¹ Baada ya Jesu kuvyalwa mudzi wa Bethelehemu ya Uyahudi wakati wa mufalume Herode, ataalamu a nyenyezi kula mombolero ga dzua ambayo ni ntsi ya kure mvefika Jerusalemu mvachuza; ² "Yuhiko ye adziye vyalwa Mufalume wa Ayahudi? Hweyona nyenyeziye mombolero ga dzua nasi hukudza humwabudu." ³ Mufalume Herode ariho sikira gago, weangalazika, na Jerusalemu yosi hamwenga naye. ⁴ Herode achimva kusanya akulu a makuhani na andishi a atu, achimvauza, "Masihi andamvyalwa hiko?" ⁵ Mvachimujibu, "Mudzi wa Bethelehemu ya Uyahudi, vivyo ndivyo irivyo andikpwa ni Nabii, " ⁶ Nawe Bethelehemu, kahi ya ntsi ii ya Juda, kumutite kahi ya vilongozi a Juda, kpwa kukala kula na kpwako kundombola mutawala andiye arinda atu angu a Israeli." ⁷ Ndiho Herode achimveha ao ataalamu a nyenyezi kumvauza chisiri ni wakati wani hasa mvariho yona yo nyenyezi. ⁸ Achimvahuma Bethelehemu, achimvamba, "Endani kpwa makini mukamu tafute iye mwana adziye vyalwa. Mundiho mona, nireherani habari ili nami niweze kpwenda mwabudu." ⁹ Baada ya kumusikiza mufalume, mvachenderera na safari yao, na iyo nyenyezi mvariokala mvadziyona momborero gadzua yenderera kumvalongoza mpaka irihoema dzulu ya hatu arihokala mwana. ¹⁰ Mvarihoyona iyo nyenyezi, mvachidzalwa ni furaha. ¹¹ Mvenjira nyumbani na mvachimona ye mwana arekala yuvyalwa ni Mariamu. Mvemupigira mavindi mvachimwabudu. Mvachifugula hazina zao na mvachimombozera zawadi za dhahabu, uvumba na manemane. ¹² Mulungu achimva ara kahi za ndoho mvasiuye na kpwa Herode, namvo mvachiuka mvachuya kpwao ntsini kuchirira njira injine. ¹³ Baadaye mvariho kala mvadzuka, malaika wa Bwana achimombolera Josefu kahi za ndoho achimwamba, "Uka, muhale muche na mwana, chimbirani Misiri. Salani kuko mpaka nindiho mvambira, kpwa kukala Herode wamutafuta iye mwana amolage." ¹⁴ Usiku uwo, Josefu achilamuka achimuhala mwana na mameye mvachichimbira Misiri. ¹⁵ Mveishi kuko mpaka Herode arihofa. Ii yetimiza chiratu Bwana aricho kala yunena kuchirira kpwa Nabii kpwamba, " Kula Misiri nidzimweha Mwanangu." ¹⁶ Kisha Herode ariho ona kpwamba yukengbwa ni ataalamu a nyenyezi, wetsikirwa muno. Achilakiza ahoho osi a chilume mvario Bethelehemu na eneo rosi a miaka miri kpwendera tsini mvolagbwe, kulingana na wakati ariwokala adziuthibitisha kpwa uhakika kula kpwa ao ataalamu a nyenyezi. ¹⁷ Ndiho ririho timizwa rira neno ririro nenwa kula kpwa mulomo wa Nabii Jeremia, ¹⁸ "Sauti yesikika Ramah, chiriro na maomborezo mabomu, Raheli achiaririra anae, na achikahala kungolwangolwa, kpwa kukala anae kamvako keheri." ¹⁹ Herode arihofa, malaika wa Bwana achimombolera Josefu ndohoni kuko Misiri achimwamba, ²⁰ Uka umuhale mwana na mameye, muuye ntsi ya Israeli kpwa kukala mvariokala mvachimutafuta kumolaga ye mwana mvefa." ²¹ Josefu achilamuka, achimuhala mwana na mameye mvachiuya ntsi ya Israeli. ²² Ala ariho sikira kukala Arikelau ndiye atawalaye Juda baada ya kufa pabaye Herode, achogoha kuuya kuko. Baada ya Mulungu kumwara kahi za ndoho, weuka achenda mukoa wa Galilaya ²³ na achenda ishi mudzi wehewao Nazareti. Richitimira neno ra Manabii, kpwamba dzinare andehewa Munazareti.