¹ Wakati uwo anafunzi mvachimutua Jesu mvachimuza, "Mukulu kabisa kahi za ufalume wa Mulungu ni hiye?" ² Jesu acheha muhoho, achimwika kahi yao, ³ achamba, "Ujeri namvambira, labuda mutu ugaluke ukale here yuyu muhoho, kundaweza kpwenjira kahi za ufalume wa Mulungu. ⁴ Kpwa vivyo, yoyosi andekala munyenyekevu here yuyu muhoho mutite, ndiye mubomu kahi za ufalume wa Mulungu. ⁵ Yoyosi andekaribisha muhoho dza yuyu kpwa dzina rangu, wanihochera mimi. ⁶ Ala yoyosi andemuhenda mumwenga wa ahoho aa mvaniaminio kpwenjira dambini, indakalato zaidi kpwakpwe kufungbwa iwe bomu ra kusagira singoni, akazamiswe baharini. ⁷ "Shakare dunia ii kpwa ajili ya vikpwazo! Kpwa kukala vikpwazo ni lazima vikaleko, ala shakare mutu iye ambaye andareha vivyo vikpwazo! ⁸ Ichikala mukonowo ama chigulucho chinda kpwenjiza dambini, kata utsuhe. Ni vidzo sana wenjire kahi za uzima bila mukono ama chigulu kuriko kutsuhiwa kahi za moho wa jehanamu uchikala na mikono yosi miri ama magulu gosi mairi. ⁹ Ichikala dzitsoro rindakukpwaza, romboze uritsuhe. Ni vidzo wenjire uzimani na dzitso mwenga kuriko utsuhiwe mohoni kuzimu na matso gosi mairi. ¹⁰ Onani kpwamba kamuadharau aa ahoho. Kpwa kukala namvambira, mulunguni kuna malaika ambamvo wakati wosi mvalola Paba ariye Mulunguni usoni. ¹¹ (Ririkana: Maneno gonekanago here ga musitari wa kumi na mwenga. "Kpwa kukala Mwana wa Adamu wekudza kuokola chiratu chirichokala chidzangamika" kagaonekanire kahi za nakala muhimu za kapindi). ¹² Mwazani? Ichikala mutu ana ng'onzi gana, na mwenga yaho yangamike, je, karicha zinjine mirongo chenda na chenda mirimani akenda tafuta yo mwenga idziyo angamika? ¹³ Achipata yo mwenga, ujeri namvambira, anda hamirwa zaidi kuriko zo mirongo chenda na chenda ambazo kazangamikire. ¹⁴ Kpwa hali iyo mwenga, si mahenzo ga Paba yenu mulunguni kpwamba mumwenga wa ahoho aa angamike. ¹⁵ Nduguyo achikukosera, enenda ukamukanye, muchikala mwimwi airi tu. Achikusikira, udzimudzya nduguyo kahi za uhenzo. ¹⁶ Ala kala kakusikirire, hala mumwenga ama airi anjine mwende hamwenga ili kpwa ushahidi wa airi ama ahahu, chila neno rindakala richizwa. ¹⁷ Achikahala kamvasikirire, enda ukahirike dzambo riro kanisani. Achikahala kusikiza kanisa, na akale kpwako here mutu wa taifa na mutoza ushuru. ¹⁸ Namvambira ujeri, chila chitu muchifungacho haha urimwenguni, chindafungbwa mulunguni, na chila mundicho chifugula urimwenguni chindafugulwa mulunguni. ¹⁹ Keheri namvambira, kala atu airi kahi yenu mvadzelewana kuhusu dzambo mvachivoya, mvandahenderwa ni Paba ariye mulunguni. ²⁰ Kpwa kukala atu airi ama ahahu mvachikusanyika hamwenga kpwa dzina rangu, nindakala hamwenga namvo." ²¹ Petero achenda kpwa Jesu achimwamba, "Bwana, ni mara ngahi ndugu yangu achinikosera nimusamehe? Mara fungahe?" ²² Jesu achimujibu, "Sindakpwambira mara fungahe, ala hata mara mirongo mifungahe mara fungahe." ²³ Kpwa vivyo ufalume wa mulunguni u sawa na mufalume aremala kufunga hesabuze na ahenzi kazie. ²⁴ Ariho anza kaziye, muhenzi kazi mumwenga achidza arekala wamudai talanta elifu kumi. ²⁵ Ala kpwa kukala wekala kana njira ya kuriha denire, mufalume achiamuru akuzwe, iye na muchewe na anae na chila chitu aricho kala nacho, ili denire ririhike. ²⁶ Kpwa vivyo muhenzi kazi achishutama, achimupigira mavindi mbereze kpwa heshima achamba, 'Bwana, nivumirira, nindakuriha chila chitu.' ²⁷ Mufalume ariho gbwirwa ni mbazi kpwa muhenzi kaziwe, achimurichira na kumusamehe denire. ²⁸ Ala mutumwa iye weuka achimupata mumwenga wa atumwa anziye, arekala naye wamudai dinari gana. Achimugbwira, achimala kumushongola, achimwamba, 'Niriha deni rangu.' ²⁹ Ala, mutumwa munziwe achishutama kpwa heshima na achimusihi achamba, 'Kala muvumirivu, nami, nindakuriha.' ³⁰ Ala mutumwa wa kpwanza wekahala. Badalaye, achenda achimwenjiza chifungoni mpaka ho andemuriha denire. ³¹ Atumwa anzie mvariho ona vivyo, mvachitsikirwa muno. Mvachenda kpwa tajiri wao mvachimwelezera chila chitu chiricho hendeka. ³² Tajiri achimweha iye mutumwawe achimwamba, 'Uwe mutumwa katili, nekusamehe deniro rosi kpwa kukala wenivoya nikusamehe. ³³ Wekala kuweza kumusamehe mutumwa munzio, jinsi mino nirivyo kusamehe?' ³⁴ Bwana iye achitsikirwa sana achimulavya kpwa atesi mpaka andiho riha denire. ³⁵ Vivyo bai, Paba ariye Mulunguni naye andamvahendera dza vivyo kala kamunda kala na musamaha kpwa ndugu zenu kula kpwa roho zenu."