¹ Jesu hamwenga na anafunzie mvachifika hehi na Jerusalemu achenda mpaka Bethifage, kpwenye mirima ya mizeituni, kisha Jesu achihuma anafunzie airi, ² achimvamba, "Enendani chijiji chituiracho, haho mundona punda yufungbwa na mwanapunda hamwenga naye. Afuguleni muarehe kpwangu. ³ Ichikala mutu yoyosi andamvauza rorosi dzulu ya riro, mundamwamba, 'Bwana ana mahitaji namvo,' na iye mutu andamvarichira mudze namvo." ⁴ Sasa gaga gehendeka ili kuritimiza neno rironenwa ni Nabii, achamba, ⁵ "Mwambire binti sayuni, 'Lola, mufalume wa kpwako wadza, munyenyekevu dzulu ya punda-mwana punda ⁶ Kisha ananfunzie mvachenda mvachihenda here Jesu arivyo mvalakiza. ⁷ Mvachimureha punda na mwana punda, mvachihandika nguo zao, Jesu achizisagalira. ⁸ Anji kahi za kundi mvepanga nguo zao njirani, anjine mvachikata matsanzu ga mihi mvachiga handika njirani. ⁹ Ndiho makundi ga atu mvachenda kpwa Jesu na mvosi mvaremutua mvekpwenda mvachipiga kululu mvachamba, "Hosana kpwa Mwana wa Daudi! Adzibarikiwa adzaye kpwa dzina ra Bwana! Hosana kpwa ariye dzulu!" ¹⁰ Jesu arihofika Jerusalemu, mudzi muzima weondoka, uchuza, "Nani yuno?" ¹¹ Makundi mvachamba, "Yuyu ni Jesu, Nabii kula Nazareti Galilaya." ¹² Halafu Jesu achenjira hekaluni. Achimvainga osi mvarokala mvenjiza biashara mumo, achenula na kupindua meza za mvarokala mvagaluza pesa na vihi vya mvariokala mvakuza magia. ¹³ Achimvamba, "Yeandikpwa, 'Nyumba yangu indehewa nyumba ya mavoyo, ala muihenda pango ra evi." ¹⁴ Kisha vipofu na virema mvachirehewa kpwakpwe mumo hekaluni, naye achimvahoza. ¹⁵ Ala abomu a Makuhani na andishi mvariho ona mambo ga ajabu arigohenda, na mvariho sikira ahoho mvachipiga kululu hekaluni mvachamba, "Hosana kpwa Mwana wa Daudi," mvachitsukirwa. ¹⁶ Mvachimwamba, "Wasikira go mvanenago?" Jesu achimvamba, "Nasikira! Ala kpwani kamudzasoma mwi, 'Kahi za milomo ya ahoho na ana mvamwao udzidzi tengezera sifa'?" ¹⁷ Jesu achimvaricha achenda nze ya mudzi wa Bethani achilala kuko. ¹⁸ Sasa, madzacha arihokala wauya mudzini, wekala ana nzala. ¹⁹ Ariho-ona mutini kanda ya barabara, achiutua ala kapatire chitu isihokala makodza. Achiwamba, "Musipatikane keheri matunda kpwako," dakika iyo uchinyauka uchifa. ²⁰ Anafunzi mvariho-ona vivyo, mvachangalazika mvachuza, "Ikaladze mutini ukanyauka?" ²¹ Jesu achimvajibu achimvamba, "Ujeri namvambira, muchikala na imani bila kushuku, kamundahenda tu gaga nidzigohendera uu mutini, mundaweza hata kulakiza uu murima, "Enulwa dzulu ukakanywe baharini,' na vindahendeka. ²² Chila muvoyacho, kpwa imani, mundachipata." ²³ Jesu ariho enjira hekaluni, makuhani abomu na vilongozi a atu mvachimutua hali achifundisha mvachimwamba, "Ni kpwa nguvu hizo uhendago gano, na arekupa uwezo uno nani?" ²⁴ Jesu achimvajibu achimvamba, "Nami nindamvauza swali mwenga. Muchinambira, nami nindamvambira nahumira nguvu hizo kugahenda gaga. ²⁵ Ubatizo wa Johana-welaa nahi, mulunguni ama kula kpwa adamu?" Mvachuzana enye kpwa enye, mvachamba, 'Huchamba, 'Kula mulunguni,' andahwamba, 'Mbona bee kamumwaminire?' ²⁶ Ala huchamba, 'Kula kpwa adamu,' hogoha riri kundi ra atu, kpwa kukala atu mvosi mvemumanya Johana here nabii." ²⁷ Ndiho mvachimujibu Jesu mvachimwamba, "Kahumanya." Naye achimvamba, "Hata mimi sindamwambira nahenda gaga kpwa uwezo wa hiye. ²⁸ Ala maazo genu ni higo? Mumwenga wekala na anae airi achilume. Achimwendera wa kpwanza achimwamba, 'Mwanangu, enda rero ukahende kazi mundani.' ²⁹ 'Yuya chijana achimujibu achimwamba, 'Sindavihenda,' ala baadaye achi ririkana achenda. ³⁰ Achenda kpwa yuya mwanawe wa hiri, achimwamba neno riro mwenga. Ye achimujibu achimwamba, 'Sawa nindenenda, Bwana,' ala kendere. ³¹ Kahi ya mvo airi nani arehenda malakizo ga pabaye?" Mvachamba, "Ye wa kpwanza." Jesu achimvamba, "Ujeri namvambira, akusanyaji ushuru na kodi, na azinzi mvandenjira kahi za ufalume wa Mulungu kabila mwimwi mwenjire. ³² Kpwa kukala Johana wekudza kpwenu kpwa njira ya utakatifu, ala kamumwaminire. Akusanyaji ushuru na azinzi mvachimwamini. Mwimwi, hata muriho gaona gago, kamutubire baadaye na kumwamini. ³³ "Sikizani fumbo rinjine. Hekala na mumwenga, mwenye munda. Achinyala mizabibu, achi-izungulushira ulingo, achitsimba na achitengeza sehemu ya kukamulira divai, achihadzenga munara wa arinzie, achimvakodishira atunza mizabibu. Achisafiri achenda ntsi injine. ³⁴ Irihofika wakati wa kuvuna matunda, achihuma ahenzi kazie mundani mvakavune matunda. ³⁵ Ala akurima a mizabibu mvachi ahala o ahenzi kazie, mvachimupiga mumwenga, mvachimolaga mumwenga, na munjine mvachimupiga mawe. ³⁶ Kpwa mara injine, mwenye munda achihuma atumishi anjine, kutsupa o a kpwanza, ala akurima a mizabibu mvachiahenda dza vivyo vya ao mvaretangulia. ³⁷ Baada ya gago, mwenye munda achimuhuma mwanawe mwenye, achamba, 'Mvandamuheshimu mwanangu bila tabu.' ³⁸ Ala mvariho mona iye mwanawe, mvachambirana, 'Tiyu murithiwe, nzoni, nahumolageni huhale urithi.' ³⁹ Ndiho mvachimuhala, mvachenda naye mpaka kanda ya wo munda mvachimolaga. ⁴⁰ Je, mwenye munda wa mizabibu achifika, andamvahendadze o akurima a mizabibu?" ⁴¹ Mvachimujibu mvachimwamba, "Andamvolaga mvamvo atu ai kpwa koro, halafu aulavye uwo munda kpwa akurima anjine, atu ambamvo mvandamupa hachiye sawa musimu wa mavuno." ⁴² Jesu achimvamba, "Kamusomere kahi za maandiko, 'Iwe ririro kahalwa ni ajenzi rikala iwe bomu ra pembeni. Riri relaa kpwa Bwana, na ratsama matsoni mwehu?' ⁴³ Kpwa vivyo namvambira, ufalume wa Mulungu mundahokpwa na undapewa taifa ambaro rindawombozera matunda. ⁴⁴ Yoyosi andiyegbwa dzulu ya iwe riri andavunzika vipandevipande. Ala yoyosi andiye andagbwererwa ni iwe riri, andasagika." ⁴⁵ Makuhani abomu na Mafarisayo mvariho sikira mafumbo gago, mvachelewa kala wekala wanena dzulu yao. ⁴⁶ Mvachimala kumugbwira mvamufunge, ala mvachogoha makusanyiko ga atu, kpwa kukala atu mvemuhalira kukala iye ni nabii.