¹ Igheri twookie tumeshighane nabho, na tukioka tuzoka ipeni, tukafika mmwe kwa mmwe hena kighongo cha Kosi, na yabho lake tukafika kighongo cha Rodo, na kufuma uko tukafika kighongo cha Patara. ² Tukimekiche meli yoho ikela kutonga Foinike, tukweiye tukazoka. ³ Tumefike msongorona wa kisiwa cha Kipro, tukashigha lubhajo lwa kumoso, tukazoka mhaka Siria, tukabhika nanga hena kighongo cha Tiro, hena bhula uko niho meli yookie ikisejwa miagho yake. ⁴ Ade yake kubhabhona bhaloshwa, tukaikaa uko misi mifungate.Bhaloshwa abha bhakambhura Paulo kubhetia hena Ngoro iti ye asibhate Yerusalemu. ⁵ Hata tumerekenje misi jila, swi tukafuma tukatonga jetu. Bhose hamwe, na bhache bhabho na bhana bhabho. Bhetufunyie hena zia jetu mhaka mari tufumie shighati ya kighongo. Ade tukabigha makunguro pwani, tukatasa, tukaaghana kila mmwe. ⁶ Tukakwea meli, uko nabho bhakahunduka kaa habho wa. ⁷ Hata tumerekurije charo chetu kufuma Tiro, tukafika Tolemai. Hala tubhakezie bhamndwetu na tukaikaa nabho hena msi mmwe. ⁸ Iyabho lake tukafuma tukatonga Kaisaria. Swi tukaingia kaa hake Filipo, mchili wa bhuchili, eyeokie hamwe na bhala bhafungate, naswi tukaikaa hamwe naye ⁹ Mundu uu eokie na bhabora bhane bheokie bhamwai ebho bhabhoni. ¹⁰ Ade ya kuikaa uko hena misi misiku, akasea kufuma Uyahudi mroti mmwezu eitangwa Agabo. ¹¹ Ye ezie hetu akauonja mkwa wake Paulo. Hena uo ekuchungie maghuu na maghaza make mwenye na kughamba,''Ngoro Mshenenete eghamba hubhu,'' ''Bhayahudi bha Yerusalemu bheneremchunga mundu eyeeitora mkwa uu, nabho bhenerembhika hamaghaza ma bhandu bha maisanga.'' ¹² Tumeresikie bhindu ibhyo, swi na bhandu ebhobheokie bhekiika handu hala tumuhemberije Paulo asikwee kutonga Yerusalemu. ¹³ Niho Paulo akatalua, ''Muoho muhira kini, muiya na kunibaa ngoro yangu/ Hena amu nioho nikuarehiye, esi tiki kuchungwa, kake bhulabhula kufuiya uko Yerusalemu hena wanga ya izina lake Mfumwa Yesu.'' ¹⁴ Hena bhula Paulo asikunda kusingirijwa, tushighie na kughamba,''shigha makundire make Mfumwa mahirike.'' ¹⁵ Ade ya misi iji, tuonjie mabene metu na tukakwea Yerusalemu. ¹⁶ Bhatare bha bhaloshwa kufuma Kaisaria bhulabhula bheraterane naswi. Bhakamuete mundu mmwe eitangwa Mnasoni, mundu wa Kipro, muloshwa wa kae, eye tuikae naye. ¹⁷ Tumerefike Yerusalemu, bhamndwetu bhetuanjale hena luizirihio. ¹⁸ Iyabho lake Paulo etongie hamwe naswi hake Yakobo, na bhaghosi bhose bhereokie. ¹⁹ Ade ya kubhakezia, ebhaingie ndumi mmwe ade ya ingi ya bhindu ebhyo Izubha ebhihiriye ghati ya masanga hena kubhetia kuhira kwake. ²⁰ Igheri bhemeresikie ibhyo, bhakamuisisa Izubha, na bhakammbura,'' Wabhona, mundwetu, hena bhiku ibhyo bhaitikijia ghati ya bhayahudi. Bho bhose bhena magheshijio ma kugura sharia. ²¹ Bhabhurwa kuatera we, iti uoho ulosha Bhayahudi ebho bhenaika ghati ya bhaisanga kushighana na Musa, na iti uohoubhabhura bhasibhatabhane bhana bhabho, na bhasiatere mikare ja kae. ²² Tukundikane tuhire kini/ Esina ikangi bhesikia iti we waza. ²³ Hubho hira kila swi tuohotukubhura iki; tuna bhandu bhaane ebho bhabhika kiaze. ²⁴ Bhaonje bhandu abha na ukuzerije mwenye hamwezu nabho, na ubhaihie gharama jabho, nesa bhaidime kuenja mitwi jabho. Hubho kila mmwe aidime kutwarija iti bhindu bhebhuriwe kuatera we ni bha maongo. Bhekulosha iti we bhulabhula unaatera sharia. ²⁵ Kake hena rebho ja maisanga ebho bheokie bhaitikiji, tutamie na kungola maazerijo iti bhekundikane kukukemba na bhindu bhingoliwe mashao hena bhibhuri, na sakame, kufumana na kila echokinyamiwe, na bhakukembe na bhulai,'' ²⁶ Niaho, Paulo ebhauhie bhome, na msi wa keri, akakuzerija mwenye hamwe nabho, akaingia hena iyanda la kutasa, kurarisha kihindi cha msi ja kukuzerija, mhaka mashao mangolwe hena wanga ya mmwe wabho. ²⁷ Misi ijo fungate jimerefike kukenjejika, bhatare Bha bhayahudi kufuma Asia bhakambona Paulo hena iyanda la itasi, na matorano bhakareghija, na bhakamrongia maghaza. ²⁸ Bheokie bhekibigha kilozo,''Bhandu bha Israeli, tughenjeni. Uu ni ula mundu eyeenabhalosha bhandu kila handu bhindu ebho ni mbai na bhandu, sharia, na handu aha. Bhulabhula abhaeteBhayunani hena iyanda la itasi na kuhajirarsha handu aha habhushenete.'' ²⁹ Hena kuoka mbokoni bheokie bhembonie Trofimo Muefeso ekioka hamwe naye kighongoni, nabho bheoshie iti Paulo emuetie haiyanda lake Izubha. ³⁰ Kighongo chose cheokie na kuitika, na bhandu bhakamatuka hamwezu na kumgura Paulo. Bhakamngola shighati ya iyanda lake Izubha, na malughwi makachungwa. ³¹ Maribheokie bhekighesha kumkoma, rebho jimfikie mbaha wa ijeshi la bharinji kuoka Yerusalemu yose iyokie yaizua gonda. ³² Aho ubho akabhaonja bharinji na long'oni akamatukia mbotu. Igheri bhandu bhemmbonie mbaha wa bharinji na bharinji, bhakashigha kumbigha Paulo. ³³ Ade mbaha wa bharinji akamsongeria na akamgura Paulo, na akashurutisha achungwe mikwa miri. Akambhujanya ye ni ani na aketa kini. ³⁴ Bhatare bha bhandu hena mbotu bheokie bhekiboghoka kindu iki na bhengi kingi . Hena kuoka long'oni esiidime kutisibha chochose hena wanga ya kila kilozo, akashurutisha Paulo aingijwe ndeni ya irioko. ³⁵ Igheri emefike hena ngazi, akaonjwa ni mrinji hena bhula hekee gonda ja mbotu. ³⁶ Amu mbotu ya bhandu bhemuatere na bhetongie bhebigha kilozo,''Mngoleni uu.'' ³⁷ Paulo matieokie ekietwe ndeni ya irioko, emmburie mbaha wa bharinji,''niidima kukubhura kindu/'' Ula mbaha wa bharinji akaghamba,'' Ngea unateta Kiyunani/. ³⁸ Ngea, we esi ula Mmisri eye lubhoko urongorie bhubhibhi na eonjie bharing'a bhiku bhine kititoni/'' ³⁹ Paulo akaghamba, ''Mi ni Myahudi, kufuma kighongo cha Tarso ya Kilikia. Mi ni mundu wa kighongo kiinare. Nabhasemba, munishighie nitete na bhandu.'' ⁴⁰ Igheri long'oni amuinga lushighia, Paulo akaimuka hena ngazi na akangola lukonyo hena bhandu hena ighaza lake. Igheri emeoke na kuhuja muno, akateta nabho hena kihebrania. Akaghamba,