¹ Iki hena iyanda la itasi la Atiokia, heokie na bhatare bha bharoti na bhalimu. Bhookie Barnaba, simioni(eye eitangwa nigeri). Lukio wa Kirene, Manaeni(mundwabho eseokie wa sakame wake Herode mrongori wa mkoa), na Sauli. ² Igheri bheokie bhekimtasa Mfumwa hamwe na kuchunga Ngoro mshenenete eghambie,''Nibheluiyeni mbai Barnaba na Sauli, bhanihirie ndima nibhaitanie.'' ³ Ade bhatasi bhekimechunge, na kutasa, kubhabhikia maghaza wanga yabho bhekabhashighiria bhatonge. ⁴ Hena hubho Barnaba na Sauli bhakamsikija Ngoro Mshenenete na bhakaseiya seleukia, kufuma uko bhakazoka hena ipe kubhetia kighongo kijungulukwe ni mbombe cha Kipro. ⁵ Igheri bheokie hena Kighongo cha Salami, bhechilie kiteto chake Izubha hena maiyanda ma itasi ma Bhayahudi. Bhulabhula bheokie hamwe na Yohana Marko sa mughenja wabho. ⁶ Bhekimebhetie icho kighongo chose kijungulukwe ni ipe mhaka Pafo, bhembhonie msabhi msiku, Myahudi mroti wa maongo, eye izina lakwe leokie Bar Yesu. ⁷ Msabhi uo egurane na Liwali Sergio Paulo, eyeokie mundu echee. Mundu uu ebhaanjele Barnaba na Sauli, kuoka iti ekundie kusikia kiteto chake Izubha. ⁸ Kake Elima ''ula msabhi''(Hubho nibhwo izina lakwe litambarua) ebhakindie ekaghesha kumgharusha ula liwali afume hena kuitikijia. ⁹ Kake Sauli eitangwa Paulo, eokie eizuje na Ngoro Mshenenete, akamngolia meso ¹⁰ na akaghamba ''Wee mwana wa mkeleki, uizujwe ni bhindu bhyose hena kukenga na bhubhibhi. We u mring'a wa kila fana ya bhuinari. Usitabhasha kujigharusha zia ja Mfumwa. Ejojirongeke, ngea uneidima? ¹¹ Iki yowa, mkono wake Mfumwa uoho wanga yako, na uneoka usibhona. Usikarelibhone zano hena igheri''Ndekero mmwe ngungu na kija bhiguie wanga ya Elimas; akabhoka kujunguluka hala esemba bhandu bhamrongoje hena kumgura mkono. ¹² Ade yake liwali emerebhone kila echo chafumiria, eitikijie, hena wanga eitalishwe hena malosha kuatera Mfumwa. ¹³ Iki Paulo na bhambuyae bhezokie haipe kufuma Pafo na bhekafika Perge hena Pamfilia.Kake Yohana ebhashighie na akahunduka Yerusalemu. ¹⁴ Paulo na mbuyaye bhezokie kufuma Perge na bhakafika Antiokia ya Pisidia. Uko bhetongie hena iyanda la itasi msi wa itasi bhekaikaa sii. ¹⁵ Bheme some sharia na bharoti, bharongori bha iyanda la itasi ebhaingie ndumi bheghamba,''Bhamundwetu akija muna ndumi ya kugera bhandu ngoro aha, itindeni.'' ¹⁶ Hena hubho Paulo eimuke na kubharongia mkono; akaghamba,''Bhanduume bha Israelinywi mumsikije Izubha, sikijeni. ¹⁷ Izubha wa abha bhandu bha Israeli ebhasabhure bha Papa bhetu na kubhaosha bhandu bheengi bhekinaikae hena isanga la bhamisri, na hena mkono wakwe ubhushijwe abharongorie shighati yakwe. ¹⁸ Hena miaka makumi maane ebhagurumie hena ngarainge. ¹⁹ Ekimenyamare masanga mafungate hena Isanga la Kanani, ebhaingie bhandu bhetu isanga labho liokie bhuitori bhwabho. ²⁰ Mafumio ama moose mefumie kukela mala mamiaka maghana maane na makumi masano. Ade ya bhindu ibhi bhyose, Izubha ebhaingie bhatangalatua mburi mhaka Samweli mroti. ²¹ Ade ya ibhi, bhandu bhemsembie Mfalme, hubho Izubha akabhainga Sauli mwana wake Kishi, mundu wa mbare yakwe Benjameni aoke Mfumwa hena miaka makumi maane ²² Ade Izubha ekimemungole hena kifumwa, emukwejie kiringo Daudi kuoka Mfumwa wabho. Yookie ni wanga yake Daudi itiIzubha ebhibhonie na kughamba,''Nampata Daudi mwana wake Yese kuoka mundu eye aizirihija ngoro yangu;eye enerehira kila kindu echo nikikundie.'' ²³ Kufuma hena mbare ya mundu uu Izubha abhaetie Israeli mkija, Yesu, sa bhundu engolie kiaze ienerehira. ²⁴ Esimeze Yesu, Yohana mboko ebhetije ole ya ubatizo wa kushighiwa hena bhandu bhose bha Israeli. ²⁵ Naye Yohana emeoke ekikoromijia ndima yake, eghambie,'muoho munigheshijia mi kuoka ni ani?Mi esi ulaa. Kake sikijeni, ehoeza nyuma yangu, nisiinare kuterua zighi ja bhiratu bhya maghu make.' ²⁶ Bhamundwetu, bhana bha itumbo lakwe Abrahamu, na bhala ebho ghati yanyu munamtasa Izubha , ni hena wanga yetu iti ndumi ii ya lukio yafikijwa. ²⁷ Hena bhala bheikaa Yerusalemu, na bhaitori bhabho, bhesimtarie hena mikare, na wa bhesiitarie ndumi ya bharoti eyo inasomwa kila msi wa itasi; hena hubho bhekoromije ndumi ja bharoti hena kumchuiya chila ya kifwaYesu. ²⁸ Naiti bhesibhonie zia yedi ya ibigho la kifwa wanga yakwe, bhemsembie Pilato amkome. ²⁹ Bhemeoke bhakoromija bhindu bhyose bhyetamiwe wanga yakwe bhemsejie kufuma na mti na bhekamyaja hena mbira. ³⁰ Kake Izubha akamfufula kufuma habhefuiye. ³¹ Ebhonekane hena bhio bhiingi hena bhala bhetongie hamwezu naye kufuma Galilaya kutonga Yerusalemu. Bhandu abha iki ni bhashahidi bha bhandu. ³² Hubho tuoho tubhaetie ndumi jedi wanga ya kiaze bheingiwe bhakaka bhetu. ³³ Izubha afikija bhieze ibhi hetu, bhana bhabho, hena kumfufula Yesu na kumuhundua wa hena moo. Sa bhundu itamiwe hena zaburi ya keeri:'We ni mwanawangu, iyo naoka Bhabheo,' ³⁴ Nayoo kuatera kumfufula kufuma hena bhefuiye, ni iti muri wake usibhone kubhoa; aghamba hubhu, nikuinga itasi ijenye na lizerie, lakwe daudi ³⁵ Ii niyo wanga ya kuteta bhulabhula hena zaburi ingi,'Usineremshighiria mzeri wako abhone kubhoa.' ³⁶ Hena kuoka ade Daudi kuhiria makundo make Izubha hena luzungu lwake, eshinjie, ekayajwa hamwezu na bhapapa bhakwe, na muri wake ukabhona kunyamarika. ³⁷ Kake eye efufulwe ni Izubha esibhonie bhunyamariko. ³⁸ Hubho itisibhikane henyu, bhamundwetu, kubhetia mundu uu, kushighiwa ng'oki kwachiliwa. ³⁹ Hena ye wowose eneitikijia eneretariwa bhuinari na bhindu bhyose ebho sharia yake Musa isikibhaketa bhenye bhuinari. ⁴⁰ Hubho ra okeni na bhuaria iti kindu bhekitetie bharoti kisifumirie henyu; ⁴¹ 'Yoweni nywi muoho na ludao, na mreitalwa na mkurwe; hena bhula nihira ndima hena msi yenyu, ndima eyo musiidima kuitikijia, nete akija mundu enerebhatindia.'' ⁴² Igheri Paulo na Barnaba bhekifuma, bhandu bhakabhasemba bhatinde bhiteto ibhi msi wa itasi ewo uraterie. ⁴³ Igheri matorano ma iyanda la itasi limesiye, Bhayahudi bheengi na bhakijwa bha singisi bhebhaatere Paulo na Barnaba, ebho bhetetie nabho na bhakabhasingirija bharaterie uu mvono wake Izubha. ⁴⁴ Msi wa itasi ewo urateriye hafuhi kighongo kizima kikomboghikanye kusikija kiteto chake Izubha. ⁴⁵ Bhayahudi bhekimebhone matorano, bhekaoka na kiru na bhekateta bhiteto bhya kusua bhila ebhyo Paulo abhiteta na bhekamrigha. ⁴⁶ Kake Paulo na Barnaba bhetetie hena ng'iria na kughamba,''Yookie ni mbucha iti kiteto chake Izubha kitindwe mboko henyu. Igheri tuoho tubhona mkishindika hae kufuma henyu nakukubhona iti msiinare bhumoo bhwa bhandu bha masanga. ⁴⁷ Sa bhundu Mfumwa atuazerija eghamba, ''Nabhabhika nywi sa kiangaji hena bhandu bha masanga, iti muete lukio hena mbai jose ja isanga.'' ⁴⁸ Bhaisanga bhemesikie iki, bheizirihiwe na bhekakiisisa kiteto chakwe Mfumwa. Bheengi ebhobhesabhurwehena bhuzima bhwa ndarasi bheitikijie. ⁴⁹ Kiteto chakwe Mfumwa kiarie isanga lila lose. ⁵⁰ Kake Bhayahudi bhekabhasosoiya bhala ebho bhekungoliye na bhache bha mbucha, hamwe na bharongori bha kighongo. Ibhi bhisosoiye bhwasi wanga yakwe Paulo na Barnaba na bhebhabhirite shighati ya mihaka ya kighongo. ⁵¹ Kake Paulo na Barnaba bhakukunda purughushe ja maghu mabho. Niho bhakatonga hena kighongo cha Ikonia. ⁵² Na bhaloshwa bhekaoka na luizirihio hamwe na Ngoro Mshenenete.