¹ Usichize hukumu, sidze nawe uka hukumiwa. ² Kpwa kukala hukumu iyo uichizayo, nawe unda hukumumiwa nayo. Na kpwa chipimo umupimiracho munzio, nawe undapimirwa chicho. ³ Kpwanoni wone chifusi chiricho dzitsoni mwa munzio, ala usichone chikogo chiricho dzitsoni mwako? ⁴ Wa-anzadze kumwamba munzio, "Hurira nikomboze chifusi mwako dzitsoni." hali chikogo chizima chi dzitsoni mwako? ⁵ Munafiki; omboza kpwanza chikogo chiricho mwako dzitsoni, ili uweze konato, ndiho uweze komboza chifusi chiricho dzitsoni mwa munzio. ⁶ Usimvape kuro chiricho chitakatifu, na usiatsuhire lulu nguluwe mbere zao. Nikpwenda vakafyogafyoga kisha mvaka kugalukira mvaka kukatakata vipande. ⁷ Voya, nawe undapewa. Tafuta, nawe undapata. Bisha, nawe undafugulirwa. ⁸ Kpwa kukala yoyosi avoyaye, nikuhochera. Yoyosi atafutaye, nikupata. Na yoyosi abishaye, andafugulirwa. ⁹ Ama, kunaye kahi yenu mumwenga ambaye mwanawe achimuvoya chipande cha mukahe andamupa iwe? ¹⁰ Ama, mwana achimuvoya samaki ye andamupa nyoka? ¹¹ Kpwa vivyo, ichikala mwimwi adamu murio na dambi mwamanya kuapa ana enu zawadi mbidzo, Je! ni kpwa chasi chani Paba ariye mulunguni andamvapa vitu vidzo mvamuvoyao? ¹² Kpwa vivyo bai, uchimala kuhenderwa chitu chochosi ni anzio, indakulazimu umvahendere dza vivyo nao. Kpwa kukala ndiyo sheria ya manabii. ¹³ Enjirani kuchirira muyango mwembamba. Kpwa kukala, muyango ni mwalamu na njira nayo ninyalamu yangamizayo, na ni anji vaichirirayo njira iyo. ¹⁴ Njira ni nyembamba, yo ilongozayo achache kpwenye uzima, na ni achache vawezao kuyona. ¹⁵ Dzimanyirireni na manabii a ulongo, nikudza mvadzivalia chingo ya ng'onzi ala ndani ni makuro makali ga tsakani. ¹⁶ Kpwa chivyazi chao, munda mvamanya. Je, atu mvaweza kuvuna matunda kahi za miya ama mutini kpwenye mbeyu ya mbaruti? ¹⁷ Kpwa hali iyo, chila muhi mudzo nikuvyala matunda madzo, ala muhi mui nikuvyala matunda mai. ¹⁸ Muhi mudzo kauweza ukavyala matunda mai, wala muhi mui kauweza kuvyala matunda madzo. ¹⁹ Chila muhi usovyala matunda madzo undakatwa utsuhiwe mohoni. ²⁰ Kpwa vivyo, unda mvamanya kpwa matunda gao. ²¹ Si yoyosi anambaye mimi, 'Bwana, Bwana,' andenjira kahi za ufalume wa mulunguni, isokala mvamvo vahendao mahenzo ga Paba Mulungu ariye mulunguni. ²² Anji siku iyo mvandanamba, 'Bwana, Bwana, kahu nenere unabii kpwa dzinaro, kahu chemerere na komboza mapepo kpwa dzinaro, kpwa dzinaro hegahenda manji ga miujiza?' ²³ Ndiho nindihomvamba lwazu, 'Simvamanyire mwimwi! Haukeni muhendao mai!' ²⁴ Kpwa vivyo, chila andesikira maneno gangu, na kugatua anda halana na mutu ariye na hekima arejenga nyumbaye dzulu ya musingi wa iwe. ²⁵ Mvula ichinya, mafuriko gachidza na kukuzi richipiga nyumbaye, ala kaigbwire. Kpwa kukala yekala ijengbwa dzulu ya iwe. ²⁶ Ala chila mutu asikiraye neno rangu na akakosa kuramini, anda halanishwa na mutu mupumbavu ariye jenga nyumbaye dzulu ya mutsanga. ²⁷ Mvula ichidza, mafuriko gachidza, kukuzi richipiga nyumbaye ichigbwa ichibanangika yosi." ²⁸ Jesu ariho marikiza kunena gaga, atu vachangalazwa sana kpwa mafundishoge. ²⁹ Kpwa kukala, wefundisha here mutu ariye na mamulaka ala si here mwandishi wao.