¹ Igheri ilo Mfumwa Herode erongie mkono wake hena bhatare bha bhandu bha iyanda la itasi neesa aidime kubhainga bhwasi. ² Akamkoma Yakobo mndwabho Yohana hena lumaghe. ³ Ekimebhone iti chabhaizihija Bhayahudi, akamgura Petro. Iiyookie igheri la misi ya mamumunda mesina kudodorika. ⁴ Ememgure akamgera, kichungoni,akambhika sii ya mbotu nne ja bharindi neesa bhamrinde, eokie ekibhariria kumtika hena iwang'i ade ya pasaka. ⁵ Petro akabhikwa kichungoni, kake matasi makahirwa hena kukutata ni bhandu bha itasi, hena wanga yakwe hake Izubha. ⁶ Kio icho Herode esimetonge kumngola hena wanga ya chila, Petro eokie eshinjie ghati ghati ya bharindi bheri ekioka echungiwe mikwa ja menya miiri, kunu bharindi bhekioka msongorana ha lughwi bhekirinda igereza. ⁷ Yowa, malaika wake Mfumwa turu na turu akamfumia hakaoka na kiangaji ndeni ya igerera. Akambigha Petro hena msabhajo na akambhusha ekighamba,'Bhuka ungwangu,'na mikwa ya menya eyo echungiwe ikagwa kufuma na mikono yakwe. ⁸ Malaika akambhura,''Doka suke jako na udoke bhiratu bhyako,''Petro akaketa hubho. Malaika akambhura,''Doka ikoti lako na uniratere.'' ⁹ Hubho Petro akamratera malaika na akafuma shighati. Esitisibhe iti kila chahirwa ni malaika ni cha kididi.Egheshijie ni mabhono eho ebhona. ¹⁰ Emebhetie mbenge ya kubhoka na ya keri bhakafika hena lughwi lwa menya lwa kuingia kutonga na kighongo, lukajughuka lujenye wanga yabho. Bhakafuma shighati na bhekasea hena kighongo, ndekero malaika akamshigha. ¹¹ Petro ekimekutisibhe, akaghamba,''Naitikija iti ni kididi Mfumwa emuingie ndumi malaika wake neesa aningole hena maghaza make Herode, na hena kubhariria kwa bhandu bhose bhauyahudi. ¹² Emetisibhe ibhi akaza ha iyanda lakwe Mariamu eye ni mee Yohana eye bhulabhula eitangwa Marko,'eho bhakristo bheengi bheokie bhetoranyikie bhekitasa. ¹³ Emebighe hodi hena mvera wa lughwi, mrui mmwezu mbora eitangwa Roda akaza kujughua. ¹⁴ Emesikie ni ngori yake Petro hena kuizirihiwa ekaremwa ni kujughua lughwi; Ade yakwe akamatuka hamghabhanyo wa ndeni ya nyumba na kubhatisibhija iti Petro eimuke msongorana ha lughwi. ¹⁵ Hubho, bhakambhura,''We una luhungu,''Kake akadindija iti ni kididi niye. Bhakaghamba,''Uwo ni malaika wakwe.'' ¹⁶ Kake Petro akadindija kubigha hodi, na bhekimejughuwa lughwi, bhakambhona na bhakaitalwa muno. ¹⁷ Petro akaronga mkono kubhabhonya bhahuje chwi na akabhabhura bhandu Mfumwa emfunyie kufuma ha igereza akaghamba,''Mbhatisibhije bhindu ibhi Yakobo na bhamndwabho.''Nicho akabhukika akatonga lubhajo lungi. ¹⁸ Iki hekimeoke hemsi, hakaoka na gonda eyo yeseokie ndori ghati ya bharindi, kufumana na kila echo kifumirie hake Petro. ¹⁹ Herode ememuende akamsobha akabhabhujanya bharinji na akaazerija bhakomwe. Akatonga kufuma Uyahudi mhaka Kaisaria kuikaa uko. ²⁰ Ikaoka Herode eokie na oro wanga ya bhandu bha Tiro na Sidoni. Bhakatonga hakwe hena haigheshijio limwe na ade bhakamsingirija Blasto, eye eokie mughenja wake mfumwa Herode kuoka nabhumbuye nabho, bhakasemba abhaghenje. Bhesembie lubhoro hena wanga ya isanga labho neesa liuhiye kijo kufuma isanga lake mfumwa. ²¹ Msi ewo ubhaririwe Herode edokie madoko ma kifumwa na kuikaa hena kichumbi chakwe cha kifumwa, na kubhachilia. ²² Bhandu bhakakweja ngori,''Ii ni ngori yakwe Izubha esi ngori ya mundu.'' ²³ Ndekero iyo iyo malaika akambigha, hena wanga asimwinga Izubha kirumi; akaliwa ni sango na akafwa. ²⁴ Kake kiteto chakwe Izubha kikaoka na kuaria. ²⁵ Kake ikaoka Barnaba na Sauli bhemekoromijie ndima yabho hala bhakahunduka Yerusalemu kunu bhekimuonja hamwe nabho Yohana eye eitangwa Marko.