¹ Iki heokie na mundu msiku kighongo cha Kaisaria, izina lakwe eitangwa Kornelio, eokie muimuki mbaha wa ifiyo la askari bha Kiitaliano. ² Eokie mundu wakumwiisisa Izubha, na eyeemtasie Izubha hamwezu na kaa yakwe yose; engolie masho habhwingi hena bhandu na kumsemba Izubha misi jose. ³ Igheri la saa kenda ja hemsi, ebhonie mwaji hena mabhono malaika wake Izubha ekiza hakwe.Malaika akambhura ''Kornelio!'' ⁴ Kornelio akamuyowa Malaika na kuondoka muno akaghamba, ''Hena kini Mfumwa?'' Malaika akambhura ''Matasi mako na tona jako hena bhasobhu makwea wanga sa matisibhijo hena hena iwangi lake Izubha''. ⁵ Iki ingija ndumi bhandu bhatonge isanga la Yafa bhamuete mundu eye eitangwa Simionieye bhulabhula eitangwa Petro. ⁶ Eikaa na muaria wa ngingo eitangwa Simoni eye kaa yakwe iyoho kibhambara cha ipe.'' ⁷ Ade ya Malaika eyeeokie ekiteta naye emefume Kornelio akabhaitanga bheeri bha bharui bha iyanda lakwe na askari eye enamtasa Izubha kufuma ghati yabho ebho bheokie bhekinamhiria ⁸ Kornelio ebhabhurie bhyose ebho bhifumie akaingija ndumi Yafa. ⁹ Msi urateriye igheri la saa ndandatu bhekioka hena charo chabho, bhekioka hafuhi na kighongo, Petro ekweiye wanga ya guu kutasa. ¹⁰ Ye akasikia zaana akaokaekundie kindu cha kula, kake igheri bhandu bhekioka bhekirugha kijo, akabhonywa mabhono, ¹¹ Akabhona wanga hajughuka na akabhona kindu kioho kisea kindu kisiku sa iseto ibaha lisea sii isanga, kigurie hena mito jake jose miine. ¹² Ndeni yakwe heokie na fana jose ja nyamao jina maghu manane na bhearufwa wanga ya teri, na ndeghe ja wanga. ¹³ Wa ngori ikaghamba hakwe ''bhukika, Petro siza na ule''. ¹⁴ Kake Petro akaghamba ''esi hubho,Mfumwa hena wanga nisimeghesha kula kindu chochose kisiinare na kijirare. ¹⁵ Kake ngori ikaza hakwe wa hena ndekero ya keeri, ''echo akizerija Izubha usikiitange kisibhe kana kijirare'' ¹⁶ Ii ifumie kandu katatu, na kila kiiya kikaoka chaonjwa wa wanga. ¹⁷ Na igheri Petro ekioka hena bhundu bhwa kurunganyikiwa wanga ya mabhono amo emoeokie amabhonie mebhonyesha kini, yowa bhandu bheokie bhaingwa ndumi ni Kornelio bhakaimuka msongorana ya mbenge, bhekibhujanya zia ya kutonga hena bhekibhujanya zia ya iyanda. ¹⁸ Bhakaitanga na kubhujanya iti Simioni eye bhulabhula eitangwa Petro eokie eikaa aho. ¹⁹ Igheri ilo Petro ekioko ekigheshijia wanga ya amo mabhono, ngoro akateta naye, ''Yowa bhandu bhatatu bhehobhekuenda.'' ²⁰ Bhuka na usee sii na utonge nabho usiituke kutonga nabho amu nimi nabhainga ndumi'' ²¹ Petro akasea, sii habho akaghamba, ''Mii niye eye muoho mumuenda, ni amu kini mwaza?'' ²² Bhakaghamba,''Muitori mwezu izina lakwe Kornelio, mundu eye ena bhuinari na eye enamtasa Izubha na bhandu bhenamteta nezo, hena Isanga lose la Kiyahudi eazerijwe ni Malaika mzeri wake Izubha kukuingijia ndumi nesa utonge kaa hakwe, nesa asikie ndumi kufuma hako.'' ²³ Petro akabha kaiya, bhekaingia nyumbeni na bhekaikaahamwe naye, heabho yakwe lateme akabhuka akatonga hamwe nabho, na bhamundwabho bhatare kufuma Yafa bhakareterana naye. ²⁴ Msi uraterie bhakafika Kaisaria. Na Kornelio eokie ebhainda; na eokie abhaitanga hamwe bhamndwabho na bhambuyaye bhake bha hafuhi. ²⁵ Ikaoka iti igheri Petro eingie ndeni Kornelio akamuuhia na kubaika sii maghuni maghuni hakwe nesa amuisise. ²⁶ Kake Petro akambhushija na kughamba,''Imuka! mi mwenye bhulabhula ni mundu.'' ²⁷ Igheri Petro eokie ekiteta naye, etongie ndeni akakichija bhandu bheengi bhakomboghanyika hamwezu. ²⁸ Akabhabhura, ''nywi bhenye mumaije iti esi chedi hena Myahudi kugurana kana kumselia mugheni esi wa isanga letu. Kake Izubha anibhonya mi kuoka nisifaiye kumwitanga mundu wowose esiinare kana ejirare. ²⁹ Na nicho naitikija kuza nasikarambana nimebhurwe nize aha. Hubho niohonikubhujanya hena kini waniitanga.'' ³⁰ Kornelio akaghamba, ''Misi miine ibhetie ,igheri sa ili nookie nikitasa igheri la saa kenda hemsi nyumbeni hangu; na yowa, mundu eimuke msongorana hangu suke jakwe jing'eka. ³¹ Akaghamba,''Kornelio matasi mako masikiwa na Izubha, na tona jako hena bhasobhu jamukumbusha Izubha wanga yako, ³² Hubho tuma mundu Yafa na aremwitanga mundu mmwezu eitangwa Simioni aze hako, eye bhulabhula eitangwa Petro, eye enaikaa hena muaria wa ngingo mmwezu eitangwa Simioni eye kaa yakwe yoho kibhambara cha ipe. ³³ Hena hubho ndekero mmwe ninalung'idaki. We u wedi waza.Iki ra, Swi bhose tuwaha msongorana hake Izubha kusikija kila kindu echa wazerijwa na Mfumwa kughamba,'' ³⁴ Niho Petro akajughuwa momo wake na kughamba, ''Kididi, natisibha kuoka Izubha esiidima kuoka na bhukundio. ³⁵ Mbai yake, hena kila isanga mundu wowose eye emuituke na kuhira mihiro jiinare enekundika hakwe. ³⁶ Utisibhe ndumi eyo engolie hena bhandu bha Israeli, matieokie ekirarisha rebho yedi ya lubhoro kubhetia Yesu Kristoeye ni Mfumwa wa bhose. ³⁷ Nywi bhenye mtisibhe kila echo kifumirie Yudea yose, kubhokia Galilaya, ade ya ubatizo ewo Yohana euwararishe. ³⁸ Lilalifumirie eloliokie limtara Yesu Kristo wa Nazareti bhundu Izubha emugerie ngorino hena Ngoro Mshenenete na hena zinya. Etongie ikihira mabhwedi na kudindija bhose bheingiwe bhwasi na mkeleki, hena kuoka Izubha eokie hamwezu naye. ³⁹ Swi tu bhashahidi bha bhindu bhyose ebhyo Yesu ehirie hena isanga la Uyahudi na hena Yerusalemu.Bhemkomie hena kumbhamba wanga ya mti, ⁴⁰ Kake Izubha emufufule msi wa katatu na akamuosha abhonekane, ⁴¹ Esi hena bhandu bhose, kake hena bhashahidi bhalabhesabhurwe too na Izubha,-swi bhenye,ebho twala naye na kunywa naye ade ya kufufuka kufuma habhefuiye. ⁴² Atuazerija kuchila hena bhandu na kutinda iti uu niye eye esabhurweni Izubha kuoka mchwa chila wa bhala bheho moo na bhefuiye. ⁴³ Hena ye bharoti bhose bheho bhechila neesa iti eye enereitikijia hena ye euhia kushighiwa ng'oki kubhetia izina lakwe.'' ⁴⁴ Igheri Petro eokie ekitinda ibhyo, Ngoro Mshenenete akabhaizuja bhose ebho bhekimsikija ndumi yakwe. ⁴⁵ Bhandu ebho bheokie hena mbotu ya kitabhani cha bhaitikiji, bhala bhose ebho bhezie hamwe na Petro bhakaitalishwa, hena wanga ya kiingwa cha Ngoro Msheneneto eye eitishwe bhulabhula hena bhandu bha maisanga. ⁴⁶ Kuoka iti bhesikie abha bhandu bha maisanga, bhekirukuma hena lumi lungi na kumuisisa Izubha. Niho Petro akataluwa. ⁴⁷ Hena mundu wowose eye eidima kukindirija mbombe nesa bhandu bhasibatizwe?, Bhandu abha bhamuuhia Ngoro Mshenenete sa bhundu swi?'' ⁴⁸ Niho akaazerija bhabatizwe hena izina lake Yesu Kristo. Ade yake bhakamsemba aikae nabho hena misi mitare.