¹ ''Bhamndwetu na bhapapa bhangu, sikijeni bhuchili bhwangu ebhonibhuhira henyu iki.'' ² Matorano bhere sikie Paulo ekiteta nabho hena kiebrania, bhakahuja.Akaghamba, ³ ''Mi ni myahudi, nibhonekie kighongo cha Tarso handu ha Kilikia, kake niuhie ilosho hena kighongo ichi, maghuuni make Gamalieli. Niloshiwe kuringana na zia jedi ja sharia ja bhapapa bhetu. Mi ninalunyariki lake Izubha, sa nywi bhose muoho iyo. ⁴ Nibhaingie bhwasi hena zia ii mhaka kufwa; nikibhachunga bhome na bhache na kubhabhirita kichungoni. ⁵ Hata mrisha mbaha na bhaghosi bhose bheidima kungola bhushahidi iti niuhie idafwa kufuma habho hena wanga ya bhamndwetu bheho Dameski, hangu mi kuzoka kutonga uko. iyookie nibhaete bhandu Yerusalemu bha zia ila nesa bhachungwe na kuingwa bhwasi. ⁶ Ifumirie iti hala neokie nikizoka hafuhi na Damaski, igheri la hemsi turu kiangaji kibaha kikafumiria wanga kibhoka kunirangara. ⁷ Nikagwa sii nikasikia ngori inibhura, 'Sauli, Sauli henakini unibhwasija.' ⁸ Nikatalua, 'we uwani, Mfumwa./'Akanibhura,' mi niYesu Mnazareti, eye we uoho umbhwasija.' ⁹ Bhala bhookie nami bhebhonie kiangaji, kake bhesisikie ngori ya ula etetie na mi. ¹⁰ Nikaghamba,'Niketeze, Mfumwa./ Mfumwa akanibhura, 'Imuka na uingie Damaski; uko unerebhurwa kila kindu echoukundikane kuhira.' ¹¹ Nasiidima kubhona hena bhula ya kirangaro cha kiangaji kila, niho nikatonga Damaski hena kurongoriwa na maghaza ma bhala bheokie na mi. ¹² Uko nikatorana na mundu eitangwa Anania, eokie mundu egurie sharia na wa kuingwa nganyi msongorona ha bhayahudi bhose bhekinaikaa uko. ¹³ Akaza hangu, akaimuka msongorona hangu, na kughamba,'Mundwetu Sauli, uidime kubhona.'Hena igheri ilo ilo nikambona. ¹⁴ Akaashuka,' Izubha wa bhapapa bhetu akusabhura we uidime kutisibha mikundire yake, kumbona ula mwenye bhuinari, nakusikia ngori eyo ifumie hena momom wake. ¹⁵ Hena wanga unereoka mshahidi wake hena bhandu bhose wanga ya ebhyo wabhibhona na kubhisikia. ¹⁶ Hubho iki hena kini uindiye / Bhuka, ubatizwe, uoje ng'oki jako, ukiliitangija izina lake.' ¹⁷ Ade eme hunduke Yerusalemu, na mariniokie nikitasa ndeni ya iyanda lake izubha, ikafumiria iti naingwa mabhono. ¹⁸ Nikambona ekinibhura,'ungwangu na ufume Yerusalemu maungwangu, hena bhula bhesikakunde bhushuhuda bhwako kuatera mi.' ¹⁹ Nikaghamba,'Mfumwa, bho bhenye bhetisibhe nibhachungie kichungoni na kubhabigha bhala bhekuitikijie hena kila iyanda la itasi. ²⁰ Na sakame yake Stefano shahidi wako emeitishwe, Mi bhulabhula neokie niimuke hafuhi na nikaitikijia na neokie nirinda suke ja bhala bhemkomie.' ²¹ Kake enibhurie,' Tonga, hena bhula mi nikuinga ndumi utonge hae na bhandu bha maisanga,' ²² Bhandu bhakamsikija mtano akaashuka bhiteto ibho. Aho bhaka koja ngori bhakaghamba, ''Mfunyeni mundu uu hena isanga ; Hena bhula esi chedi aoke mo.'' ²³ Igheri bheoke bheki kilozo, na kubhirita suke jabho na kubhirita teri wanga, ²⁴ Long'oni mbaha akaazerija Paulo aetwe hairioko. Akaazerija abhujanywe kunu ekibighwa misenge, nesa ye mwenye atisibhe hena kini bheokie bhekimbighia kilozo bhundu bhula. ²⁵ Hata ighetibheokie bhemchungie na zighi, Paulo akambura ula akida eye eimuke hafuhi naye,''Ngea ni bhuinari henyu kumbigha mundu eho Mrumi na esime chuiwa chila/'' ²⁶ Ula Akida emesikie bhiteto ibho, akatonga hena long'oni mbaha na akambura , ekighamba,''Ukundie kuhira kini/ Hena bhula mundu uu ni mrumi.'' ²⁷ Long'oni mbaha akaza na kumbura,''Nibhura, ngea we ni mundu wa Rumi/'' Paulo akaghamba, ''Nihubho.'' ²⁸ Long'oni akamtalua,''Ni kubhetia kuringana bhubaha bhwa kibala nicho niuhie uraia.'' Kake Paulo akambura, ''Mi ni mrumi wa kubhoneka.'' ²⁹ Enahubho bhala bheokie bhakuarehia kutonga kumtungurusa bhakafuma na kumshigha igheri ilo ilo. Na long'oni naye akaituka, Emetisibhe kuoka Paulo ni Mrumi, na hena bhula amchunga. ³⁰ Msi uraterie, long'oni mbaha ekundie kutisibha bhukididi kuatera mashitaka ma Bhayahudi wanga ya Paulo. Hubho akamchungua bhichungo bhyake akaazerija bhabaha bha bharisha na ngondi yose bhatorane. Akamwete Paulo sii, na kumbhika ghati yabho.