¹ Paulo bhulabhula ezie Derbe na Lystra; na yowa, hala heokie na mloshwa eitangwa Timotheo,ni mbwange ebhoniwe na mcheku wa kiyahudi eye ni muitikiji kake Papa wake ni Mgiriki. ² Bhandu bha Listra na Ikonia bhemshuhudie nezo. ³ Paulo emkundie iti bhazoke naye, hubhu akamuonja na akamtabhana hena wanga ya bhayahudi ebho bheokie uko amu bhose bhemtisibhe iti Papa wake ni Mgiriki. ⁴ Igheri bheokie bhekitonga bhebhetie hena bhighongo na bhakangola maazerijo hena maiyanda maitasi nesa bhagure amo maazerijo emo metamiwe ni bhandumi na bhaghosi uko Yerusalemu. ⁵ Hubho maiyanda maitasi makagerwa zinya hena kuitikijia na bhala bheitikijie bhakakumbika hena makumbiko kila misi. ⁶ Paulo na bhaghenji bhake bhakatonga Firigia na Galatia, amu Ngoro yake Izubha ibhaghanye kuchila kiteto uko hena isanga la Asia. ⁷ Mati bheokie hafui na Misia,bhegheshie kutonga Bithinia, kake Ngoro wake Yesu akabhaima. ⁸ Hena hubho bhakabhetia Misia bhakaza mhaka isanga la Troa. ⁹ Mabhonyo emo memfumie Paulo kio, heokie na mundu wa Makedonia eimuke, ekimuitanga na akaghamba,''izooni mtughenje kunu Makedonia.'' ¹⁰ Paulo emebhone mabhonyo amo, aho tuka kuindighanya kutonga Makedonia, ekitisibha iti Izubha ebhaitange kutonga kubhachilia bhuchili. ¹¹ Hubho tukafuma Troa tukatonga mmwe hena mmwe Samothrake, na msi uraterie tukafika isanga la Neapoli, ¹² Kufuma aho tukatonga Filipi eho ni mmwe wa kighongo cha Makedonia, kighongo cha mbucha hena wilaya na bhuitori bhwa Kirumi na tukaikaa misi misiku. ¹³ Msi wa sabato tutongie shighati ya mvera hena zia ya mfuro, handu eho twegheshijie tunereoka na handu ha kuhirua itasi. Tuikae si na tukateta na bhacheku ebho bhezie hamwe. ¹⁴ Mche mmwezu eye eitangwa Lidia, enatagha zambarau, kufuma hena isanga la Tiatira, eye enamtasa Izubha, etusikije. Mfumwa emchungue ngoro yake na kubhika mbuchani bhiteto bhighambiwe na Paulo. ¹⁵ Ade bhemebatizwe, ye na nyumba yake yose,etusembie ekighamba ''Akija mwanibhona iti mi ni mkididi hena Mfumwa , hubho izoni muingie na kuikaa hangu.''Akatusemba muno. ¹⁶ Ikaoka iti, igheri twookie tukitonga handu ha kutasa, mbora mwezu eye eokie na mbepo ya bhutisibhi akatorana naswi.Emuetie mfumwa wake itasi lwingi hena bhubashiri bhwake. ¹⁷ Mche uu emwatere Paulo hamwe naswi, ekibigha kilozo eghamba ''Abha bhome ni bhandumi bhake Izubhaeye ni mbaha, ebho bheho bhemuchilia nywi ndumi ya lukio.'' ¹⁸ Ehirie hubho hena misi miingi kake Paulo ekioka areghijishwa ni mihiro uo, egharuke nyuma na akambhura mbepo, ''Nakubohia hena izina lake Yesu ufume ndeni yake,'' Naye akamfuma na kumshighirija kamwe na kamwe. ¹⁹ Bhafumwa bhake bhemebhone iti miyeyire yabho ya makumbio mabho yangolwa bhebhagurie Paulo na Sila bhaka bhabulula hakichinda msongorona habho bhena bhuitori. ²⁰ Bhemebhafikije hena bhachuwa chila, bheghamba, ''Abha bhome ni bhayahudi na bhaete gonda mbaha hena isanga letu. ²¹ Bheeho bhelosha bhindu ebhyo esiiaghanyo elo swi tusiidima kuuhia kana kubhiatera sa bharumi.'' ²² Mbotu ikabhagharuka bhubhibhi Paulo na Sila, bhachuwa chila bhakabaja suke jabho na bhakabhangola na bhaka bhaazerija bhabhashehe misenge. ²³ Bhekimebhashehe misenge miingi, bhebhabhirite kichungoni bhakamuazerija mrinji wa igereza kubharinda nezo. ²⁴ Ade bhekimeuhia iyaghanyo ilo, mrinji wa igereza ebhabhirite hena chumba cha ndeni ya igereza na kubhachunga maghu mabho handu eho ebhabhikie. ²⁵ Igheri la kio cha ghati, Paulo na Sila bhakaoka bhehobhetasa na kubhina lumbo lwa kumuisisa Izubha mati bhala bhengi bhechungiwe bheokie bhekibhasikija, ²⁶ Tereke hakafumia mkushiko mbaha na mishighi ya Igereza ikakushwa, malughwi ma igereza makajughuka, na magogolo ma bhechungiwe bhose mekaleghejwa. ²⁷ Mrinji wa igereza ebhukie kufuma hena lubhohe na akabhona malughwi mose ma igereza mejughuiwa; hubho akauha ipanga lakwe amu ekundie kukukoma hena bhula agheshijia bhachungwa bhose bhamatuka, ²⁸ Kake, Paulo akabigha kilozo hena ngori mbaha, ekighamba ''Usikubhinye hena bhula bhose tuaha handu aha.'' ²⁹ Mrinji wa igereza etasie bhiangaji bheetwe na akaingia ndeni ya igereza hena maungwangu, ekidedema na kuituka, akabhaguiya Paulo na Sila, ³⁰ na kubhangola shighati ya igereza na akaghamba,''Bhaingwanganyi, niketeze nesa niidime kukijika/'' ³¹ Nabho bhakambhura,'' mwiitikijie Mfumwa yesu nawe enerekijwa hamwe na nyumba yako.'' ³² Bhetetie kiteto chake Mfumwa hakwe hamwe na bhandu bhose bha nyumba yakwe, ³³ Mrinji wa igereza ebhaonjie kio icho na kubhaoja malubhajo malamabhinywa, ye hamwe na bhandu bha nyumba yakwe bhakabatizwa aho. ³⁴ Akabhaete Paulo naSila kaa hakwe na kubhabhikia kijo.Naye akaoka na luizirihio lubaha hamwe na bhandu bha kaa yake hena bhula bhamuitikijia Izubha. ³⁵ Imefike hemsi,bhachuwa chila bhetumie ndumi hena ula mrinji wa igereza bhekighamba, ''Bhashighirie bhala bhandu bhatonge,'' ³⁶ Mrinji wa igereza akamtisibhija Paulo wanga ya bhiteto ibhyo kuoka,''bhachua chila bhetumie ndumi nibhashighirie mtonge; Hubho fumeni shighati na mtonge hena lubhoro.'' ³⁷ Kake Paulo akabhabhura,''bhetubighie henamwaji, bhandu ebho ni bharumi hesina kutuchuia chila na bheamuwe kutubhirita haigereza; ade iki bhekundie kutungola hena mbiso/ Haie, isiidimika, bho bhenye bhaze bhatungole handu aha.'' ³⁸ Bharinji bhakabhatisibhija bhachuachila wanga ya bhiteto ibhyo, bhachuachila bhakaituka muno hala bhemetwarije kuoka Paulo na Sila ni bharumi. ³⁹ Bhachuachila bhakaza na kubhahembereja bhafume, na bhemerebhafunye shighati ya igereza, bhebhasembie Paulo na Sila bhafume shighati ya kighongo chabho. ⁴⁰ Hena hubho Paulo na Sila bhaka fuma shighati ya igereza bhakaza hakaa yake Lidia. Paulo na Sila bhemebhabhone bhamndwabho, bhebhagerie ngoro na ade bhakafuma hena kighongo icho.