¹ Kisha Jesu achilongozwa ni Roho mpaka jangbwani(nyikani) ili ajezwe ni Shetani. ² Arihokala yufunga kpwa siku mirongo minne usiku na mutsana, achigbwirwa ni nzala. ³ Mujezi ibilisi achidza achimwambira, "Ichikala uwe u mwana wa Mulungu, amuru mawe gaga gagaluke mikahe." ⁴ Ala Jesu achimujibu achimwamba, "Yeandikpwa, 'Mutu kandaishi kpwa kurya mukahe hacheye, ala kpwa chila neno rombolaro mulomoni mwa Mulungu." ⁵ Kisha Ibilisi achimuhirika kahi za mudzi mutakatifu achimwika dzulu chirereni cha dzengo ra hekalu, ⁶ achimwamba, "Kala uwe u mwana wa Mulungu, dzitsuhe, kpwa kukala yeandikpwa, 'Anda amuru malaikae mvadze mvakunyake; mvanda kpwenula kpwa mikono yao, ili usidzikpwale chigulucho kahi ya iwe." ⁷ Jesu achimwamba, "Keheri yeandikpwa, 'Usimujeze Bwana Mulunguwo." ⁸ Kisha, ibilisi achimuhala achimuhirika sehemu ya dzulu kutsupa achimonyesa falume zosi za urimwenguni na faharize zosi. ⁹ Achimwamba, "Nindakupa vitu vivi vyosi uchinipigira tu mavindi na kunabudu." ¹⁰ Ndiho Jesu achimwamba, "Hauke hano pepo! Kpwa kukala yeandikpwa, 'Yakupasa kumwabudu Bwana Mulungu hacheye, na kumu humikira iye hacheye.' ¹¹ Ndiho ibilisi ariho muricha, malaika mvachidza mvachi muhumikira. ¹² Jesu ariho sikira kukala Johana agbwirwa na kufungbwa jela, weuka achenda Galilaya. ¹³ Wekulaa Nazareti achenda ishi Kaperanaumu irioko kandakanda ya bahari ya Galilaya, mihakani mwa majimbo ga Zabuloni na Nafutali. ¹⁴ Riri rekala kutimiza chiratu chiricho nenwa ni Nabii Isaya, ¹⁵ "Kahi za mudzi wa Zabuloni na mudzi wa Nafutali, kpwelekea baharini, ng'ambo ya Joridani, Galilaya ya mataifa! ¹⁶ Atu mvario sagala chizani mvadziwona mulangaza munji muno na mvarau mvariokala mvasagala kahi za lalo ra chivuri cha chifo, nuru idzimvang'alira dzulu yao." ¹⁷ Kula na wakati uwo, Jesu weanza kuhubiri na kumvambira, "Tubuni, kpwa kukala ufalume wa Mulunguni uhehi." ¹⁸ Arihokala wenenda kandakanda ya bahari ya Galilaya, wemvaona ndugu airi, Simioni ariyekala achehewa Petero na Andrea nduguye, mvahega nyavu baharini, kpwa kukala ni avuhi a samaki. ¹⁹ Jesu achimvamba, "Nzoni, nituani nami nindamuhenda avuhi a atu." ²⁰ Haho kare mvachiziricha nyavu zao mvachimutua. ²¹ Jesu ariho sengera mbere chidogo, achimvaona ndugu anjine airi, Jakobo mwana wa Zebedayo, na Johana nduguye. Mvekala kahi za mashua hamwenga na Paba yao Zebedayo mvashona nyavu zao. Achimveha, ²² nao mvachiricha mashua na paba yao, mvachimutua. ²³ Jesu ariho kala achizunguluka Galilaya yosi, achifundisha kahi za masinagogi gao achihubiri injili ya ufalume, achihoza chila aina ya maradhi na makongo ga atu. ²⁴ Habari zizo ze-enera Siriya yosi, na atu mvachimurehera atu osi mvariokala mvachilumwa makongo tofauti na mavune, mvariokala na pepo, enye chifafa na mvario holoza. Jesu wemvahoza. ²⁵ Kundi bomu ra atu mvemutua kula Galilaya na Dekapoli na Jerusalemu na Uyahudi na kula ng'ambo ya Joridani.