¹ Jesu Masihi ariho tima kula dzulu murimani, kundi bomu ra atu vachimutua. ² Mutu mumwenga arekala na ukongo wa ukoma, achimutua achisujudu mbereze achimwamba " Bwana, kala u radhi nihenda nami nikale musafi." ³ Jesu achigoloza mukono, achimuguta achimwamba, "Ni radhi. Kala musafi!" Haho kpwa haho mukongo wa ukoma achihola. ⁴ Jesu achimwamba, "Hakikisha kumwambira mutu yoyosi. Gbwira njira mwenga kpwa mwenga mpaka kpwa kuhani wa kanisa ukomboze zawadi ambayo Musa welakiza, kpwa ajili ya ushuhuda wa kpwako kpwao. ⁵ Jesu Masihi arihokala wenjira Kapernaumu, Jemedari mumwenga achimuza, ⁶ achamba, "Bwana, muhenzi kazi wangu yurere nyumbani, yuholoza na walumwa vya kpwangalaza" ⁷ Jesu achimwamba, "Nindadza nimuhoze" ⁸ Jemedari achimujibu achimwamba, "Bwana, mimi sina thamani wala si muhimu kukala ta udze na wenjire mwangu nyumbani, nena tu dzambo naye muhenzi kazi wangu andahola. ⁹ Kpwa kukala mimi pia ni mutu niriye na mamulaka, na ninao shikari tsini yangu. Nichi mwamurisha yuno, "Enda" wenenda. Na yuya nichi mwamurisha "Nzo" wadza, na kpwa muhenzi kazi wangu, "Henda vino" wahenda." ¹⁰ Jesu ariho gasikira gago, vyemwangalaza achimvamba mvario kala vamutua, "Ujeri namvambira, sidzangbwe kona mutu mwenye imani here yuyu ntsi ii ya Israeli. ¹¹ Namvambira vivi, anji mvandadza kula momborero ga dzuwa na matswero ga dzuwa, mvandasagala meza mwenga na Iburahimu, Isaka na Jakobo, kahi za ufalume wa mulunguni. ¹² Ala, mvo ana a ufalume mvanda tsuhiwa nze chizani ambako kundakala na viriro na kuluma meno." ¹³ Jesu achimwambira ye Jemedari, "Uya kpwako mudzini, here udzivyo amini, na vikakale vivyo kpwako." Muhenzi kaziwe achihola kahi ya saa iyo. ¹⁴ Jesu Masihi arihofika mudzini kpwa ani Petero, wemona mutsedza wao wa chiche arere na homa. ¹⁵ Jesu achimuguta mukono, homa richimuricha. Naye achilamuka achanza kumu hikirahikira. ¹⁶ Irihofika dziloni, atu mvachimurehera Jesu Masihi akongo anji mvarokala mvatawalwa ni mapepo. Jesu achimvomboza mapepo na akongo achimvahoza. ¹⁷ Kpwa hali iyo, gachitimira maandiko ga Nabii Isaya, "Iye mwenye wegahala makongo gehu na achiga tsukula makongo gehu" ¹⁸ Chisha Jesu ariho ona kusanyiko ra atu vadzimuzunguluka, achomboza maerekezo ga kpwenda ng'ambo injine ya bahari ya Galilaya. ¹⁹ Haho kare, mwandishi mumwenga achimutua na kumwamba, "Mwalimu, nindakutua hohosi undekpwenda." ²⁰ Jesu achimwamba, "Kuro a tsakani mvana maina, na tsongo a angani mvana vitsunzi, ala mwana wa Adamu kana makalo ga kulaza chitswache" ²¹ Mumwenga kahi za anafunzie achimwamba, "Bwana, niruhusu kpwanza nende nikamuzike Paba muvyazi wangu" ²² Ala Jesu achimwamba,"Nitua, richa afadzi mvazikane." ²³ Jesu ariho enjira kpwenye mashua, anafunzie vachimutua kuko. ²⁴ Ghafula, chichidza chikukuzi chikali baharini chasi kpwamba mashua ichifinikpwa ni maimbi. Ala Jesu achikala yurere. ²⁵ Anafunzi mvachimutua vachimulamusa mvachimwamba, "Bwana, hokole, hwafa!" ²⁶ Jesu achimvauza, "Kpwanoni muoga mwi enye imani chache?" Ndiho achilamuka, achichemera chikukuzi baharini. Kuchikala na uhurivu mubomu sana. ²⁷ Anafunzi mvachangalazika mvachamba, "Yuno ni mutu wadze, kala ta peho na bahari zamutii na kutua malakizoge?" ²⁸ Jesu Masihi arihofika upande munjine wa ntsi ya Magadala, alume airi varokala mvatawalwa ni pepo mvachonana naye. Mvekala mvaishi mbirani na enye fujo kuko chasi cha kukala kakuna musafiri andeweza kutsupa na iyo njira ya mbirani. ²⁹ Kpwa haraka mvachipiga kheke mvachamba, "Huna hiro ra kukuhendera Mwana wa Mulungu? Ukudza uhutese kabila siku zehu kufika?" ³⁰ Hehi na haho mvarokala, hekala na kundi bomu sana ra nguluwe mvarisa. ³¹ Mapepo mvachenderera kumurai Jesu Masihi mvachimwamba, "Kala undahu chemera hombole, be huruhusu hende kahi za rira kundi ra nguluwe." ³² Jesu achimvamba, "Endani!" pepo mvachombola mvachishambulia mvo nguluwe na ghafla, nguluwe osi mvachuka malo mvachiteremuka mirima mvachi tsimya baharini mvachifa. ³³ Arisa a nguluwe mvachi chimbira mvariho gona gago. Mvarihofika midzini vacheleza chila chitu chiricho kala kpwa ara alume airi enye mapepo. ³⁴ Mudzi muzima mvachombola mvachenda onana na Jesu. Mvariho mona, vachimuvoya kala amvaukire haho laloni ende zakpwe.