¹ Irihotsupa siku ya sabato, kpwa dzua rekala ratswa, siku ya kpwanza ya wiki, Maria Magdalena na Maria yuya munjine mvachenda mbirani. ² Ntsi ichisumba muno, kpwa kukala malaika wa Bwana wetima kula mulunguni, achiri pingilisa ro iwe rirokala rizia yo mbira ya Jesu achirisagalira. ³ Usowe weng'ala mulangaza mukali na nguoze zekala nyeruhe here theluji. ⁴ Shikari mvaroikpwa mvevinwa ni miri kpwa woga na mvachilala here atu a kufa. ⁵ Malaika achimvanenera mvo anache achimvamba, "Musogoheni, kpwa kukala namanya mwamutafuta Jesu, ariye sulubiwa. ⁶ Kaho haha, afufuka, here arivyoamba iye mwenye. Nzoni mulole ho hatu mvariho ulaza mwiriwe. ⁷ Endani haraka mukamvambire anafunzie, 'Afufuka kula kpwa afu. Lolani, atangulia mbere zenu akpwenda Galilaya. Kuko ndiko mundiko mona.' Lolani, nidzimvambira." ⁸ Anache upesi sana mvachikulaa malo mbirani kpwa woga na raha, malo mvachenda mvambira anafunzie. ⁹ Njirani, Jesu achonana namvo achimvalamusa, "Salaam?!" Mvachimutua Jesu, mvachimugbwerera maguluni mvachimwabudu. ¹⁰ Ndiho Jesu achimvamba, "Musogoheni. Endani mukamvambire ndugu zangu mvanitue Galilaya. Mvandanona kuko." ¹¹ Sasa mvariho kala mvenenda, sehemu ya arinzi a mbirani mvachenda mpaka mudzini mvachimvambira abomu a makuhani mambo gosi mvarigo gona. ¹² Makuhani mvariho onana na vilongozi a hekalu, na kusumurira mambo gago, mvachimvapa ao shikari pesa nyinji sana ¹³ na mvachimvamba, "Mvambireni anjine, 'Anafunzi a Jesu mvekudza usiku mvachiweya o mwiri huriho kala hurere.' ¹⁴ Ujumbe uu uchimufikira chilongozi wa mukoa, hundamushawishi, mwimwi musihende wasiwasi." ¹⁵ Sasa shikari mvachihala zo pesa na mvachihenda here mvarivyo lakizwa. Ujumbe uu we-enera sana kahi za Ayahudi na hata mpaka rero ii wenderera. ¹⁶ Ala mvara anafunzi kumi na mumwenga mvachenda Galilaya, kahi za murima ambawo Jesu wekala adzimva erekeza. ¹⁷ Mvariho mona, mvachimwabudu, ala anjine kamvaminire. ¹⁸ Jesu achimvatua achinena namvo achimvambira, "Nipewa Mamulaka dzulu ya mulunguni na urimwenguni. ¹⁹ Endani bee mukahende mataifa gosini mvakale anafunzi. Mvabatizeni kpwa dzina ra Paba, na ra Mwana na ra Roho Mutakatifu. ²⁰ Mvafundisheni mvaheshimu mambo gosi ambago nemvalakiza. Lolani, ni hamwenga namwi wakati wosi, hata mwisho wa dunia."