¹ Ndiho ufalume wa mulunguni undahalanishwa na anamwali kumi mvarohala taa zao kpwenda onana na mulume. ² Atsano ao mvachikala ajinga na atsano mvachikala enye hekima. ³ Kpwa kukala mvara anamwali ajinga mvariho hala taa zao, kamvatsukulire mafuha. ⁴ Ala mvara enye hekima, mvachitsukula mafuha vyomboni. ⁵ Sasa, mulume ariho chelewa kufika, mvosi mvachinyekererwa mvachilala. ⁶ Usiku wa manane kuchisikika njerejere, 'Lamukani, muharusi yufika! Ombolani mukamutsangire.' ⁷ Ndiho anamwali osi mvachilamuka mvachasha taa zao. ⁸ Mvara ajinga mvachiambira mvara enye hekima, 'Hupeni mafuha chidogo kpwa kukala taa zehu zazimika.' ⁹ Ala mvara enye hekima mvachiajibu mvachiamba, "Kpwa kukala kahuna mafuha gakuhutosha sisi na mwimwi, endani kpwa akuzaji a mafuha mukagule.' ¹⁰ Mvariho ombola kpwenda gula mafuha, mulume achifika, mvario kala tayari mvachenda kahi za sherehe ya ndoa, muyango uchifungbwa. ¹¹ Baada ya haho, mvara anamwali anjine mvachifika, mvacheha, 'Bwana, Bwana, hufugulire.' ¹² Ala achimvajibu achimvamba, ' Ujeri namvambira, simvamanya mino.' ¹³ Kalani matso bai, kpwa kukala kamumanya siku wala saa. ¹⁴ Kpwa kukala ni here mutu mumwenga arihomala kpwenda ntsi injine. Wemveha ahenzi kazie achimvapa maliye. ¹⁵ Mumwenga achimupa talanta tsano, mumwenga achimupa mbiri, na munjine achimupa talanta mwenga. Chila mumwenga wepewa kulingana na uwezowe, kisha mwenye mali achenda safarize. ¹⁶ Yuya ariye hochera talanta tsano achenda achizihendera kazi achipata zinjine tsano. ¹⁷ Hali iyo mwenga, ariye pewa talanta mbiri naye achenda achipata zinjine mbiri. ¹⁸ Ala yuya arehochera talanta mwenga, wekpwenda achitsimba wina mutsangani, achifitsa iyo talanta. ¹⁹ Sasa, baada ya muda mure yuya tajiri achuya kuhenda hesabu na ahenzi kazie. ²⁰ Yuya arehochera talanta tsano, achimutua achimonjeza talanta tsano zinjine. Achimwamba, 'Bwana, wenipa talanta tsano. Lola, nipata zinjine tsano.' ²¹ Tajiri achimwamba, 'Hongera, muhenzi kazi mudzo, mwaminifu! Ukala mwaminifu kpwa vichache. Nindakupa mamulaka dzulu ya vinji. Enjira kahi za furaha ya tajiriwo.' ²² Muhenzi kazi ariye hochera talanta mbiri naye achifika achimwamba, 'Bwana, wenipa talanta mbiri. Lola, nipata zinjine mbiri.' ²³ Tajiriwe achimwamba, 'Kazi mbidzo, muhenzi kazi mudzo na mwaminifu!' Ukala mwaminifu kpwa vichache. Nindakupa mamulaka dzulu ya vitu vinji. Enjira kahi za raha ya tajiriwo.' ²⁴ Halafu achidza yuya muhenzi kazi ariye hochera talanta mwenga achimwamba, "Bwana, Namanya u mutu mufu. Wavuna usiho nyala na wakusanya usiho tapanya. ²⁵ Neogoha mino, kpwa vivyo nichenda nichi-ifitsa yo talantayo mwenga mutsangani. Lola, talantayo mwenga ti-ino.' ²⁶ Ala tajiriwe achimujibu achimwamba, 'Uwe u muhenzi kazi mui na mukaha, wemanya kukala mimi navuna nisiho nyala, na nakusanya nisiho tapanya. ²⁷ Kpwa vivyo undekala wehirika pesa zangu kpwa enye bengi, wakati nauya nindezipata na faida dzulu. ²⁸ Kpwa vivyo muhokeni iyo talanta mumupe iye ariye na kumi. ²⁹ Kpwa kukala ariye na nyinji ndiye andiye onjezwa, akale na nyinji zaidi. Ala ariye kana chitu, hata chichache aricho nacho andahokpwa. ³⁰ Mutsuheni nze iye muhenzi kazi asiye na faida chizani, kundiko kala na viriro na kuluma meno." ³¹ Mwana wa Adamu andiho kudza na utukufuwe hamwenga na malaikae, ndiho andasagala kahi za chihiche cha enzi chricho na utukufu. ³² Mbereze mvandakusanywa mataifa gosi, naye andatenganisha atu, here murisa atenganishavyo ng'onzi na mbuzi. ³³ Andaika ng'onzi mukonowe wa kulume, ala mbuzi andamvaika mukonowe wa kumotso. ³⁴ Halafu mufalume andamvambira mvario mukono wa kulume, 'Nzoni, mwi mudzio haswa ni Paba, rithini ufalume uriwo tayarishwa kpwenu kula hangu urimwengu wumbwe. ³⁵ Kpwa kukala nekala nina nzala muchinirisa; Nekala nina chihu muchinineswa; Nekala mujeni, muchinihochera; ³⁶ Nekala nihuhu muchinivisha nguo; Nekala ni mukongo muchinirarisi; Nekala mufungbwa jela muchidzanibisha.' ³⁷ Ndiho atakatifu mvandajibu mvambe, "Bwana, ni rini huriho kona una nzala huchikurisa? Ama una chihu huchikuneswa? ³⁸ Ni rini hurekona umujeni huchikuhochera? Ama uhuhu ala huchikuvisha? ³⁹ Ni rini hurekona walumwa ama u jela huchidza kubisha?' ⁴⁰ "Ndiho mufalume andajibu amvambe, 'Ujeri namvambira, chila muricho ahendera yoyosi kahi za mvamva ndugu zangu atite, wenihendera mimi.' ⁴¹ Kisha andamvambira mvario mukono wa kumotso, "Haukeni, mwi murio laaniwa, enjirani kahi za moho wa milele uriwo tayarishirwa shetani na malaikae, ⁴² Kpwa kukala nekala nina nzala, kamunirisire; Nekala na chihu, kamunineswere; ⁴³ Nekala mujeni wenu, kamunihocherere; nekala huhu, kamunivishire nguo; Nekala nalumwa na ni jela, ala kamudzire nibisha wala kunirarisi.' ⁴⁴ Namvo mvandajibu mvambe, "Bwana, ni rini huriho kona unanzala kahukurisire? Ama una chihu, ama umujeni, ama uhuhu, ama umukongo, ama u jela ala kahukushuhulikirire?" ⁴⁵ Ndiho andamvajibu amvambe, 'Ujeri namvambira, murivyo kosa kumvahendera kahi za atite aa, kamunihenderere mimi.' ⁴⁶ Mvamva mvandenjira kahi za adhabu ya milele, ala atakatifu mvandenjira kahi za uzima wa milele."