¹ Hena kitamo cha mboko , we mundwetu Theofilo, nikutamie nikighamba bhyose Yesu niye ebhokie na kuhira na kulosha, ² mhaka msi ewo euhiwe wanga.Ii yokie igheri la kungola amri kubhetia Ngoro mshenenete hena bhandumi eokie ebhasabhure ³ Ade hena bhwasi bhwake, ebhonekane habho eho moo bhulabhula na bhukididi bhwingi bhekibhuteta hena misi makumi mane ekubhonyanye habho, na etetie wanga ya kifumwa chake Izubha. ⁴ Matiokie ekitorana hamwezu nabho, ebhabhurie bhasifume Yerusalemu, kake bhainde hena wanga ya kiaze chake Papa, eyo, eighambie, ''Msikie kufuma hangu ⁵ itiYohana ebatize hena mbombe,kake mnebatizwa hena Ngoro Mshenenete hena misi mtare eyoizie.'' ⁶ Na igheribheokie bhetorane hamwe bhembhujanye,''Mfumwa, ngea, nilo igheri eloubhahunduaia Israel kifumwa/'' ⁷ Ye akabhabhura,''esi chedi henyu kutisibha igheri kana magheri emo Papa ebharirie hena bhorongori bhwake mwenye.'' ⁸ Kake muuhia zinya, igheri Ngoro Mshenenete enereza wanga yenyu, na nywi muoka bhashahidi bhangu hose hena Yerusalemu na Yudea yose na Samaria mhaka tiricho ya isanga.'' ⁹ Mfumwa Yesu emeidibhije kuteta ibhi, bhekioka bheyoiiye wanga, ebhushijwe wanga, na ijumbi likamfunikira bhasimbhone hena meso mabho. ¹⁰ Igheri bheokiye bhekiyoa wanga hena nezo ekitonga, ahoaho, bhundu bheri bhakaimuka ghatighati yabho bhedokie suke nyewa. ¹¹ Bheghambie,''nywi bhandu bha Galilaya, amu ni kini mwimuka aha mkiyuwa wanga /'' U Yesu eyeakwea wanga ehunduka hubhohubho sabhundu mumbonie ekikwea wanga. ¹² Niho bhakahunduka Yerusalemu kufuma hena ndubhi itangwa ya mizaituni ewo uho afuhi na Yerusalemu, bhuhae bhwa kubhata msi wa sabato. ¹³ Matibhefikie bhetongie gorofani bheokie bhekiikaa.Nabho ni Petro, Yohana, Yakobo, Andrea, Filipo, Thomaso, Batholomayo, Mathayo, Yakobo mwana wake Alfayo, Simoni Zelote na Yuda mwana wake Yakobo. ¹⁴ Bhose bheokie bhekikungola hena mikundire bhakungolia hena mkundire mmwe kutasaghati yabho bheokie bhache, Mariamu mee wake Yesu, na bhamndwebho bha kuume. ¹⁵ Hena misi jila, Petro emmuke ghatiya bhamndwetu, sa bhandu 120, akaghamba, ¹⁶ Bhamndwetu, iokie nimhaka iti bhiteto bhihirike, henaiti kae Ngoro mshenenete eghambie hena momo wake Daudi kuaterana na Yuda, eye ebhaezerije bhala bhemgurie Yesu. ¹⁷ Hena kuoka ye eokie mmwezu wetu euhie ifungu lake la kuongejikiwa hena ii ndima ii,'' ¹⁸ (Iki mundu uo ezorie kibhaza hena kila ekiuhiye hena matekwa make na aho eguiye ekirongoja mtwi, muri akabuka na matumbo make makabajika mose makaitika. ¹⁹ Bhose bheikaye Yerusalemu bhesikiye wanga ya iki, henahubho kibhaza icho bhakakiitanga lumi lwabho, ''Akeldama,'' Iti ni ''Mteme wa sakame.'') ²⁰ Hena idafa la Zaburi itamiwe, 'shigha handu hakwe haoke hesamiwe na asireitikijiwe mundu mmwe kuikaa aho shigha mundu ungii aonje aitore. ²¹ Ni mbuch, hena hubho, iti mmwezu wetu eye eraterane naswi igheri lose Mfumwa Yesu efumie na akaingia ghati yetu, ²² Kubhokia hena ubatizo wake Yohana muhaka musi ula eonjiwe wanga, aoke mshahidi wa kufufulwa hamwezu naswi. ²³ ''Bhakabhabhika msongorona bhome bheri, Yusufu eitangwa Barsaba, eye bhulabhula eitangwe Yusto, na Mathia. ²⁴ Nabho bhetasie bhekighamba, ''We, Mfumwa, utisibhe ngoro ja bhandu bhose, hubho bhika mwaji niuhi ghati ya bheri abha eye wamsabhura ²⁵ kuonja handu hena ndima ya bhundumi, ebho iti Yuda ehirie matekwa na kutonga handu hakwe.'' ²⁶ Bhakabigha kura hena wanga yabho, na kura ikamguiya Mathia eye etariwe hamwezu na bhala bhandumi ikumi na mmwe.