¹ Paulo akabhayowa mwe hena mwe bhandu bha ngondi na kughamba,''Bhamndwetu bhangu, naikaa msongorona hake Izubha hena magheshijio medi mhaka ubhu iyo.'' ² Mrisha mbaha Anania akabhaazerija bhala bheimuke hafuhi naye bhambighe momo wake. ³ Niho Paulo akambhura,''Izubha ekubigha we, lukomera lwabhirwa bhujewa. Waikaa ukinichuia chila hena sharia, nawe uazerija nibighwe mbai ya sharia./'' ⁴ Bhala bheokie bheimuke hafuhi naye bhakaghamba,''Hubhu nibho uoho umrigha Mrisha mbaha wake Izubha./'' ⁵ Paulo akaghamba,'' bhamndwetu bhangu, mi nasitisibha iti uu ni mrisha mbaha. Hena kuoka itamiwe esiteta ubhibhi wanga ya muitori wa bhandu bhako.'' ⁶ Paulo emerebhone iti mbai mwezu ya ngondi ni Masadukayo na bhengi Mafarisayo, akakweija ngori na kughamba,'' Bhamndwetu bhangu, mi ni Mfarisayo, mwana wa Mfarisayo. Ni hena bhula ii nayaiya hena ng'iria yakufufulwa kwa bhefuiye niho nichuiwa chila nabho.'' ⁷ Emeghambe amo, gonda mbaha ikafumia ghati ya Mafarisayo na Masudukayo, na matorano makaghabhanyika . ⁸ Ikio Masadukayo bhenaghamba esina kufufulwa, malaika kana esina ngoro, nibha Mafarisayo bhenaghamba ama mose mehoo. ⁹ Gonda mbaha ikafumia na bhatare bha bhatami ebho bheokie lubhajo lwa mafarisayo bhakaimuka na kurukuma, bhekighamba,''tusimebhona chochose kibhibhi wanga ya mundu uu nize iti ningoro kana malaika ateta naye/'' ¹⁰ Igheri hefumirie kiteto kibaha muimuki wa ijeshi akaituka iti Paulo ekibajwabajwa marungo makwe bhihindi bhihindi ni bho, hubho akaazerija bhanajeshi bhasee si na bhekamuonja hena zinya kufuma hena bhandumi bha ngondi , na bhekamuete hena ngondi. ¹¹ Kio kiraterie Mfumwa eimuke hafuhi naye na akaghamba usiondoke, hena kuoka wanishuhudia hena Yerusalemu, hubho unerengola bhushuhuda bhulabhula hena Roma'' ¹² Hemeche, bhatare bha Bhayahudi bhehirie mma na bhekaitanga ng'oki wanga ya bho bhenye wakaghamba iti bhesikale kana kunywa chochose mtano bhamkome Paulo. ¹³ Heokie na bhandu kukela makumi maane ebho bhehirie kilemia iki. ¹⁴ Bhakatonga hena bhabaha bha makuhani na bhaghosi na bhekaghamba twakugera bhenye hena ng'oki bhaha. Tusile chochose mtano tumkome Paulo. ¹⁵ Hubho ra bhangondi bhammbure long'oni mbaha amwete henyu, iti mumuchuiya chila yake hena mabhwedi. Hetu swi tuoho tukuarehie kumkoma esimemeza aha.'' ¹⁶ Kake abuye Paulo akasikia iti heokie na kilemia akatonga akaingia handu Paulo ebhisiwe akamtindia. ¹⁷ Paulo akamwiitanga akida mwezu akaghamba, ''Mtike uu mbwange hake long'oni wa jeshi, amu ena kiteto cha kumtindia.'' ¹⁸ Hubho Akida akamuonja ula mbwange akamtika hakwe muitori wa jeshi akambhura ''Paulo eye echungiwe eniitange akanibhura nimwete mbwange uu hako. Ena kiteto cha kukubhura.'' ¹⁹ Ula muitori wa jeshi akamgura mkono bhekakubhika mbai naye akambhujanya,''Nikinduani ukundie kunitindia/'' ²⁰ Mbwange ula akaghamba, ''Bhayahudi bhaarehiana kukuomba umuete Paulo yabho hena ngondi saiti bhekundie kuuhia rebheta jake hena bhushahidi hena bhundeni. ²¹ Hubho we usiitikije amu hena bhandu kukela makumi maane bheeho bhemuyema. Bhakuchunga hena ng'oki, bhasile na bhasinywe mtano bhamkome. Naiki hubhu bhakuarehia, bheindie bhaitikijiwe niwe.'' ²² Hubho muitori wa ijeshi akashighiria mbwange atonge jake, ememuazerije '' Akambhura usinembhure mundu wowowse iti wanitindia hubho''. ²³ Akabhaitanga maakida bheeri akaghamba bhaarehieni bhaasikari bhakukwea farasi makumi mafungate , na bheeho na machumo maghana meri munefuma hena igheri la kio chaghati. ²⁴ Akabhabhura bhabhike nyamao eyo Paulo enereitumia na kumfikija mboha hakwe filikia Gavana. ²⁵ Akatama idafwa hena nzia ii, ²⁶ Klaudio Lisia hena Liwali mkirumi Feliki, salamu. ²⁷ Mundu uu eguriwe ni mayahudi bhakaoka hafuhi na kumukoma niho nikatonga hamwe na mbhotu ya askari nikamukija, nimetindiwe rebho iyo ya iti ye ni mundu wa Rumi. ²⁸ Nekundie kutisifa ni amu kini bhamshitaki, hubho nikamtika ha bhangondi. ²⁹ nikabhona iti eokie eishitakiwe hena wanga ya mabhujanyo ma sharia yabho, kake esishitakiwe hena kiteeo chochose kiinare kukomwa kana kuchungwa. ³⁰ Ade ikatisibhikana hangu iti hena kilemia wanga yake hena hubho hena mausara nikamuazerija hako, na nikabhaazerija ebho bheokie bhena chila bhulabhula bhaete mateshanjo wanga yake msongorana . Kiboha." ³¹ Hubho bhala asikari bhakaitikijia iaghanyo; bhakamuonja Paulo bhakamtika mhaka Antipatri kio. ³² Msi uraterie, bhasikari bheengi bhakabhashigha bhala bhakukwea farasi bhatonge hamwe naye, nabho bhakahunduka jabho ngomeni. ³³ Na bhakwei farasi bhemefike Kaisaria, na kumuinga liwali lila idafwa, bhakambhika Paulo msongorana hakwe. ³⁴ Naye liwali emerelisome lila idafwa , embhujanye Paulo efumie kighongo chihi; emeretisibhe iti ni mundu wa Kilikia, ³⁵ Akaghamba, ''Nikusikija we bhekafika bhala ebho bhakushitaki,'' akaazerija abhikwe hena ikulu yake Herode.