¹ Ikaoka iti Apolo ekioka Korintho, Paulo akabhetia mbai ya wanga na akafika hena isanga la Efeso, na akakichija bhaloshwa bhatare uko. ² Paulo akabhabhura,''Ngea,muuhie Ngoro Mshenenete mumereitikijie/'' Bhakambhura,''Hai, tusiidime hata tusimesikie wanga ya Ngoro Mshenenete.'' ³ Paulo eghambie, ''Iki nywi mbatizwezee/.''Bhakaghamba, ''Hena ubatizo wake Yohana. ⁴ Hubho Paulo akatalua,''Yohana ebatize hena ubatizo wa wakuchuamiti. Akabhabhura bhala bhandu iti bhekundikane kumuitikijia ula eye ekiza adeyake, yani ,Yesu.'' ⁵ Bhandu bhemesiie rebho ii, bhakabatizwa hena izna lake Mfumwa Yesu. ⁶ Na ikaoka Paulo emebhabhikie maghaza make wanga yabho, Ngoro Mshenenete akaza wanga yabho na bhakabhoka kuteta hena mbare na kungolabhuroti. ⁷ Habhumwe bhookie bhoome bhefikie ikumi na bheri. ⁸ Paulo etongie hena iyanda la itasi akatinda hena ng'iria hena igheri la mieji mitatu.Eokie ekirongoria maarehiyano na kubhajuta bhandu wanga ya bhindu ebhobhitongana na kifumwa chake Izubha. ⁹ Kake Bhayahudi bhengi ebhobhookie bhanyare na bhesibaika, bhebhokie kughamba mabhibhi wanga yazia yake Kristo msongorona wa mbotu.Hubho Paulo eshighane nabho na akabhabhika mbai bhaitikiji hae nabho.Naye akabhoka kuteta kila msi hena iwang'i la Tirano. ¹⁰ Ii itongie hena miaka miiri hena hubho bhose ebho bheokie bheikaa Asia bhesikie kiteto chake Mfumwa, bhose bhayahudi na bhayunani. ¹¹ Izubha eokie ekihira mihiro ja maitalisho hena maghaza make Paulo, ¹² Iti hata bhawaji bhedindijwe, ngoro jijirare jibhafumie, igheri bhemeonja leso na suke jifumie mwirini mwa Paulo. ¹³ Kake heokie Bhayahudi bhakweja mbepo bhekizoka kubhetia lubhajo ilwo,bhekilitumia izina lake Yesu neesa bhaoke na zinya wanga ya mbepo jijirare; Bhekighamba,''Nioho nibhahaja mfume hena izina lake Yesu eye Paulo enamchila.'' ¹⁴ Ebho bhehirie hubhwo bhookie bhana bhafungate bhake Mrisha mbaha wa kiyahudi,Skewa. ¹⁵ Ngoro ijirare ikabhatalua,''Yesu nimtisibhe,na Paulo nimtisibhe; kake nywi ni bhani/. ¹⁶ Ila ngoro ijirare ndeni ya mundu ika bhatorokia bhakweji mbepo akabhalela zinya na akabhabigha. Niho bhakamatuka kufuma iyo kaa bhekioka tuhu na kubhinywa. ¹⁷ Kindu iki kikatisibhikana hena bhandu bhose, bhayahudi na bhayunani, ebho bheikae uko Efeso bhakaoka na fole muno, na izina lake Mfumwa likaongejika kuingwa nganyi. ¹⁸ Bhulabhula, bheengi bha bhaitikiji bhezie na kuchuwamti na kushigha mihiro mibhibhi Ejobhekinahira, ¹⁹ Bheengi ebho bhekihira bhughanga bhakakomboghanya madafwa mabho, wakamashota msongorona ha kila mundu. Igheri labho bhemetare bhuzuri bhwa ibhyo yookie bhihindi bhiku makumi masano bhya bhibala. ²⁰ Hubhwo kiteto chake Mfumwa kikaaria hena kuarama muno hena zinya. ²¹ Ade Paulo emekoromije ndima yake kula Efeso, Paulo akabhona hena kurongoriwa ni Ngoro kutonga Yerusalemu kubhetia Makedonia na Akaya; Akaghamba, ''igheri nookie uko, iniinare kuibhona Rumi bhulabhula.'' ²² Paulo akabhainga ndumi ya Makedonia bhaloshwa bhake bheri, Timotheo na Erasto, ebho bhookie bhemghenjie. Kake ye mwenye akashighwa Asia hena igheri. ²³ Igheri ilo hefumirie gonda mbaha uko Efeso wanga ya ila zia. ²⁴ Msongoa manoo mmwe izina lake Demetrio eye earehe bhibhuri bhya Arera bhya kiizubha wakiche eitangwa Artemi, eetie kutaghiana kubaha hena bhaarehi. ²⁵ Hubhwo akbhakomboghanya bhaarehi bha ndima iyo na kughamba, ''Bhaingwa nganyi, mtisibhe iti hena kutaghiana uku swi tuoho tuingija bhibala bhiingi. ²⁶ Muoho mubhona na kusikia esiiti aha Efeso, kake afuhi Asia yose, uu Paulo abhakengerija na kubhagharusha bhandu bheengi. ehoeghamba mizubha eyo yaarehwa hena maghaza esi mizubha. ²⁷ Naesi hubho tiki hena ndenga hena kutaghiana kwetu isikundikane waa, kake bhulabhula na iyanda la itasi lake izubha mche Artemi eidima kuonjwa iti esina mbucha. Waa eidima kutesha bhubaha bhwake, ye eye Asia na isanga linamtasa. ²⁸ Bhemesikie ibhyo bheingiwe ni oro na bhekabigha kilozo, bhekighamba,''Diana wa Efeso ni mbaha.'' ²⁹ Kighongo chose kikaizua gonda, na bhandu bhakamatuka hamwe ndeni ya kibhaza cha kuseka.Bhakabhagura bhazoki bhaghenji na Paulo, Gayo na Aristoriko, ebhobhefumie Makedonia. ³⁰ Paulo ekundie kuingia ghati ya mbotu ya bhandu, kake bhaloshwa bhemkindie. ³¹ Bhulabhula bhula bhatare bha bhabaha bha mkoa wa Asia ebho bheokie bhambuya bhake bhakamtikia ndumi hena zinya kumsemba asiingie hena kibha cha kusekia. ³² Bhatare bha bhandu bheokie bhekighamba kindu iki na bhengi kindu kila, hena wanga ya mbotu ya bhandu bhookie bharunganyikiwa. Bheengi bhabho bhesiidime hata kutisibha niamu kini bhezie hamwe. ³³ Bhayahudi bhakamweete Iskanda shighati ya mbotu ya bhandu na bhekambhika wanga msogorona ha bhandu. Iskanda akabhakonya akabhabhonya hena ighaza lake kungola bhiteto hena bhandu. ³⁴ Kake bhemetisibhe kuoka ye ni Myahudi, bhose bhakabigha kilozo hena ngori mmwe hena igheri la saa mbiri, ''Artemi ni mbaha wa Bhaefeso.'' ³⁵ Ade yake mtami wa kighongo emerehujisha mbotu, akaghamba,'Nywi bhome bha Efeso, ni ani esitisibhe iti kighongo iki cha Efeso ni muimukiri wa nyumba ya itasi ya Artemi mbaha wa kila kibhuri echo kiguiye kufuma wanga./ ³⁶ Kubhona hubho iti bhindu ibhi bhisikindirijika kuoka na kuhoiya na msihire chochose hena mausara. ³⁷ Hena amu mwabhaitanga bhandu abha aha hakuchuiya chila ebho si bhahibhi bha iyanda la itasi kana kumrigha izubha wetu wakiche. ³⁸ Hena hubho, akija Demetrio na bhaarehi bhehohamwe naye bhena matekwa wanga ya mundu wowose, handu ha kuchuiya chila eoho mwaji na bhachua chila bheho.Na bhaetwe msongorona ha kurukuma. ³⁹ Kake akija we uoho uwenda chochose kuatera bhindu bhiingi, bhineangajikiwa hena kidombo chakididi. ⁴⁰ Hena amu tuoho hena ndenga ya kulabhwa wanga ya gonda msi uu, hesina mbucha ya gonda iyo na tusinereoka na luidimo lwa kubhatindia. ⁴¹ Emereghambe hubho akaitanyatanya ila mbotu.