁷ Iki, bhamndwetu, natwarija iti muhirie hena bhutukuzi, nibho bhulabhula bhehirie bhaitori bhenyu. ¹⁸ Kake bhindu ebho Izubha ebhatindie too hena kubhetia momo wa bharoti bhose, iti uu Kristo eokanabhwasi, iki akoromija. ¹⁹ Hena hubho, baikeni na mgharuke, nesa iti ng'oki jenyu jiidime kufunywa pia, nesaiti maze magheri ma kuizirihiwa kufumana na kuoka kwa Mfumwa; ²⁰ Nesaiti aiidime kumtuma Kristo eye asabhurwa hena wanga yenyu,Yesu. ²¹ Ye niye eye mtano majumbi mamuhiiye mhaka igheri la kuhunduiwa hena bhindu bhyose, ebho Izubha ebhitetie misi ja kae kubhetia hena momo wa bharoti bhashenenetwa. ²² Kididi Musa eghambie,'Mfumwa Izubha ebhushija mroti sa mi kufuma ghati ya bhamndwenyu. Mtano mumsikije kila kindu echo ebhabhura nywi. ²³ Inerefumia iti kila mundu eye esisikija hena mroti uo enerekomwa pia afume ghati ya bhandu.' ²⁴ Nihubho, na bharoti bhose kufuma Samweli na bhala bhemuaterie ade yake, bhetetie na kuchila misi ya iyo. ²⁵ Nywi ni bhana bha bharoti na bha iyaghano elo Izubha elihirie hamwe na bhakaka, sa bhundu hake Abrahamu,'Hena mbeu yako maluzungu mose ma isanga metasiwa.' ²⁶ Ade Izubha kumbhushija mruo wake, emwingie ndumi yenyu ini, nesa abhatasie nywi hena kugharuka kufuma hena ubhibhi.''