¹ Ade gonda imesie Paulo ebhaitange bhaloshwa na kubhakanya, akabhainga kiboha, akafuma na akatonga jake mhaka Makedonia. ² Naye emebhetie mikoa iyo na hena bhiteto bhiingi bhya kubhagera ngoro, akaingia Uyunani ³ Ekimeingie hala hena igheri la mieji mitatu, njama iarihwe wanga yake ni bhayahudi igheri eokie eoho hafuhi na kuzoka hena zia ya ipe kubhetia Shamu, hubho esaghure kuhunduka kubhetia Makedonia. ⁴ Ebhobheokie hamwe naye mhaka Asia bheokie na Sopatro, mwana wake Pirho kufuma Berea ;Aristariko na Sekundo, bhose kufuma bhaitikiji bha Bhathesalonike; Gayo wa Derbe; Timotheo; Tikiko na Trofimo kufuma Asia. ⁵ Kake bhandu abha bhaidima kurongora na bheokie bhetuindiye kula Troa. ⁶ Hena zia ya ipe kufuma Filipiade hena misi ja mikate eyo isioho na kudodorika, na hena msi misano tukabhafikia uko Troa. Tuikae uko hena misi mifungate. ⁷ Hata msi wa mboko wa ijuma, matituokie twakomboghanyika hamwe nesa kuubeghe mkate, Paulo etetiye na bhaitikiji. Eokie ekikuarehia kufuma iyabho lake, hubho akasongera kuteta mhaka kio cha kanane. ⁸ Heokie na bhilangaro bhiingi hena mghabhanyo wa nyumba lubhajo lwa wanga eho twookie twakomboghanyika hamwezu. ⁹ Hena mbarakanya eokie eikesi mbwange mwezu izina lake Eutiko,eye emeiwee ni lubhohe luwemee. Hata Paulo matieokie ekichila hena igheri lieza, mbwange uu, ekioka eshinjie, akagwa sii kufuma gorofa ya katatu na edodolwe ekioka afwa. ¹⁰ Kake Paulo eseiye sii,akakuronga ye mwenye wanga yake aka myayia ade akaghamba, ''Msibaike ngoro, hena kuoka ereho moo. ¹¹ Ukwaade akakwea wa gorofani na akabegha mkate, akala ekimetete nabho hena igheri ieza mtano heyabho,akafuma. ¹² Bhekamuete ula mbwange ekioka moo bhekahoijika muno. ¹³ Swi bhenye turongore msongorana habho Paulo hena meli na tukatonga Aso, eho swi tuitikijiane kumuonja Paulo uko. Iki nicho ye mwenye ekundie kuhira, hena kuoka egheshijie kutonga kubhetia isanga lila liaduke. ¹⁴ Emetufikie uko Aso, tukamwiingija hena meli tukatonga Mitilene. ¹⁵ Naiswi tukafuma kufuma uko na msi wakeeri tufikie lubhajo lwa keeri lwa kisiwa cha Kio. msi uwaterie, tukafika kisiwa cha Samo, na yabho lake tukafika kighongo cha Mileto. ¹⁶ Hena bhula Paulo eokie agheshijia kuzoka kubhetia Efeso, nesa iti asionje igheri lolose hena Asia;hena amu eokie na mausara makufika Yerusalemu hena wanga ya sikukuu ya Pentekoste, akija ikiidimika ye kuhira hubho. ¹⁷ Kufuma Mileto akatuma bhandu mhaka Efeso na akabhaitangabhaghosi bha Iyanda la kutasa. ¹⁸ Bhemefike hakwe, akabhabhura, nywi bhenye mtisibhe too msi wakubhoka nimebhate aha Asia sabhundu nookie henyu igheri lose. ¹⁹ Namuhiria Mfumwa ndima hena kubaika kwose na hena masoji, na bhwasi nibhetie mi hena bhubhibhi bhwa bhayahudi. ²⁰ Mtisibhe bhundu ebhwo nisikukindie kuchila henyu kindu chochose echo kiokie mbucha, na bhundu mi nibhaloshie mwajimwaji na bhulabhula kutonga kaa hena kaa. ²¹ Mtisibhe bhundu mi nikinabhaaghanya Bhayahudi na Bhayunani wanga ya ng'oki hena Izubha na bhuitikiji hena Mfumwa wetu Yesu. ²² Na iki, yoweni, mi , nikioka nioho ni mbaikia Ngoro Mshenenete kutonga Yerusalemu,nisitisibhe bhindu ebhyo bhinere nifumiria mi uko, ²³ Kake hena iti Ngoro Mshenenete ehoenishuhudia mi hena kila kighongo na akaghamba iti mikwa na bhwasi nibhwo bhiniindie. ²⁴ Kake mi nisi gheshijie iti miikaiye yangu ni hena zia yoyose ya mbucha hangu, nesa niidime kukurija kutonga kwangu na ndima eyo niuhie kufuma hake Mfumwa Yesu, kushuhudia bhuchili bhwa mvono wake Izubha. ²⁵ Naiki, yowa, nimaije iti bhose, ghati yabho bhala nitongie kubhachilia kifumwa, msinerenibhona bhusho wa. ²⁶ Hena hubho nioho nibhashuhudia iyoo ii, iti nisina lwabhi hena sakame yamundu wowose. ²⁷ Kuokaiti nisikukindie kubhatindia lukundo lwose lwake Izubha. ²⁸ Hena hubho okeni meso wanga yenyu nywi bhenye, na wanga ya mbotu yose eyo Ngoro Mshenenete ebhabhikie nywi iti mubhaimukie. Okeni na kukuyowa muno kurinda mbotu yake Mfumwa, elo elizorie hena sakame yake mwenye. ²⁹ Nitisibhe itiade ya kufuma kwangu, bhibaara bhikaehe bhenereingia henyu na bhisinere saria mbotu. ³⁰ Nitisibhe iti ghati yenyu bhenye bhatare bha bhandu bhenereza na kughamba bhundu bhibhibhi nesa kubhajuta bhaloshwa bhabhaatere bho. ³¹ Hena hubho muoke meso, gheshijieni iti hena miaka mitatu nisiidime kushigha kubhalosha kila mmwezu wenyu hena masoji kio na hemsi. ³² Na iki mi nabhabhika hake Izubha, na hena kiteto cha mvono wake, elo liidima kubhalunga na kubhainga bhuitori hamwe nabho bhose ebho bhebhikiwe wakfu hena Izubha. ³³ Nesekundie kibala, arera, kana suke. ³⁴ Mtisibhe nywi bhenye iti maghaza ama maninga ebhyo nikundie mi mwenye na ebho neokie hamwe na bho. ³⁵ Hena bhindu bhyose nibhaingie fana ya bhundu iinare kuoka kubhaghenja bhanana henakuhira ndima, na bhundu iinare kugheshijia bhiteto bhyake Mfumwa Kristo, bheteto ebhyo ye mwenye eghambie;''Ni kiba kungola kukela kuuhia.'' ³⁶ Emeghambe hubho, ebighie makunguro akatasa hamwezu nabho. ³⁷ Bhose bhakaiya muno na bhakamguiya Paulo singoni na bheka mmbusu. ³⁸ Bhekabaika ngoroni muno kukela bhyosehena wangaya kila echo eokie eghambie, iti bhesika bhubhone bhusho bhwake wa. Ade bhakamsindikiza merikebu.