¹ Mafarisayo na Masadukayo mvachimutua kumwenjiza majezoni. Mvachimumala amvahendere muujiza kula mulunguni. ² Ala achimvajibu achimvamba, "Wakati wa dzulo, mwi nikpwamba, 'Kundang'ala, kpwa kukala mainguni ni kutune.' ³ Kuchicha, mwamba, 'Hali ya anga rero si mbidzo, kpwa kukala anga ni tune na maingu gafinika anga yosi.' Mwamanya kusoma muonekano wa anga, ala kamuweza kutabiri ishara za nyakati. ⁴ Chizazi chii cha uzinzi, ndo chimalacho konyeswa ishara, ala kakuna ishara mundeonyeswa, ihihokala ishara ya nabii Jonah." Jesu achimvaricha achihauka. ⁵ Anafunzi mvarihofika ng'ambo ya hiri, mvachikala mvasahau kutsukula mikahe. ⁶ Jesu achimvamba, "Dzimanyirireni, na mukale matso dzulu ya tsatsu ya Mafarisayo na Masadukayo." ⁷ Anafunzi mvachuzana enye kpwa enye, mvachamba, "Ni kpwa kukala kahutsukulire mikahe ndiho akamba vivyo." ⁸ Jesu achigamanya achimvamba, "Mwino enye imani tite, mbona mwauzana na kpwamba ni kpwa kukala kamutsukulire mikahe? ⁹ Kamwelewa? Je kamukumbuka mikahe mitsano yerisa atu elifu tsano, na ni kahu ngahi mwezidzaza na masaza? ¹⁰ Ama ira mikahe fungahe irorisa atu elifu nne, na ni kahu ngahi za masaza muriyo kusanya? ¹¹ Ikaledze kamudzaelewa kukala sikalire nanena ga mikahe? Dzimanyirireni na mumanye tsatsu ya Mafarisayo na Masadukayo." ¹² Ndiho mvachelewa kukala wekala kamvambira dzulu ya tsatsu ya mikahe, ala mvakale matso dzulu ya mafundisho ga Mafarisayo na Masadukayo. ¹³ Sasa Jesu arihofika sehemu za Kaisaria ya Filipi, achuza anafunzie, achimvamba, "Atu mvauza mino Mwana wa Adamu ni ani?" ¹⁴ Mvachimwamba, "Anjine mvamba u Johana Mubatizaji; anjine mvamba u Eliyah; Anjine, Jeremia, ama mumwenga kahi za manabii." ¹⁵ Achimvauza, "Ala mwino mwamba mino ni ani?" ¹⁶ Arihojibu Simioni Petero achamba, "U Masihi, Mwana wa Mulungu aishiye." ¹⁷ Jesu achimujibu, achimwamba, "Uhaswa, Simioni mwana wa Jonah, kpwa kukala si damu na nyama vidzo kufugulira gago, isihokala Paba ariye dzulu mulunguni. ¹⁸ Nami nakpwambira uwe u Petero, na dzulu ya iwe riri, nindadzenga kanisa rangu. Malango ga kuzimu kagandarishinda. ¹⁹ Nindakupa funguo za ufalume wa mulunguni. Chila undichofunga haha urimwenguni, chindakala chifungbwa mulunguni, na chila undicho chifugula, haha urimwenguni, chindakala chifugulwa mulunguni." ²⁰ Ndiho Jesu achamuru anafunzie mvasimwambire yoyosi kukala iye ndiye Masihi. ²¹ Kula wakati uwo Jesu achanza kumvambira anafunzie kukala ni lazima ende Jerusalemu, akateseke mambo manji mikononi mwa abomu a masinagogi na makuhani akulu na andishi, olagbwe, kisha afufuke siku ya hahu. ²² Petero achimuvuha kanda achimuchemera, achimwamba, "Gaga nagakale kure sana nawe, Bwana! gaga nagasikupate!" ²³ Ala Jesu achimugalukira achimwamba Petero, "Uya nyuma zangu, Pepo! U chikpwazo kpwangu, kpwa kukala kufikiria mambo ga Mulungu, wafikiria ga chidamu." ²⁴ Jesu achimvambira anafunzie, "Ichikala hana yoyosi amalaye kunitua, ni lazima adziudhi, ereke musalabawe, anitue. ²⁵ Kpwa kukala chila amalaye kuwokola uzimawe, andawangamiza, ala chila andiye wangamiza uzimawe kpwa ajili yangu, andaupata. ²⁶ Kpwani, indamufaidi mudamu utu wani, apate urimwengu muzima ala akose uzimawe? Mutu waweza kulavyani kugula uzimawe? ²⁷ Kpwa kukala Mwana wa Adamu, andadza kpwa utukufu wa Pabaye na Malaika akpwakpwe. Kisha andamva zawadisha chila mumwenga kulingana na mahendoge. ²⁸ Ujeri namvambira, kuna anjine enu mvemireo haha ambamvo kamvanda tata chifo mpaka mvamone Mwana wa Adamu adzavyo kahi za ufalume wa kpwakpwe."