¹ Jesu achombola hekaluni achikala wenenda zakpwe. Anafunzie mvachimutua mvachimonyesa majengo ga hekalu. ² Ala achimvajibu achimvamba, "Kamona gano gosi? Ujeri namvambira, kakuna iwe hata mwenga rindosala kuremera rinjine, gosi gandavunzika gagbwe." ³ Hali yusegere dzulu ya murima wa mizeituni, anafunzie mvachimutua chisiri mvachimuza, "Tafadhali hambire, gano gosi gandahendeka rini? Ishara ya kudza kpwa kpwako na mwisho wa urimwengu ni noni?" ⁴ Jesu achimvajibu achimvamba, "Kalani makini mutu asimvalongoze vii. ⁵ Kpwa kukala anji mvandakudza kpwa dzina rangu. mvandamba, 'Mimi ndiye Masihi,' namvo mvandalongoza anji vii. ⁶ Mundasikira viha na fununu za viha. Hakikishani kamuyugbwa ni gago, kpwa kukala ni lazima mambo gago gakale; ala siku ya mwisho indakala bado. ⁷ Kpwa kukala, ntsi indapigana na injine, ufalume mumwenga undapigana na unjine. Kundakala na nzala komu na kusumba kpwa ardhi sehemu nyinji. ⁸ Ala gaga gosi indakala ni mwanzo tu wa utsungu wa uvyazi. ⁹ Halafu mvandamvachiza kpwa mateso makali na mvamolage. Mundatsukirirwa ni Mataifa kpwa dzina rangu. ¹⁰ Halafu anji mvandauya nyuma, na ku salitiana na kutsukirirwana. ¹¹ Manabii a ulongo mvandaombolera na mvalongoze anji vii. ¹² Kpwa kukala atu anji kamvandajali sheriya, uhenzo kpwa anji undasira. ¹³ Ala andiye vumirira ta mwisho andaokolwa. ¹⁴ Injili ya ufalume indahubiriwa dunia nzima here ushuhuda kpwa mataifa gosi. Halafu mwisho wa dunia undafika. ¹⁵ Kpwa vivyo, muchidzaona tsukizo ra ubanangi, ririro tabiriwa ni nabii Danieli, ridzema kahi za utakatifu, ¹⁶ ndio mvario Uyahudi namvachimbirire mirimani. ¹⁷ Na iye ariye dzulu ya nyumba na asitime kuhala chochosi mwakpwe nyumbani, ¹⁸ naye ariye chiwanjani na asuye nyumbani kuhala vazire. ¹⁹ Ala shaka rao mvario na mimba na mvamwisao siku zizo! ²⁰ Voyani kukala hali zizi zisimvapate musimu wa mvula ama siku ya sabato. ²¹ Kpwa kukala kundakala na mateso mabomu, ambago kagadzawahi kukalako kula mwanzo wa dunia mpaka sasa na kagandawahi kukalako keheri. ²² Labuda siku zizo zikale zefupishwa, kakuna mwiri wa nyama undeokolewa. Ala kpwa mvariotsagulwa, siku zizo zindafupishwa. ²³ Mutu yoyosi andemvamba, "Lolani, yuyu ndiye Masihi!' ama, ' Tiyuya Masihi!' musimwamini. ²⁴ Kpwa kukala 'masihi' a ulongo na manabii a ulongo mvandadza na mvandamonyesa ishara za ajabu na miujiza, ili mva-alongoze vii, hata ichiwezekana ta atsagulwa. ²⁵ Lolani, nidzimvambira kabla ya wakati uwo kufika. ²⁶ Kpwa vivyo, mvachimwambira, 'Lolani, yu nyikani,' musende. Ama, 'Lolani, yu ndani vyumbani,' musimva amini. ²⁷ Kpwa kukala here mulangaza ung'alavyo kula mombolero ga dzua mpaka kutswa kpwa dzua, vivyo ndivyo indivyokala Mwana wa Adamu andihokudza. ²⁸ Hariho na muzoga, ndiho tai mvakusanyikaho. ²⁹ Ala gandiho tsupa gago mateso ga siku zizo, dzua rindazizwa chiza chikale chinji, mwezi nao kaunda ng'ala, nyenyezi zindagbwa kula mulunguni, na nguvu za mulunguni zindachukpwa chukpwa. ³⁰ Ndiho ishara ya Mwana wa Adamu indonekana mulunguni, na kabila zosi za ntsi zinda omboleza. Mvandamona Mwana wa Adamu achitima dzulu ya maingu mulunguni na nguvu na utukufu mubomu. ³¹ Andahuma malaikae na sauti bomu sana ya tarumbeta, namvo mvanda akusanya hamwenga mvariotsagulwa kula kpwa sehemu zosi nne za urimwengu, kula mwisho wa mulunguni mpaka munjine. ³² Dzifundisheni kula kpwa mutini mufano uu; tagaa za kpwakpwe zichanza kukala laini na kugbwaga makodza, mwamanya kala wakati wa mavuno uhehi. ³³ Sasa pia, muchona ishara zizi, mumanye Masihi yuhehi na kudza, yukpwenye malango. ³⁴ Ujeri namvambira, chizazi chichi kachindatsupa mpaka gaga gosi gakale gahendeka. ³⁵ Urimwengu undatsupa, ala maneno gangu kagandatsupa. ³⁶ Ala dzulu ya siku iyo na masaa kakuna amanyaye, hata malaika a mulunguni, hata Mwana wa Mulungu, isihokala iye Paba hacheye. ³⁷ Here siku za Nuhu zirivyokala, ndivyo indivyo kala kudza kpwa Mwana wa Adamu. ³⁸ Kpwa kukala here siku zizo zirivyo kala kabla ya mafuriko mvekala mvachirya na kunwa, kuhalana na kulozana mpaka Nuhu ariho enjira kpwenye safina, ³⁹ na kamvamanyire chochosi mpaka mafuriko gariho kudza gachimvahala-ndivyo indivyokala kudzakpwe Mwana wa Adamu. ⁴⁰ Ndiho atu airi mvandakala uwanjani- mumwenga andahalwa, munjine arichwe. ⁴¹ Ana ache airi mvandakala mvachisaga- mumwenga andahalwa, munjine arichwe. ⁴² Kpwa vivyo kalani matso, kpwa kamumanya siku Bwana wenu andiho kudza. ⁴³ Ala manyani vivi, kalaho mwenye nyumba wemanya saa mwevi andiyokudzira, andekala wechesa kurinda nyumbaye na kandekubali mwevi amweyere. ⁴⁴ Kpwa vivyo ni lazima mukale tayari, kpwa kukala Mwana wa Adamu andadza bila chilagane. ⁴⁵ Sasa ni mujakazi hiye mwaminifu na mwenye hekima ambaye bwanawe wemurichira nyumbaye ili amvape chakurya chao wakati ufaawo? ⁴⁶ Ahaswa chijakazi ambaye bwanawe andamupata wahenda vivyo wakati andihouya. ⁴⁷ Ujeri namvambira, iye bwanawe andamupa mamulaka dzulu ya vyosi arivyo navyo. ⁴⁸ Ala ichikala chijakazi mui wadzambira rohoni, 'Bwana wangu yuchelewa,' ⁴⁹ naye anze kumvapiga ahenzi kazi anzie, arye na anwe na arevi, ⁵⁰ halafu tajiriwe adze bila chilagane na wakati asiwo umanya. ⁵¹ Tajiriwe andamukata vipande na amwike hamwenga na anafiki, ambao kundakala na viriro na kuluma meno.