¹ Jesu achinena namvo keheri kpwa mafumbo, achamba, ² ufalume wa Mulunguni ni here mufalume mumwenga ariye ika karamu ya harusi ya mwanawe. ³ Achihuma ahenzi kazie mvakaehe ajeni osi mvarokala mvadzalikpwa kudza harusini, ala mvachikosa kufika. ⁴ Mara ya hiri, mufalume achihuma ahenzi kazi anjine mvakehewe, achimvamba, "Mvambireni a-alikpwa, 'Lolani, nidzi andaa chakurya cha dziloni. Nitsinza nzao na ndama za kunona, na vyosi vitayari. Nzoni harusini murye." ⁵ Ala kamva dziyugire ta mvachitua shuhuli zao, mumwenga achenda kpwakpwe mundani, munjine kpwa biasharaze. ⁶ O anjine mvachia tangila mvo ahenzi kazi a mufalume, mvachia-aibisha na kumvolaga. ⁷ Mufalume achitsukirwa, achihuma shikari mvachiolaga o ahenzi a gago kisha mvachiwocha mudzi wao. ⁸ Kisha achimvambira ahenzi kazie, 'Sherehe ya harusi i tayari, ala mvo mvarealikpwa mvekala kamva sitahili. ⁹ Kpwa vivyo endani ko matano ga barabara bomu muka alike atu anji iwezekanavyo' ¹⁰ Ahenzi kazie mvachenda kuko barabara bomu mvachikusanya atu osi mvario apata, adzo kpwa ai. Kpwa vivyo muhala wa harusi uchidzala ajeni. ¹¹ Ala mufalume ariho fika kulola ajenie, achona mumwenga kavalire vazi ra harusi. ¹² Mufalume achimwamba, 'Musenangu, udzenjiradze muno bila vazi ra harusi?' Ala mwanamulume iye achimunyamalira. ¹³ Ndiho mufalume achimvamba atumishie, 'Mufungeni yuyu mikono na magulu, mukamutsuhe nze chizani, kundiko kala na viriro na kuluma meno.' ¹⁴ Kpwa kukala anji nikpwehewa ala achache ndo mvatsagulwao." ¹⁵ Ndiho mafarisayo mvachombola mvachenda panga mvandivyo muhega na kumugbwira Jesu kahi ya manenoge mwenye. ¹⁶ Ndiho mvachimuhumira, anafunzi ao, hamwenga na Maherode. Mvachimwamba Jesu, "Mwalimu, hwamanya uwe umujeri, na wafundisha njira za Mulungu chi-ujeri. Kujali maoni wala mahenzekezi ga anjine, wala konyesa upendeleo kahi za atu. ¹⁷ Sasa hambire, wafikiriadze? Ni haki kuriha ushuru kpwa Kaisare ama sevyo?" ¹⁸ Ala Jesu achelewa kuhungukirwa kpwao achamba, "Mbona mwanijeza, mwi anafiki? ¹⁹ Nonyesani yo pesa ihumikayo kuriha ushuru." Mvachi mombozera dinari. ²⁰ Jesu achimvauza achimvamba, "Sura muyonayo na dzina muronaro ho ni ra-ani?" ²¹ Mvachimwamba, "Ni Kaisari." Ndiho Jesu achimvamba, "Bai mupeni Kaisari chiricho cha Kaisari, na Mulungu, chiricho chakpwe." ²² Mvariho sikira vivyo, mvachangalazika. Mvachimuricha mvachigbwira njira mvachihauka. ²³ Siku iyo achache kahi ya Masadukayo, ambamvo nikpwamba kakuna ufufulo, mvachimutua. Mvachimuza, ²⁴ mvachamba, "Mwalimu, Musa weamba, "Mutu achifa, bila mwana, nduguye lazima amuhale iye muche ufa mvapate ana kpwa niaba ya nduguye.' ²⁵ Kpwekala na ndugu afungahe. Wa kpwanza achihala baadaye achifa. Kpwa kukala karichire mwana, achimurichira muche nduguye. ²⁶ Nduguye wa hiri naye karichire mwana, achipewa wa hahu, mvekpwenda vivyo mpaka ndugu wa fungahe. ²⁷ Baada ya mvosi ao, iye muche achifa. ²⁸ Sasa, siku ya ufufulo, yuno muche andakala wa hiye kahi ya mvo fungahe? Kpwa kukala osi mvemuhala." ²⁹ Ala Jesu achimvajibu achimvamba, "Mwakosera kpwa kukala kamumanya maandiko na nguvu za Mulungu. ³⁰ Kpwa kukala kahi za ufufulo, atu kamvahala wala kulozwa. Badalaye, ni kukala here malaika mulunguni. ³¹ Ala dzulu ya ufufulo wa afadzi, kamudzasoma garigo nenwa kpwenu ni Mulungu, achamba, ³² ' Mimi ndiye Mulungu wa Iburahimu, Mulungu wa Isaka, na Mulungu wa Jakobu?' Mulungu si Mulungu wa afadzi, bali mvaishio. ³³ Makundi ga atu mvariho sikira vivyo, mvachi angalazika muno kpwa mafundishoge. ³⁴ Ala Mafarisayo mvariho sikira kukala Jesu amvanyamazisha Masadukayo, mvachikusanyana hamwenga. ³⁵ Mumwenga wao, musomi sheria, achimuza swali, kumujeza- ³⁶ "Mwalimu, sheria iriyo kulu kutsupa zosi ni hiyo?" ³⁷ Jesu achimwamba, "Muhenze Mulunguwo kpwa rohoyo yosi, moyowo wosi, na akilizo zosi.' ³⁸ Iyo ndiyo sheria kulu na ya kpwanza kahi za sheria. ³⁹ Na sheria ya hiri yahalana na iyo ya kpwanza- 'Muhenze jiraniwo here udzihenzavyo uwe mwenye.' ⁴⁰ Sheria zosi za Manabii zakuluhira zizi mbiri." ⁴¹ Sasa, hali Mafarisayo mvachere kusanyika hamwenga, Jesu achimvauza swali. ⁴² Achuza, "Mwa-azani kuhusu Masihi? ni mwana wa ani?" Mvachimwamba, "Ni Mwana wa Daudi." ⁴³ Jesu achimvamba, "Yakaladze bee Daudi kahi za Roho wamweha Bwana, achamba, ⁴⁴ 'Bwana achimwamba Bwana wangu, "Sagala mukono wangu wa kulume, mpaka nimvahende mahadui a kpwako mvakale tsini ya magulugo"? ⁴⁵ Sasa kala Daudi wamweha Masihi 'Bwana' wakaladze bee Mwana wa Daudi?" ⁴⁶ Kahana ariye weza kujibu swali riro keheri, na kakuna mutu arejeza kumuza swali rinjine kula na siku iyo.