¹ Imerefike musi wa pentekoste, bhose bheokie hamwezu handu hamwe. ² Ahoaho hekafumia ngori ya kuroruma sa mrurumo wa ngungu ukahe kufuma wanga,ikaizuja nyumba yose eyo bheokie bheikesi. ³ Aho hekafuma lubherebhere la moto jighabhanyike, jikaoka wanga ya kila mmwe wabho. ⁴ Bho bhose bhaizujwa Ngoro Mshenenete na bhakabhoka kuchila hena malumi lungi sa bhundu Ngoro ibhaidimishe. ⁵ Iki bheokie bhayahudu ebhobheokie bhekikaa Yerusalemu, bhakumwisisa Izubha, kufuma kila Isanga sii ya ijumbi. ⁶ Ngori iji jimeresikiwe, mbotu ya bhandu ikaza hamwezu bhekioka bharunganyikiwa hena iti kila mundu ebhasikie bhekiteta hena lumi lwake mwenye. ⁷ Bhakaitalwa na kuitalijwa, bhakaghamba, ''Kididi, abha bhose bhehobheteta esi bhagalilaya/ ⁸ Hena amu kini swi tuohotubhasikia kila mmwezu hena lumi ewo tubhoniwe nawo. ⁹ Bhaparthia na Bhamedi na Bhaelmu, na abho bhenaikaa Mesopotamia, Uyahudi, na kapadokia, na hena Ponto na Asia, ¹⁰ Hena Frigia, Pamfilia, hena Misri, na kibhaza cha Libya hata Kirene, na bhagheni kufuma Rumi, ¹¹ Bhayahudi na bhaongofu, Bhakrete na Bharabu, tubhasikie bhekiteta hena mbare yetu kuringana ndima ja luidimo lwake Izubha.'' ¹² Bhose bheokie bheitalwa na kurunganyikiwa; bhakabhurana bho hena bho, ''Ii ina mbucha ani ?'' ¹³ Kake bhengi bhedaiye bhakaghamba,''Abha bhaizujwa hena bhiengeji bhisha.'' ¹⁴ Kake Petro akaimuka hamwezu na bhala ikumi na mmwe, akakweja ngori, akabhabhura,'' Bhandu bha Yudea na bhose mwiikaa aha Yerusalemu, nesa itisibhokane henyu, sikijeni hena nezo bhiteto bhyangu. ¹⁵ Bhandu abha bhesiengee sa bhundu muoho mubhagheshijia igheri ili ni saa tatu. ¹⁶ Kake iki chookie kitetiwe kubhetia hakwe mroti Yoel; ¹⁷ Iyooka hena igheri la tiricho; Izubha aghamba, niitisha ngoro wangu hena bhandu bhose. Bhana bhenyu na bhabora bhenyu bheashuka bhuroti, bhabwange bhenyu bhebhona mabhono, na bhaghosi bhenyu bheoka nakurota. ¹⁸ Bhulabhula wanga ya bharuo bhangu bha bhakuume na bharuo bhangu bha bhakiche hena misi iyo, niitisha Ngoro yangu, nabho bhengolauroti. ¹⁹ Nine rebhonyanya maitalisho wanga majumbini na mbhonyanyo sii isangeni, sakame, moto, na mruke wa moshi. ²⁰ Zano ineregharushwa ioke kija na mweji uoke sakame, igheri usimeza msi mbaha wa kuitalisha wake Mfumwa. ²¹ Iyoka iti kila mmwezu eliitangia izina lake Mfumwa ekijwa. ²² Bhandu bha Israel, sikijeni bhiteto ibhi; Yesu wa Nazareti, mundu eye emushwe ni Izubha henyu hena mihiro ya luidimo na kuitalisha, na mibhonekano eyo Izubha kubhetia ye ghati yenyu, sa bhundu nywi bhenye mtisibhe - ²³ Hena bhundu mubhaririwe kufuma mboko ,na macha make Izubha, engolie nanywi, hena maghaza mabhandu bhakea, mumbhnike na kumkoma ²⁴ Kake Izubha ebhushije akangola lubhabho lwa kifwa hakwe, hena bhula isiidimika hakwe kuitorwa ni kifwa. ²⁵ Hubho Daudi eghamba wanga yakwe, 'nimbonie Mfumwa ndarasi msongorona ha bhusho bhwangu, ye eho maghaza mangu ma kuume hubho raa nisisongejwa. ²⁶ Hena ubho ngoro yangu iokie na luizirihiyo na lumi lwangu luizirihijwe. Bhulabhula muri wangu uikaa hena ng'iria. ²⁷ Hena kuoka usiishigha bhumoo bwangu bhutone bhulabhula usinere shighiria mzeri wako kuuhia kubhoa. ²⁸ We wanitisibhija zia ja bhumoo; uniketa niizuwe luizirihio msongorona hena bhusho bhwako; ²⁹ Bhamndwetu nindima kuteta henyu hena ng'iria kuringana na papa Daudi, ye efuiye na akajikwa, na ikaburi lake lioho hamwezu naswi hata ubhu iyo. ³⁰ Hubho, eokie mroti na etisibhe Izubha esesa, iti ebhika mmwezu hena luzungu lwake hena kichumbi chake cha bhuitoro. ³¹ Ebhoniye bhila ebho bhikihirika adee kuringana kufufulwa wake Kristo, iti esishighiwe haitegho, kana muri wake kubhoa.' ³² Uu Yesu -Izubha emfufule, eye swi bhose ni bhashahidi. ³³ Hena ubho, ikaoka abhushijwa hena ighaza la kuume lake Izubha, naekioka auhiya kiaze cha Ngoro Mshenenete kufuma hake Papa, ye aitishija ichi kiaze echo nywi mkibhona na kukisikia. ³⁴ Hena kuoka Daudi esikweiye kutonga wanga, kake eghambie '' Mfumwa eghambie hena Mfumwa wangu,''Ikaa ighaza langu la kuume, ³⁵ Mhaka nirebhabhika bhabhibhi bhako sii ya maghuu mako ³⁶ Hena hubho nyumba yose ya bhaisrael na itisibhe hena bhukididi iti Izubha amketa ye kuoka Mfumwa na Kristo, uu Yesu eye mumbhambie.'' ³⁷ Iki bhemesikie ibho, bhakashotwa hena ngoro jabho, bhakammbura Petro na bhandumi bhengi, ''mndwetu tuketeze/'' ³⁸ Na Petro akabhabhura shigheni ng'oki na mbatizwe, kila mmwezu wenyu, hena izina lake Yesu Kristo hena wanga ya kushighiwa ng'oki jenyu, na muuhiye toneya Ngoro Mshenenete. ³⁹ Henakuoka kiaze ni henyu na bhana bhenyu hena bhala bhose bheho hae, bhandu bhengi hena bhuringani bhwa Mfumwa Izubha wetu ebho ebhaitange,'' ⁴⁰ Hena bhiteto bhiingi bhingi nishuhudie na kubhasingirija,''kukijeni mfume hena luzungu ulu lubhibhi.'' ⁴¹ Niho bheka uhia bhiteto bhyake bheka batizwa aho bhakakumbika hena msi uo sa ngoro bhiku bhitatu. ⁴² Bheka kungolia hena malosho mabhandumi na hena mgurano hena kubegha mkate na hena kutasa. ⁴³ Kufoleka kukaza hena kila ngoro na maitalisho meengi na mihiro jikahirika kubhetia bhandumi. ⁴⁴ Bhose ebho bheitikijie bhekaza hamwe bhekioka na bhindu bhabho hena hamwe. ⁴⁵ Na bhetaghie bhindu bhabho na bhuitori bhwabho na bhakaghabhanya hena bhose kuringana na mikundire ya kila mmwezu. ⁴⁶ Hubho msi hena msi bhetongie bhekioka na magheshijio mamwe hena ihekalu. Bhulabhula bhebeghie mkate kaa hena kaa bhela kijo hena luizirihio na kuanjela hena ngoro ; ⁴⁷ Bhekimuisisa Izubha na bhekioka na kuitikijiwa hena bhandu bhose, Mfumwa ebhaongeje msi hena msi ebho bheokie bhekikijwa.