¹ Wakati Jesu arihomarikiza kunena, achimvamba anafunzie, ² "Mwamanya kukala baada ya siku mbiri sikukuu ya pasaka indakala ifika, na Mwana wa Adamu andalaviwa olagbwe." ³ Ndiho, akulu a makuhani na vilongozi mvachonana kpwa kuhani mukulu, ariye ehewa Kayafa. ⁴ Mvachipanga hamwenga kumugbwira Jesu chisiri na kumolaga. ⁵ Kpwa kukala mvekala mvamba, " Husivihende wakati wa sherehe, ili kusizuke fujo kahi za atu." ⁶ Sasa, Jesu arihokala bado yuchere Bethania kahi za nyumba ya Simioni mwenye mahana, ⁷ arihokala adzidzigoloza mezani, mwanamuche mumwenga achidza kpwakpwe yutsukula jagi ra mafuha ga thamani ya gali muno, achimumwagira chitswani. ⁸ Ala anafunzie mvariho ona vivyo, mvachitsikirwa mvachamba, "Chausa cha kpwangamiza mafuha gali vino ni noni? ⁹ Mafuha gaga gandekuzwa kpwa bei ya dzulu sana na pesa zikapewa achiya." ¹⁰ Ala Jesu, arihomanya vivyo, achimvamba, "Mbona mwamuyuga yuno mwanamuche? Kpwa kukala yuhenda chitu chidzo sana kpwangu. ¹¹ Siku zosi munamvo ao achiya, ala si siku zosi mundakala hamwenga nami. ¹² Kpwa kukala adziho nimwagira mafuha gaga mwirini, yuhenda vivyo kpwa mazikpwa gangu. ¹³ Ujeri namvambira, kosi kuriko Injili ii indafika urimwenguni, chidzicho hendwa ni mwanamuche yuyu chindanenwa kpwa kumukumbuka." ¹⁴ Ndiho mumwenga wa ara kumi na airi, ariye ehewa Judasi Isikariote, achenda kpwa makuhani abomu ¹⁵ achimvamba, "Mundanipani nichimwenjiza mwenu mikononi?" Mvachimupimira vihande mirongo mihahu vya fedha mvachimupa. ¹⁶ Kula wakati uwo, Judasi achitafuta nafasi kumusaliti Jesu. ¹⁷ Sasa, siku ya kpwanza ya mikahe isiyo enjizwa tsatsu, anafunzie mvachimutua Jesu mvachimwamba, "Wamala hukatayarishe pasaka hiko?" ¹⁸ Achamba, "Enjirani mudzini kpwa mutu fulani na mumwambe, 'Mwalimu yudzamba, "Wakati wangu ufika. Nindaitimiza pasaka hamwenga na anafunzi angu mwako nyumbani." ¹⁹ Anafunzi mvachihenda here mvarivyo longozwa, nao mvachitayarisha chakurya cha pasaka. ²⁰ Dzulo ririhofika, achisagala kurya hamwenga na anafunzie. ²¹ Mvarihokala mvarya, Jesu achamba, "Ujeri namvambira, mumwenga wenu andanisaliti." ²² Mvachigbwirwa ni huzuni bomu, chila mutu achanza kumuza, "Si mimi, Bwana?" ²³ Achimvajibu, "Iye ambaye andenjiza mukonowe sawa nami kahi za bakuli mwenga ndiye andenisaliti. ²⁴ Mwana wa Adamu andenda, here irivyo andikpwa dzuluye. Ala, shakare iye andemusaliti! Indekalato iye mutu kandevyalwa." ²⁵ Judasi, ariye musaliti achuza, "Je ndimi, Mwalimu?" Jesu achimwamba, "Udzinena mwenye." ²⁶ Hali mvachirya, Jesu achihala mukahe, achiubariki, kisha achiumega. Achimvapa anafunzie achimvamba, "Halani, murye. Uu ndiwo mwiri wangu." ²⁷ Achihala chikombe achilavya mumvera, kisha achimvapa achimvamba, "Nwani, mosini. ²⁸ Kpwa kukala ii ni damu ya malagano ambayo yamwagbwa kpwa anji kpwa musamaha wa dambi. ²⁹ Ala namvambira, sindanwa keheri matunda ga muzabibu uu, mpaka iyo siku nindiho nwa keheri lusha namwi kahi za ufalume wa Paba." ³⁰ Baada ya kpwemba, mvachombola mvachenda murima wa mizeituni. ³¹ Ndiho Jesu achimvamba, "Mosini mundatawanyika usiku wa rero kpwa ajili yangu, kpwa kukala yeandikpwa,' Nindamupiga murisa, namvo ng'onzi osi mvandatapanyika.' ³² Ala baada ya mimi kufufulwa, nindamva tangulia Galilaya." ³³ Ala Petero achimwamba, "Hata chamba osini mvandatapanyika kpwa uwe Bwana, mino nindasala." ³⁴ Jesu achimwamba, "Ujeri nakpwambira, usiku uu wa rero, kabla jogolo ri-ike, undakala udzinikana mara tahu." ³⁵ Petero achimwamba, "Hata kala nikufa nawe, Bwana sindakukana." Anafunzi anjine mvosi mvachamba vivyo. ³⁶ Halafu Jesu achenda namvo hatu hehewaho Gethisemane achimvamba anafunzie, "Sagalani haha nenda kanda nikavoye." ³⁷ Achimuhala Petero na mvara ana airi a Zebedayo achanza kpwenjirwa ni kusononeka na kuyugikpwa akilini. ³⁸ Halafu achimvamba, "Moyo wangu una huzuni bomu sana, hata kufa. Salani haha muchese hamwenga nami." ³⁹ Achisengera mbere zaidi, achilalira usowe, achivoya. Achamba, "Paba, kala yawezekana, nusira chikombe chichi. Ala, isikale ni kpwa kuhenza kpwangu mimi, ikale kpwa kuhenzako mwenye." ⁴⁰ Achuya kpwa anafunzie achimvapata mvarere, achimwambira Petero "Kpwanoni kamuwezere kukala matso ta risaa rimwenga? ⁴¹ Chesani na mavoyo, kpwamba musenjire kahi za majezo. Roho yahenza ni jeri, ala mwiri ni munyonge." ⁴² Achuka keheri mara ya hiri achivoya. Achamba, "Paba, ichikala chikombe chichi kachiweza kunitsupa mpaka nichinwe, mahenzogo nagatimire." ⁴³ Achuya keheri achimvapata anafunzie mvarere, kpwa kukala matso gao gekala ni maziho muno. ⁴⁴ Achimvaricha keheri, achenda voya mara ya hahu, manenoge gachikala gago. ⁴⁵ Halafu Jesu achuya kpwa anafunzie achimvamba, "Bado muchere rere mwaoya? Lolani, wakati ufika, Mwana wa Adamu wasalitiwa mikononi mwa enye dambi. ⁴⁶ Lamukani, hendeni. Lolani, musaliti wangu yuhehi." ⁴⁷ Hali yuchere kunena, Judasi, mumwenga wa ara kumi na airi, achidza. Kundi ra atu mvachi mutua kula kpwa makuhani abomu na vilongozi a atu. Mvekudza na mapanga na marungu. ⁴⁸ Sasa, ariye kala wamusaliti Jesu wekala amvapa ishara achimvamba "Iye nindiye mubusu ndeye, mugbwireni." ⁴⁹ Mara tu arihofika kpwa Jesu, achamba, "Nakulamusa, Mwalimu!" achimubusu. ⁵⁰ Jesu achimwamba, "Musena, henda vyo udzivyokudza henda." Mvachidza, mvachimugwira, mvachenda naye. ⁵¹ Mumwenga wa mvo mvariokala na Jesu achigoloza mukono, achomboza chifyu, achimukata mutumishi wa kuhani Mubomu sikiro. ⁵² Jesu achimwamba, "Udzya cho chifyu, kpwa kukala mvosi mvahumirao vifyu mvandafa kpwa vifyu. ⁵³ Wafikiria siweza kumweha Paba, naye akanihumira makundi kutsupa kumi na mairi ga malaika? ⁵⁴ Ala je, maandiko gandetimiradze? Ni gaga gahendeke. ⁵⁵ Wakati uwo, Jesu achimvambira mvo kundi ra atu, "Mukudza na mapanga na marungu kudza nigbwira here ni mwevi? Chila siku nesagala nichimvafundisha hekaluni, kamunigbwirire. ⁵⁶ Ala gaga gahendeka ili maandiko ga manabii gatimire." Anafunzie mvachimuricha mvachichimbira. ⁵⁷ Mvamvo mvario mugbwira Jesu mvachimulongoza kpwa Kayafa kuhani mukulu, haho andishi na vilongozi anjine mvekala mvakusanyika. ⁵⁸ Ala Petero wemutua nyumanyuma mpaka kpwenye muhala wa kuhani mubomu. Achenjira ndani naye achisagala hamwenga namvo ili alole chindicho hendeka. ⁵⁹ Sasa makuhani abomu na anjine mvosi mvekala mvatafuta ushahidi wa ulongo kumuhusu Jesu ili mvamolage. ⁶⁰ Kamvapatire chochosi, idzaho mashahidi a ulongo anji mvedzombozera. Ala baadaye, airi mvachombolera ⁶¹ mvachamba, "Yuyu mwanamulume weamba, 'Nina uwezo wa kuvunza hekalu riri ra Mulungu na nirijenge kpwa siku tahu." ⁶² Kuhani mubomu achema achimwamba, "Kuna jibu ra kulavya? Ni ushuhuda wani uno unenwao dzuluyo?" ⁶³ Ala Jesu wenyamala. Kuhani mubomu achimwamba, "Nakwamuru kpwa dzina ra Mulungu aishiye, hambire kala ndiwe Masihi, Mwana wa Mulungu." ⁶⁴ Jesu achimujibu, "Udziganena uwe mwenye gago. Ala nakpwambira, kula wakati uu undamona Mwana wa Adamu yusegere mukono wa kulume wa ufalume achidza kpwenye maingu ga mulunguni." ⁶⁵ Kuhani mubomu achitarura vazire achamba, "Adzinena kufuru! Hangoja mashahidi anoni keheri? Lolani, sasa mudzisikira enye kufuru. ⁶⁶ Mwa-azani?" Mvachijibu mvachamba, "Chifo ni hachiye." ⁶⁷ Ndiho mvachimutsitsira mahe usoni na mvachimupiga ngumi, anjine mvachimupiga makofi ⁶⁸ mvachimuvurya mvachimwamba, "Hupe unabii, we Masihi. Adzekupiga ni hiye?" ⁶⁹ Sasa Petero achikala asegere nze ya muhala, chijakazi mumwenga achimutua achimwamba, "Mwekala hamwenga na Jesu wa Galilaya." ⁷⁰ Ala Jesu achikana mbere zao mvosi, achamba, "Simanya wanenani." ⁷¹ Ariho ombola sehemu za lango, chijakazi munjine achimona achimvambira mvariokala hehi naye, "Yuyu mwanamulume wekala hamwenga na Jesu wa Nazareti." ⁷² Achikana keheri achirya chiraho, "Simumanya mutu iye mino!" ⁷³ Baada ya muda mufuhi, mvariokala mvadzema hehi mvachimwamba Petero, "Hakika u mumwenga wao uwe, kpwa kukala hata vyo unenavyo vyakusaliti." ⁷⁴ Petero achikpwatya kulaani na kulaha, "Simumanya mino iye," mara jogolo richi-ika. ⁷⁵ Petero wekumbuka maneno ambago Jesu wekala yunena achamba, "Kabla jogolo ri-ike undakala unikana mara tahu." Achombola nze achenda rira kpwa utsungu.