¹ Bhandu bhasiku bheseiye kufuma uyahudi na kubhalosha bhamndwetu, bheghamba,''Mwasitabhanwa sa mikare yake musa,msiidima kukijwa.'' ² Ili lietie kukarambana na bhiteto bhibaha ghati yake Paulo na Barnaba hamwe na bhamndwabho bhechuiye iti Paulo, Barnaba, na bhengi bhatare bhatonge Yerusalemu hena bhandumi na bhaghosi hena wanga ya mibhujanyire ii. ³ Hena hubho, hena bhundumi bhwabho na iyanda la itasi, bhebhetie Foinike na Samaria bhechila kugharushwa mikundire jabho hena masanga. Bheetie luizirihiyo lubaha hena bhamndwetu bhose, ⁴ Igheri bhezie Yerusalemu bheanjeliwe ni Iyanda la itasi la bhandumi na bhaghosi,na bhefikije ndumi ya bhindu bhyose ebho Izubha abhihira hamwe nabho. ⁵ Kake bhandu bhasiku bheitikijie, ebhobhookie hena mbotu ya mafarisayo, bheimuke bhakaghamba,''Ni mbucha kubhatabhana na kubhaazerija bhagure ighanyo lake Musa.'' ⁶ Hubho bhandumi na bhaghosi bheimuke hamwe kugheshijia rebheta iyo. ⁷ Ade yake maarehiyano maeza,Petro eimuke na akabhabhura,''Bhamndwetu mtisibhe iti hakenya hadori Izubha ehirie isaghuro ghati yenyu,iti hena momo wangu masanga bhasikie kiteto cha bhuchili, na kuitikijia. ⁸ Izubha, eye etisibhe ngoro, echoetinda habho, enabhainga Ngoro Mshenenete, sa bhundu ehirie hetu; ⁹ Na esiarehe makoranyiko ghati yetu na bho, ekijiareha ngoro jabho jizere hena bhuitikiji. ¹⁰ Hena hubho, ni amu kini muoho mumughesha Izubha iti mubhike kichungo wanga ya singo ja bhaloshwa ebho hata bhapapa bhetu hata swi tusiidime kuinara/. ¹¹ Kake twaitikija iti tunerekijwa hena mvono wakwe Mfumwa Yesu, sa bhundu bhula nabho bheoho.'' ¹² Mkomboghanyo wose uhujiye igheri bhookie bhekimsikija Barnaba na Paulo igheri bhookie bhekingola bhuchili na mihiro jamaitalisho eyo Izubha ehiriye hamwe nabho ghati ya bhandu bha maisanga. ¹³ Igheri bheshighie kuteta,Yakobo akatalua ekighamba ,''Bhamndwetu nisikijeni. ¹⁴ Smioni abhatindia bhundu mbhoko Izubha hena mvono ebhaghenjie masanga nesa iti auhie kufuma 'habho bhandu hena wanga ya izina lake. ¹⁵ Bhiteto bha bharoti bhiitikijana na ibhi, sa bhundu itamiwe. ¹⁶ 'Ade ya mihiro iyo nihunduka na kujenga wa iyanda lakwe Daudi, eloliguiye sii,' nilibhushija na kuiosha moo bhunyamaribhwake, ¹⁷ nesa iti bhandu bheshighajike bhamuende Mfumwa, hamwe na bhandu bha masanga ebho bheitangwe hena izina langu.' ¹⁸ Hubhu nibhwo eho eghamba Mfumwa, eye ehirie bhindu ibhi bhitisibhikane too lubhoko lwa kae. ¹⁹ Hubho niiti bhushauri bhwangu ni, iti tusibhainge bhwasi bhandu bha masanga ebho bhemugharukia Izubha; ²⁰ Kake tubhatamie iti bhakukembe hae na bhunyamari bhwa bhibhuri, mlakolako wa, bhulai, na ebhyo bhinyamiwe, ²¹ Kufumia luzungu lwa bhaghosi hena bhandu hena kila kighongo bhechila na kumtisibha Musa hena maiyanda ma matasi hakila sabato. ²² Hena hubho ikabhonekana iti yabhaizirihija bhandumi na bhaghosi, hamwe na nyumba ya itasi lose, kumsabhura yuda eye eitangwe Barnaba, na Silas, ebho bheokie bharongori bha nyumba ya itasi na kubhainga muondo Antiokia hamwe na Paulo na Barnaba. ²³ Bhetamie hubhu hena maghaza mabho,''Bhandumi na bhaghosi, hena bhamndwetu na masanga ebho bheeho Antiokia, Shamu na Kilikia, ngezia. ²⁴ Hena iti twasikia iti bhandu bhasiku ebho tusibhaingie iyaghanyo ilo, bhefumie hetu na bhebhaangajishe hena malosha emo meetie bhwasi ngoroni henyu. ²⁵ Hena hubho yabhonekana nichedi hetu bhose kusabhura bhandu na kubhainga ndumi yenyu hamwe na bhakundwa bhetu Barnaba na Paulo, ²⁶ Bhandu ebho bhekuingije hena miikarire yabho hena wanga ya izina lakwe Mfumwa Yesu Kristo. ²⁷ Hena hubho twamwingandumi Yuda na Sila, bhebhabhura bhindu ibhoibho. ²⁸ Hena iti ibhonekane nichedi hena Ngoro Mshenenete na hetu, kusabhika wanga yenyu muwagho mbaha kukela bhindu ibhi ebhyo bhioho iti ni mhaka bhihirike; ²⁹ Iti mugharuke kufuma hena bhindu bhingoliwe hena bhibhuri, sakame bhindu bhya kunyamwa, na bhulai saiti mkubhika hae na ibhi, inereoka chedi henyu hena bhwedi. ³⁰ Hubo raa, bhundu bhetanyiwe tanyiwe, bheseiye Atiokia; ade bhekimetoranyisha matoranyo hamwe, bhefikije idafwa. ³¹ Igheri bhookie bhesomie, bheizirihiwe hena wanga ya kugerwa ngoro. ³² Yuda na sila, na bharoti, bhebhagerie ngoro bhamndwetu hena bhiteto bhiingi na kubhagera zinya. ³³ Bhemeikae igheri isiku uko, bhetanyiwe tanyiwehena lubhoro kufuma hena bhamndwetu hena bhala bhebhaingie ndumi. ³⁴ [Kake ibhonekane nichedi Sila kushighwa uko] ³⁵ Kake Paulo na bhengi bheikae Antiokia hamwe na bhengi bheengi, ebho bheloshie na kuchila kiteto chake Mfumwa ³⁶ Hena bhio bhisiku Paulo emmburie Barnaba,'' Nibhona iki tuhunduke tubhaselie bhamndwetu hena kila kighongo echo tuchilie kiteto chake Mfumwa tubhabhone sa bhundu bheho. ³⁷ Barnaba ekundie bhulabhula kumuonja hamwe nabho Yohana eye eitangwa Marko. ³⁸ Kake Paulo egheshijie yosokie chedi kumuonja Marko, eye ebhashighie kula Pamfilia na esitongie nabho hena ndima. ³⁹ Iki aho hakafumiria kukarambana kubaha hena hubho bhakatana tana, na Barnaba akamuonja Marko na bhakazoka hena meli mhaka Kipro, ⁴⁰ Ade Paulo emsabhure sila na akafuma, ade ekimedambikiwe ni bhamndwebho hena mvono wake Mfumwa. ⁴¹ Na etongie kubhetia shamu na Kilikia, ekimainga zinya makanisa.