¹ Kisha Jesu achinena na kundi na anafunzie. achamba, ² "Andishi na Mafarisayo mvasagalira chihi cha Musa. ³ Sasa, chochosi mvandicho amuru muhende, chihendeni muchiachunguza. Ala musimvege mahendo gao, kpwa kukala mvanenago sigo mvahendago. ⁴ Ni jeri, mvamvo nikufunga misigo miziho kutsukula, halafu mvakatsukuza anzao vituroni. Ala mvamvo enye kamvandatsukula. ⁵ Mvahenda mambo gao ili tu mvonewe ni atu. Kpwa kukala, nikupanula masanduku gao na konjeza ubomu wa mapindo ga mavazi gao. ⁶ Mvo nikuhenza kusagala kpwenye sehemu za chifahari kahi za sherehe na kahi za vihi vya heshima ndani ya masinagogi, ⁷ na kulamuswa kpwa heshima maeneo ga sokoni, na kpwehewa 'alimu' ni atu. ⁸ Ala, mwimwi kamuhenzekana kpwehewa 'alimu," kpwa kukala muna mwalimu mumwenga tu, anjine nyosi mu-ndugu. ⁹ Musimwehe mutu yoyosi haha duniani Paba yenu, kpwa kukala muna Paba mumwenga hacheye, naye yu mulunguni. ¹⁰ Wala musikubali kpwehewa 'alimu' kpwa kukala muna mwalimu mumwenga tu, ni Jesu Masihi. ¹¹ Ala iye ariye mubomu kahi yenu ndiye andekala muhumwa wenu. ¹² Chila adzenulaye andaudzwa tsini na yoyosi ariye tsini andenulwa. ¹³ Ala shaka renu, andishi na Mafarisayo, anafiki! Mwafungira atu ufalume wa mulunguni. Kpwa kukala kamwenjira mwimwi na kamwenzi pia mvario hehi mvenjire. ¹⁴ (Ririkana; musitari wa kumi na nne kawonekana kahi za nakala bora za kapindi. Baadhi ya nakala nikonjeza musitari uu baada ya musitari wa kumi na mbiri musitari wa kumi na nne). ¹⁵ Shaka renu, Andishi na Mafarisayo, anafiki! Kpwa kukala mwavuka ng'ambo ya bahari na kumuhenda mutu mumwenga a-amini, ala wakati achidza amini, mwamugaluza kukala mwana wa jehanamu mara mbiri here mwimwi murivyo. ¹⁶ Shaka renu, vilongozi vipofu, mwimwi mwambao, 'Chila andelaha kpwa dzina ra hekalu, kavina tabu. Ala andelaha kpwa dzina ra dhahabu ya hekalu, andafungbwa kpwa chirahoche.' ¹⁷ Mwino vipofu apumbavu! Ni hicho chiricho chibomu, dhahabu ama hekalu rikaro iyo dhahabu wakfu kpwa Mulungu? ¹⁸ Na, "Yoyosi andelaha kpwenye madhabahu, kavina tabu. Ala yoyosi alahaye kpwa zawadi iriyo dzulu ya madhabahu, wafungbwa ni chirahoche.' ¹⁹ Mwino vipofu! chiricho chibomu kutsupa ni hicho, zawadi ama madhabahu gaihendayo yo zawadi kukala takatifu? ²⁰ Kpwa vivyo, yoyosi alahaye kpwa madhabahu, walaha kpwa madhabahu na chila chitu chiricho haho. ²¹ Alahaye kpwa hekalu naye walaha kpwa hekalu na chila mutu aishiye mumo. ²² Na ye alahaye mulunguni, walaha kpwa chihi cha enzi ya Mulungu na iye achisagaliraye. ²³ Shaka renu, andishi na Mafarisayo, anafiki! Kpwa kukala mwalavya fungu ra kumi bizali na muchicha, ala mwaricha mambo maziho ga sheria-hachi, rehema na imani. Ala gaga, ni mukale mwagahenda na si kuricha manjine kagahendekere. ²⁴ Mwino vilongozi vipofu, mwatsulusa adudu atite ala mwamiza ngamia!" ²⁵ Shaka renu, andishi na Mafarisayo, anafiki! Kpwa kukala mwojesa chikombe na sahani nze, ala ndani mutele dhuluma na kukosa chipimo. ²⁶ Mwino vipofu Mafarisayo, ojesani kpwanza chikombe na sahani ndani, ili upande wanze ukale musafi nawo. ²⁷ Shaka renu, andishi na Mafarisayo, anafiki! Kpwa kukala muhere makaburi gadzohakpwa rangi, nze goneka madzo, ala ndani gatele misoza ya atu mvarofa kapindi na chila chitu chichafu. ²⁸ Kpwa hali iyo, nze mwaonekana atakatifu, ala ndani mutele unafiki na udhalimu. ²⁹ Shaka renu, andishi na Mafarisayo, anafiki! Kpwa kukala mwadzengera mbira za manabii na kupamba mbira za enye hachi. ³⁰ Mwino nikpwamba, "Kalaho heishi siku za paba zehu, hundekala kahugbwiranire hamwenga namvo kumwaga mulatso wa manabii.' ³¹ Kpwa vivyo, mwadzishuhudia enye kukala mu ana a mvamvo mvaro olaga manabii. ³² Mwadzarikiza pia vipimo vya dambi za Paba zenu. ³³ Mwino nyoka, ana a nyoka, munda dzichingadze na hukumu ya jehanamu? ³⁴ Kpwa vivyo, lolani, namvahumira manabii na atu enye hekima, na andishi. Anjine ao munda mvolaga na mumvasulubishe. Anjine mundamva chapa ndani za mahekalu na mumvainge kula lalo mwenga mpaka rinjine. ³⁵ Jibure ni kpwamba dzulu yenu undadza mulatso wosi wa atakatifu muriwo umwaga dzulu ya ntsi kula kpwa Habeli mpaka mulatso wa Zakariya mwana wa Barekiya, muriye molaga kahikahi ya hatakatifu na madhabahu. ³⁶ Ujeri namvambira, gaga gosi gandadza kahi za chivyazi chichi. ³⁷ Jerusalemu, Jerusalemu, uwe wolagaye manabii na kumvapiga mawe mvo mvahumwao kpwako! Mara ngahi nidzimvakusanya ana enu hamwenga, here kuku akusanyavyo vitsinyevye tsini ya mamvamvage, ala kukubalire! ³⁸ Lola bai, nyumbayo ikala ganzo. ³⁹ Kpwa nakpwambira, kundanona keheri kpwanzira vivi mpaka wambe, "Ahaswe iye adzaye kpwa dzina ra Bwana."