¹ Kurihocha, abomu a makuhani osi na vilongozi a atu mvachipanga mvandivyo molaga Jesu. ² Mvachimufunga, mvachimulongoza kpwenda kpwa Pilato mukulu wa Mukoa. ³ Ndiho Judasi, ariye musaliti, ariho ona kpwamba Jesu ahukumiwa, achitubu na achudzya pesa arizopewa kpwa makuhani abomu na vilongozi, ⁴ achimvamba, "Nidzihenda dambi kpwa kusaliti damu isiyokala na hatiya." Ala mvachimwamba, "Vyo be ni noni kpwehu? Undamanya mwenye." ⁵ Achizitsuhatsi zo pesa mumo hekaluni, achombola, achenda dzifunga lugbwe achifa. ⁶ Abomu a makuhani mvachihala zo pesa mvachamba, "Si halali kuzitsanganya zizi pesa hamwenga na sadaka kpwa kukala ni garama ya mulatso wa mutu." ⁷ Baada ya kujadiliana, mvachelewana, kuzihumira zizo pesa kugula munda wa mutengeza vyungu ili ikale hatu ha makaburi ga kuzikira ajeni. ⁸ Kpwa vivyo, haho hatu hachehewa "Munda wa mulatso" mpaka rero ii. ⁹ Ndiho maandiko ga nabii gariho timira, kpwamba, "Mvehala vyo vipande mirongo mihahu vya fedha, garama iroikpwa dzulu ya maishage ni ana a Israeli, ¹⁰ mvachizilavya kpwa mutengeza vyungu, here Bwana arivyo nerekeza." ¹¹ Sasa, Jesu achema mbere za Pilato, Pilato achimuza, "We ndiwe mufalume wa Ayahudi?" Jesu achimujibu, "Unena." ¹² Ala ariho ikirwa mashitaka ga ulongo ni makuhani abomu na vilongozi, kajibire chitu. ¹³ Ndiho Pilato achimuza, "Yaani kusikira go mashitaka gosi mvakushitakirago?" ¹⁴ Ala kajibire hata neno mwenga, hata mubomu wa mukoa achisala yudzangalazika. ¹⁵ Sasa, kahi za sherehe za chiyahudi, yekala ni mila mubomu wa mukoa kurichira huru muhalifu mumwenga andiye tsagulwa ni kundi ra atu. ¹⁶ Wakati uwo mvekala mvana jambazi mumwenga mufungbwa arekala achehewa Jesu Baraba.(Vitabu vinji vya kapindi kavina dzina Jesu kpwa Baraba) ¹⁷ Sasa mvarihokala mvakusanyana hamwenga, Pilato achimvauza, "Mundehenza nimvarichire hiye? Baraba, ama Jesu ehewaye Masihi?" ¹⁸ Wemanya mvekala mvadzimufisha Jesu kpwakpwe kpwa wivu tu. ¹⁹ Arihokala bado achere segere kahi za chihi cha hukumu, muchewe wemuhumira ujumbe achimwamba, "Richana na iye mutu asiye na hatia yoyosi. Kpwa kukala nidziyugika sana rero kpwa ndoho niriyo iloha dzuluye." ²⁰ Makuhani abomu na vilongozi mvachishurutisha atu kukala mvamumale Baraba arichirwe ala Jesu ahukumiwe kolagbwa. ²¹ Mubomu wa mukoa achimvauza, "Kahi ya ano airi mwamala hiye nimurichire akale huru?" mvachijibu, "Baraba." ²² Pilato achimvauza, "Na yuno Jesu ehewaye Masihi nimuhendedze?" Mvachimujibu, "Musulubishe!" ²³ Ndiho achimvauza, "Kpwa noni, ahendadze chibomu?" Ala mvachipiga kululu za kutsupa, "Musulubishe!" ²⁴ Sasa Pilato ariho ona kukala kapata njira yoyosi kumusaidia Jesu, hata vurugu raanza, achihala madzi, achoga mikono mbere ya kundi ra atu, achimvamba,"Sina hatia dzulu ya mulatso wa yuyu mutu. Munda galola mwimwi." ²⁵ Atu mvosi mvachamba, "Mulatsowe naukale dzulu yehu na ana ehu." ²⁶ Achimvarichira Baraba, ala achimvapa Jesu mvaka musulubishe. ²⁷ Ndiho shikari a mubomu wa mukoa mvachimuhala Jesu mvachimuhirika makalo makulu ga serikali na mvachikusanya shikari osi. ²⁸ Mvachimuvula nguo mvachimuvisha kanzu tune. ²⁹ Mvachimutengezera kofia ya miya mvachimuvisha chitswani, na mvachimugbwiza bakora ya mwanzi mukonowe wa kulume. Mvachipiga mavindi mbereze kumumvurya, mvachimwamba, "Salamu za heshima mufalume wa Ayahudi!" ³⁰ Mvachimutsitsira mahe, mvachimuhoka iyo fimbo ya mwanzi na mvachimupiga chitswani. ³¹ Baada ya kumumvurya, mvachimuvula yo kanzu mvachimuvisha nguoze, halafu mvachimulongoza njira ya kpwenda sulubiwa. ³² Mvariho ombola, mvachonana na mutu wa Kirene ariye ehewa Simioni, mvariye mulazimisha kpwenda hamwenga nao ili amvasaidie kpwereka musalaba. ³³ Mvachifika hatu hehewa Goligota, tafusiriye ni, "Fuvu ra chitswa." ³⁴ Mvachimupa sichi rirotsanganywa na nyongo anwe. Ala ariho ritata, richimushinda. ³⁵ Baada ya kumusulubisha, mvachigavya mavazige kpwa kuzipigira kura. ³⁶ na mvachisagala mvachimurinda. ³⁷ Dzulu ya chitswache, mvachiika hukumu mvario ichiza kpwakpwe, ichamba, "Yuyu ni Jesu, mufalume wa Ayahudi." ³⁸ Evi airi mvekala mvasulubiwa hamwenga naye, mumwenga mukono wa kulume munjine mukono kumotso. ³⁹ Mvariotsupa na haho mvemuhukana, kuno mvasumbisha vitswa ⁴⁰ mvachamba, "Uwe urekala uvunze hekalu na urijenge kahi za siku tahu, dzokole! Ichikala u mwana wa Mulungu, tima kula ho musalabani!" ⁴¹ Hali iyo, makuhani abomu mvekala kahi za mvario mumvurya, hamwenga na andishi na vilongozi, mvachamba, ⁴² "Weokola anji, ala kaweza kudzokola mwenye. Ni mufalume wa Israeli. Na atime kula musalabani, ndiho hundamwamini. ⁴³ Wemwamini Mulungu, Mulungu na amokole sasa. Kpwa kukala ta weamba, 'Mimi ni Mwana wa Mulungu.'" ⁴⁴ Hali iyo mwenga, evi mvarokala mvasulubishwa hamwenga naye mvachimumvurya. ⁴⁵ Sasa kula kpwa saa ya handahu, chiza chichitanda ntsi yosi mpaka saa ya chenda. ⁴⁶ Wakati wa saa ya chenda, Jesu achirira kpwa sauti bomu sana achamba, "Eloi, Eloi, lama sabakithani?" tafusiriye ni, "Mulungu wangu, Mulungu wangu, mbona udziniricha?" ⁴⁷ Mvariokala mvadzema haho hehi naye mvariho sikira, mvachamba, "Wamweha Eliya." ⁴⁸ Mumwenga waho achuka malo achenda hala sponji, achi-idzaza uchi mukali, achiuchiza kahi za mwanzi, achimupa anwe. ⁴⁹ Anjine mvo mvachamba, "Muriche. Richa hulole kala Eliyah andadza mokola." ⁵⁰ Ndiho Jesu achirira keheri kpwa sauti bomu achi-ilavya rohoye. ⁵¹ Lola, pazia ya hekalu ichigavika mara mbiri kula dzulu mpaka tsini, dunia nayo ichisumba, na miamba ya mawe ichigavika mara mbiri. ⁵² Mbira zichi fuguka, miri ya atu mvarofa ichifufulwa. ⁵³ Mveombola mbirani baada ya ufufulowe, mvachenjira mudzi mutakatifu, na mvachonewa ni anji. ⁵⁴ Sasa, Jemedari mumwenga na mvariokala mvachimulola Jesu mvariho ona kusumba kpwa ntsi na go garigo hendeka, mvachogoha sana mvachamba, "Ni jeri, yuyu wekala Mwana wa Mulungu." ⁵⁵ Anache anji mvariokala mvamutua Jesu kula Galilaya kumuhudumia mahitajige mvekala mvahaho mvalola kula havuhe. ⁵⁶ Hamwenga namvo, wekala ni Maria Magdalena, Maria mameye Jakobu na Josefu, na mameye ana a Zebedayo. ⁵⁷ Kurihotswa, achidza mutu tajiri kula Arimatheyo, dzinare ni Josefu, ambaye pia wekala mwanafunzi wa Jesu. ⁵⁸ Wemutua Pilato achimuvoya kukala apewe mwiri wa Jesu. Pilato achilakiza kukala aupewe. ⁵⁹ Josefu achiuhala wo mwiri, achiufungato kahi ya nguo safi, ⁶⁰ achiulaza kpwenye mbira mbisha ariyokala mwenye adzi-ikata kahi za mawe. Halafu achi-ifinika na iwe bomu muyangoni achuka. ⁶¹ Maria Magdalena na Maria yuya munjine mvekala haho, mvasegere upande wa kulolera mbirani. ⁶² Siku ya hiri, iriyokala ndiyo siku baada ya matayarisho, makuhani abomu na mafarisayo mvachikusanyana hamwenga na Pilato. ⁶³ Mvachimwamba, "Bwana, hakumbuka wakati yuyatu mulongo arihokala yu moyo, weamba, 'Baada ya siku tahu nindafufuka.' ⁶⁴ Kpwa vivyo amuru mbiraye ikale tsini ya urinzi mpaka siku ya hahu, bila vivyo anafunzie mvaweza mvakadza mvakamweya kisha mvaka-ambira atu, 'Afufuka kula kpwa afu,' na ulongo wa mwisho be undakala mui kutsupa wo wa kpwanza." ⁶⁵ Pilato achimvamba, " Halani murinzi. Endani mukahakikishe hana urinzi mukali here muwezavyo." ⁶⁶ Kpwa vivyo mvachenda na mvachihakikisha mbirani hana urinzi, mvachifinika na iwe na mvachika arinzi.