¹ Chitabu cha lukolo lwa Jesu Masihi, Mwana wa Daudi, Mwana wa Ibrahimu. ² Ibrahimu wekala pabaye Isaka, Isaka achikala pabaye Jakobu, Jakobu pabaye Juda na nduguze. ³ Juda wekala Pabaye Peresi na Sera kpwa Tamari, Peresi pabaye Hezironi na Hezironi pabaye Ramu. ⁴ Ramu wekala muvyazi wa Aminadabu, Aminadabu muvyazi wa Nashoni, na Nashoni muvyazi wa Salimoni. ⁵ Salimoni wekala pabaye Boazi ariye muvyala na Rahabu (mameye), Boazi pabaye Obedi ariye muvyala na Ruthi, Obedi ni pabaye Jese. ⁶ Jese wekala pabaye mufalume Daudi. Daudi wekala pabaye Selemani ariye muvyala na mukaza Uriya. ⁷ Selemani wekala pabaye Rehoboamu, Rehoboamu ni pabaye Abiya, Abiya ni pabaye Asa. ⁸ Asa wekala pabaye Jehoshafati, Jehoshafati ni pabaye Joramu, na Joramu ni pabaye Uziya. ⁹ Uziya wekala pabaye Jothamu, Jothamu ni pabaye Ahazi, Ahazi ni pabaye Hezekia. ¹⁰ Hezekia wekala pabaye Manase, Manase ni pabaye Amoni na Amoni ni pabaye Josia. ¹¹ Josia wekala pabaye Jekonia na nduguze wakati mvarihohalwa kpwenda Babeli. ¹² Baada ya kuhalwa mateka kpwenda Babeli, Jekonia wekala ni pabaye Shatieli, Shatieli wekala tsaweye Zerubabeli. ¹³ Zerubabeli wekala pabaye Abiudi, Abiudi ni pabaye Eliakimu, na Eliakimu ni pabaye Azori. ¹⁴ Azori wekala pabaye Zadoki, Zadoki ni pabaye Akimu, na Akimu ni pabaye Eliudi. ¹⁵ Eliudi wekala pabaye Elieza, Elieza naye pabaye Matani na Matani ni pabaye Jakobu. ¹⁶ Jakobu wekala pabaye Josefu mulume wa Mariamu, ambaye ni mameye Jesu Masihi. ¹⁷ Vivyazi vyosi hangu Ibrahimu mpaka Daudi vyekala kumi na vinne, kpwanzira Daudi mpaka kuhalwa kpwenda Babeli vyekala vivyazi kumi na vinne, na kuhalwa kpwenda Babeli kpwanzira Masihi vyekala vivyazi kumi na vinne. ¹⁸ Kuvyalwa kpwa Jesu Masihi kpwekala kpwa namuna ii; Mameye, Mariamu wechumbiwa ni Josefu, ala kabla kamvadza onana chimwiri, wegundua kukala ana mimba kula kpwa nguvu za Roho Mutakatifu. ¹⁹ Ala Josefu, mulumewe, wekala mutu wa hachi na kahenzere gamanyikane lwazu kukala wamala kumuricha. Wemala kumuricha chisiri. ²⁰ Ariho kala kahi za maazo dzulu ya mambo gago, malaika wa Bwana achimombolera kahi za ndoho, achimwamba, "Josefu mwana wa Daudi, usogohe kumuhala Mariamu here mucheo kpwa kukala mimba ariyo nayo ni kpwa uweza wa Roho Mutakatifu. ²¹ Mucheo andadzifugula mwana wa chilume naye undamweha Jesu, kpwa kukala andamvokola atue dambi zao." ²² Gosi gaga geombolera kutimiza chiratu chiricho nenwa ni Bwana kpwa njira ya Nabii, achamba, ²³ "Lola, Mwanamwali (bikira) andagbwira mimba na kuvyala mwana wa chilume na mvandamweha dzinare; Imaniueli"-maanaye ni "Mulungu hamwenga nasi" ²⁴ Josefu achilamuka kula usinzizini achitua malakizo ga malaika arigo mupa, achimuhala Mariamu here muchewe. ²⁵ Ala kamumanyire mpaka ariho dzifugula mwana wa chilume. Achimuhadza Jesu.