¹ Ririkanani musihende mambo ga hachi mbere za atu ili kudzonyesa, sevyo kamundapata thawabu ya Paba ariye Mulunguni. ² Vivyo bai, uchilavya usipige chinanda na kudzisifu mwenye here anafiki mvahendavyo kahi za masinagogi na kahi za lalo, ili kpwamba atu mvamvasifu. Ujeri namvambira, mvahochera kare thawabu yao mvamvo. ³ Ala uwe ulavyaye, mukonowo wa kumotso usimanye chihendwacho ni mukono wa kulume, ⁴ ili kpwamba zawadiyo yombozwe kpwa siri. Ndiho Pabayo onaye sirini andakupa thawabu ya kpwako. ⁵ Na uvoyaho, usikale here anafiki, kuhenza kpwema na kuvoya kpwenye masinagogi na kpwenye pembe za lalo ili atu mvamvalole. Jeri namvambira, mamvo mvahochera kare thawabu yao. ⁶ Ala uwe, uvoyaho, enjira chumbani. Funga muyango, umuvoye Pabayo ariye sirini. Ndiho Pabayo onaye sirini andakupa thawabuyo. ⁷ Na uvoyaho, usi uyire uyire maneno gasigo kala na maana here mataifa mvahendavyo, kpwa kukala mvafikiria mvandasikika kpwa maneno manji mvaga nenago. ⁸ Kpwa vivyo usikale here ao, kpwa kukala Pabayo wamanya mahitajigo hata kabla uwe kudza gavoya kpwakpwe. ⁹ Vivyo bai voya vivi: 'Paba wehu uriye mulunguni, ripe nguma dzinaro. ¹⁰ Ufalume wa kpwako udze, mahenzogo gahendeke haha urimwenguni here irivyo kuko mulunguni. ¹¹ Hupe rero mukahe wehu wa chila siku. ¹² Uhusamehe madeni gehu, here sisi humvasamehevyo adeni ehu. ¹³ Na usihenjize kahi za majezo, ala uhuchinge na yuyahu mui.' ¹⁴ Ichikala munda mvasamehe anzenu makosa gao Paba yenu ariye mulunguni naye andamvasamehe. ¹⁵ Ala ichikala kamundamvasamehe makosa gao, namwi Paba yenu naye kanda mvasamehe makosa genu. ¹⁶ Kanda na gago, ukalaho kahi za mufungo, usonyese uso wa huzuni here anafiki mvahendavyo, kpwa kukunza nyuso zao ili atu mvamanye kukala mva mufungoni. Jeri namvambira, mvamvo mvahochera kare thawabu yao ¹⁷ Ala uwe, ufungaho, dzihake mafuha chitswani na woge uso. ¹⁸ Vivyo kavinda konyesa mbere za atu kukala ufunga, andemanya ni Pabayo ariye sirini. Na Pabayo akonaye andakupa thawabuyo. ¹⁹ Usidzi ikire hazinayo mwenye haha urimwenguni, ambaho nondo na kutu nikubananga, na evi mvakavunza na kweya. ²⁰ Isokala, dzikireni hazina mulunguni, ambako nondo wala kutu kamvaweza kubananga, na ambako evi kamvaweza kuvunza na kpweya. ²¹ Kpwa kukala hazinayo iriho, ndiho undiho kala moyowo. ²² Taa ra mwiri ni dzitso. Kpwa vivyo, dzitsoro richikala zima, mwiriwo wosi undadzalwa ni mulangaza. ²³ Ala dzitsoro richikala kongo, mwiriwo wosi undadzalwa ni chiza chikali. Sasa bai, ichikala mulangaza wa mwiriwo ni chiza, be chizacho kachindakala ni chibomu! ²⁴ Kakuna hata mumwenga awezaye kuhumikira matajiri airi, kpwa kukala anda muhenza mumwenga asimuhenze yuya munjine, sevyo anda dzomboza kpwa mumwenga na kumudharau yuya munjine. Kamuweza kumu humikira Mulungu na mali. ²⁵ Kpwa vivyo nakpwambira, usikale na wasiwasi dzulu ya maishago, kukala undaryani ama undanwani, ama dzulu ya mwiriwo, undavalani. Je! Maisha kagatsupa chakurya, na mwiri kautsupa mavazi? ²⁶ Mvaloleni tsongo angani. Kamvanyala, wala kamvavuna, wala kamva dziikira chakurya palani, ala Paba yenu wa mulunguni niku mvarisa ao. Mwino je! Kamuna thamani bomu kumvatsupa ao? ²⁷ Ni hiye kahi yenu ariye achidzi yuga waweza kudzonjeza chimo hata diraa mwenga kahi za uhai wa maisha ga kpwakpwe? ²⁸ Na kpwanoni mukale na wasiwasi dzulu ya mavazi? Fikiria dzulu ya malua ga mindani, hali gakulavyo. Kagahenda kazi, wala kagaweza kudzivisha. ²⁹ Ala namvambira, hata Sulemani kahi za fahariye yosi kavishirwe here mwenga raho ra maluwa gaga. ³⁰ Ichikala Mulungu ni kugavika vivi makodza ga mindani, gaonekanago rero, na machero gatsuhiwa kalibuni, je kandazidi sana kumvavisha mwimwi, mwino enye imani tite? ³¹ Musiyugikeni bai, na kudzuza, 'Hundaryani?' ama "Hundanwani?" ama "Hundavalani?" ³² Kpwa kukala gaga gosi Mataifa ni kugatafuta, ala Paba yenu wa mulunguni wamanya mwagamala gago. ³³ Ala utafuteni kpwanza ufalumewe, na hachiye na gago gosi munda gapewa. ³⁴ Kpwa vivyo, musi dziyugeni na ga macha, kpwa kukala macha yadzi tafutira yenye. Chila siku ina matatizo ga pkwakpwe.