¹ Siku zizo Johana Mubatizaji wekudza achihubiri kahi za nyika ya Juda kpwa kpwamba, ² "Tubuni kpwa kukala ufalume wa Mulunguni u hehi." ³ Kpwa kukala yuyu ndiye ariye ambwa ni Nabii Isaya achamba, "Sauti ya mutu yeha kula nyikani; 'yikeni tayari njira ya Bwana, ganyosheni machiroge." ⁴ Johana wevala vazi ra mbui za ngamia na ukanda wa chingo chinuni mwakpwe. Chakuryache chichikala nzije na asali mwitu. ⁵ Ndiho Jerusalemu, Juda yosi, na lalo rosi rizungulukaro muho Joridani mvachenda kpwakpwe. ⁶ Mvekala mvachibaputizwa ni iye kahi za muho wa Joridani kuno mvachitubu dambi zao. ⁷ Ariho mvona Mafarisayo na Masadukayo mvadza batizwa kpwa unji, achimvamba, "Mwi chivyazi cha nyoka enye sumu nani ariye mva-ara kuichimbira koro ya Mulungu idzayo? ⁸ Vyalani matunda gasitahiligo toba. ⁹ Wala musiaze mwenu mioyoni, "Kala hunaye Iburahimu paba yehu," kpwa kukala namva ambira Mulungu waweza kumwenulira ana Iburahimu hata kula kpwa gaga mawe. ¹⁰ Tsoka ridzikpwa tayari kahi za masina (mizi) ga mihi. Chila muhi usiwovyala matunda gastahiligo toba, undakatwa na kutsuhiwa mohoni. ¹¹ Namubaputiza kpwa madzi kpwa ajili ya toba. Ala iye adzaye baada ya mimi ni mukulu kuniriko hata sisitahili kutsukula virahuvye. Iye andamva batiza kpwa nguvu za Roho Mutakatifu na kpwa moho. ¹² Na pepetore ri mukononi mwakpwe ili asafishe kabisa uwanjawe na kukusanya ngano palani. Na andaocha wiswa kpwa moho usio weza kuzimika milele. ¹³ Ndiho Jesu achidza kula Galilaya mpaka muho Joridani kubaputizwa ni Johana. ¹⁴ Ala Johana achimala kumukahaza kpwa kumwamba, "Mimi namala kubaputizwa ni uwe, nawe wadza kpwangu?" ¹⁵ Jesu achimujibu, "Ruhusu vikale vivi sasa, kpwa kukala ndivyo ihupasavyo kuitimiza hachi yosi." Kisha Johana achimu ruhusu. ¹⁶ Baada ya kubaputizwa, Jesu achombola madzini, mara mbingu zichifuguka kpwakpwe. Achimona Roho Mutakatifu wa Mulungu achitima here mufano wa gia naye achema dzulu ya chitswache. ¹⁷ Sauti ichombola kula Mulunguni ichamba, "Yuyu ndiye Mwanangu muhenzwi. Nahenzezwa naye."