¹ Ade ya bhindu ibhyo, Paulo efumie Athene akatonga Korintho. ² Uko akamkichija Myahudi eitangwa Akwila mbhonwa wa Ponto, ye na mche wake eitangwa Prisila bhezie kufuma uko Italia, hena kuoka Klaudia eazerije bhayahudi bhose bhafume Roma; Paulo akaza habho; ³ Paulo akaikaa na kuhira ndima nabho amu ye enahira ndima eyo ina fana na yabho.Bho bhookie ni bhandu bhakuareha matondobari. ⁴ Paulo akaarehina nabho hena iyanda la itasi kila msi wa kutasa. Ebhasingirije bhayahudi hamwe na Bhagiriki . ⁵ Kake Sila na Timotheo bhekimeze kufuma Makedonia, Paulo eshindikwe ni Ngoro kubhashuhudia bhayahudi iti Yesu niye Kristo. ⁶ Igheri Bhayahudi bhemkindie na kumsua hubho Paulo akakukunda suke yake msongorana nabho, na akabhabhura,''Sakame yenyu na ioke wanga ya mitwi yenyu bhenye; mi nisina itekwa. Kufuma iki na kusongera, nitongia Masanga''. ⁷ Hubho akabhukika kufuma hala akatonga hena kaa yake Tito Yusto, mundu eye emuisisa Izubha. Kaa yake yoho hafuhi na iyanda la kutasia. ⁸ Krispo, mrongori wa iyanda la itasi hamwe na bhandu bha kaa yake bhakamwitikijia Mfumwa. Bhandu bheengi bha Korintho ebho bhemsikie Paulo ekiteta bheitikijie bhakabatizwa. ⁹ Mfumwa akammbura Paulo kio hena zia ya mbhonyanyo,''Usiondoke, kake teta na usihuje. ¹⁰ Amu mi nioho hamwe nawe, na hesina eidimakughesha kukubhinya, amu nina bhandu bheengi hena kighongo ichi.'' ¹¹ Paulo akaikaa uko hena igheri la mwaka mmwe na meji mitandatu eokie ekilosha kiteto chake Izubha ghati yabho. ¹² Kake Galio emeoshwe mrongori wa Akaya, bhayahudi bheimuke hamwe mbai na Paulo na kumtika msongorona na hena kichumbi cha kuchuiwa chila, ¹³ Bhekighamba,''Mundu uu enabhasingirija bhandu bhamtase Izubha mbai na sharia''. ¹⁴ Igheri Paulo eokie ekundie kughamba, Galio akabhabhura bhayahudi,''Nywi Bhayahudi, ikioka ni itekwa na bhubhibhi, ikioka zia yakubhaangajikia. ¹⁵ Kake hena bhula ni mibhujanyire, eyo ni wanga ya mazina, na sharia jenyu,ubho chuweni chila nywi bhenye. Mi nisinamlako kuoka mchuwa chila hena ndumi ya bhindu ibhyo.'' ¹⁶ Galio akabhaazerija bhafume msongorana hena kichumbi cha kuchuiya chila, ¹⁷ Hubho bhakamgura Sosthene, mrongori wa iyanda la kutasa bhakambigha msongorana ha kichumbi cha kuchuiya chila .Kake Galio esiituke hena kila echo bhemhirie. ¹⁸ Paulo, ade emeikae hala hena igheri iyeza,ebhashighie bhamndwabho na akatonga hena meli shamu hamwezu na Prisila na Akwila. Esime bhukika haipe , eenjie nyui jake amu eokie ebhikie kiaze. ¹⁹ Bhekimefike Efeso, Paulo emshighie Prisila na Akwila aho, kake ye mwenye akaingia hena iyanda la itasi na bhekaarehiana nabhayahudi. ²⁰ Bhememmbure Paulo aikae nabho hena igheri iyeza, ye esuiye. ²¹ Kake akafuma habho, akabhabhura, ''Ninere hunduka henyu, ikaoka ni lukundo lwake Izubha .''Ade ya aho, akabhukika hena meli kufuma Efeso. ²² Paulo emeseiye Kaisaria, ekweiye kutonga kukezia iyanda la itasi la Yerusalemu, ukwede akasea kutonga hena iyanda la itasila Antiokia. ²³ Ekimeikae hena igheri hala, Paulo efumie kubhetia marioko ma Galatia na Frigia uko ekibhagera ngoro bhaloshwa bhose. ²⁴ Myahudi mmwezu eitangwaApolo, mbhonwa wa Elexandria, ezie Efeso. Eokie na bhwedi hena kuteta na long'oni hena bhitamo. ²⁵ Apollo eokie etindiwe hena malosha make Mfumwa. Hena bhundu eokie na kukutatahena ngoro, etetie na kulosha hena bhwedibhindu bhimwiinare Yesu, kake etisibhe tiki bhubatizo bhwake Yohana. ²⁶ Apolo akabhoka kuteta hena ng'iria hena iyanda la itasi.Kake prisila na Akwila bhememsikie, bhehirie bhumbuye naye na bheka mtindia wanga ya zia jake Izubha hena bhwedi. ²⁷ Emekunde kufuma kutinga Akaya, bhamndwabho bhemgerie ngoro na bhekabhatamia idafwa bhaloshwa ebho bhookie Akaya nesa bhaidime kumuuhia. Emefike, hena mvono ebhaghenjie muno bhala bheitikijie. ²⁸ Hena zinya jake na macha, Apolo ebhakelie bhayahudi na iwang'i ekibhonyesha kubhetia kitamo kuoka Yesu niye Kristo.