¹ Ikafumia ndeni ya Ikonia iti Paulo na Barnaba bheingie hamwezu ndeni ya iyanda la itasi la Bhayahudi na kuteta bhundu ebhwo mbotu mbaha ya bhandu bha Bhayahudi na Bhayunani ebho bheitikijie. ² Kake Bhayahudi ebho esibhabaiki bhekasosoiya magheshijio ma bhandu bha isanga bhekabhaketa kuoka bhabhibhi ghati ya mundu na mundwabho. ³ Hena hubho bheikae uko hena igheri iyeza bheteta hena ng'iria na zinya yake Mfumwa, kunu bhekingola bhushuhuda wanga ya ndumi ya mvono wake. Ekitie hubhu hena kungola mihiro na maitalisho bhihirwe hena mikono yakwe Paulo na Barnaba. ⁴ Kake bhandu bha kighongo bhakaghabhanyika; bhatare bheokie bhakaoka hamwe na bhayahudi ni bhatare bhekaoka hamwe na bhandumi. ⁵ Igheri bhandu bha masanga na Bhayahudi hamwe na bharongori bhabho bhemegheshe kubhahiria bhubhibhi na kubhabigha manoo, ⁶ Bhekimetisibhe icho bhekamatukia hena kighongo cha Likaonia, Listra na Derbe, na malubhajo emo mejunguluke hala, ⁷ Eho bhetongie kuchila bhuchili. ⁸ Na uko Listra heokie na mundu mmwezu ekinaikaa, esina zinya na maghuu makwe, ebhiiiye kufumia hena itumbo la iya wake, esime bhata too. ⁹ Mundu uu emsikie Paulo ekiteta. Paulo akamkuruiya meso na akabhona iti eokie na kuitikijia kwa kudundujwa. ¹⁰ Hubho embhurie hena ngori ya wanga, ''Imuka hena maghuu mako,'' Na ula mundu akaimuka wanga na ekabhoka kubhata. ¹¹ Mbotu imebhone echo Paulo ehirie bhekwejie ngori jabho bhekighamba hena lumi lwa Kilikaonio,''Bhaizubha bhatuseiya hena fana ya kibhandu.'' ¹² Bhemchuie izina Barnaba ''Zeu,'' na Paulo ''Herme'' hena wanga eokie mchili mbaha. ¹³ Muimuki mbaha wa Zeu, eye iyanda lakwe la itasi leokie shighati ya kighongo eetie zao itishije na ifungu la maua mhaka hena mvera wa kighongo, ye na mbotu yake bhekundiye kungola masho. ¹⁴ Kake bhandumi Barnaba na Paulo, bhekinasikie iki bhakabaja suke jabho na hena mausara bhekafuma shighati hena mbotu, bheiya bheghamba, ¹⁵ ''Enywi bhandu nize muhira bhindu ibhi?Na swi bhulabhula tu bhandu ebho tuna magheshijio sa nywi. Twabhaetie rebho yedi, iti mugharuke kufuma hena bhindu ibhi bhisiinare na mumgharukie Izubha eye eho moo, eye elungie ijumbi, isanga na ipe na kila kindu kiyoho. ¹⁶ Hena igheri libhetie ebhaitikijie bhaisanga kusela hena zia jabho bhenye. ¹⁷ Kake naiti hubho esishighie sa hesina mshahidi hena icho ehirie chedi na akabhainga vua kufuma wanga na igheri la kubaa, akabhaizuja ngoni henyu hena bhijo na luizirihio'' ¹⁸ Naiti hena bhiteto ibhi Paulo na Barnaba hena bhwasi bhakakinda mbotu isibhangolie masho. ¹⁹ Kake bhatare bha Bhayahudi kufuma Antokia na Ikonio bheziye kubhasingirija mbotu imbighe Paulo na manoo na kumbulula muhaka shighati ya kighongo, bhakagheshijia iti afwa. ²⁰ Naiti hubho bhaloshwa bheokie bheimuke hafuhi naye, akabhuka, bhakaingia kighongoni. Msi wa keeri bhakatonga Derbe na Barnaba. ²¹ Ade ya kurarisha bhuchili hena kighongo kila na kubhaosha bhaloshwa bheengi, bhakahunduka Listra, mhaka Ikoniamu, muhaka Antiokia. ²² Bheokie hena mitongire ya kubhagera zinya hena ngoro jabho bhaloshwa kutonga hena kuiitikijia eghamba, akaghamba,''Ni muhaka tuingie hena kifumwa chakwe Izubha hena kubhetia bhwasi bhuingi.'' ²³ Bhekinaoke bhasabhura bhaghosi hena mbotu ya bhaitikiji na bhekioka bhatasa na kuchunga, Bhakabhadambikia hena maghaza makwe Mfumwa eye bho bhemuitikijie. ²⁴ Ade bhebhetie hena Pisidia na bhekafika Pamfilia. ²⁵ Igheri bhemetete bhiteto hena Perga, bheseiye kutonga Atalia. ²⁶ Kufuma uko bhekweiye meli mhaka Antiokia eho bheokie bhekungolie hena mvono wake Izubha hena wanga ya ndima eyo iki bheokie bhakoromijia. ²⁷ Bhemefike uko Antiokia, na kubhakomboghanya bhatasi hamwe, bhakangola rebho ya bhindu ebho Izubha abhihira habho, na bhundu abhajughuiya lughwi lwa kuitikijiwa ni bhandu bha masanga. ²⁸ Bheikae hena igheri iyeeza na bhaloshwa.