¹ Ndiho Mafarisayo na andishi vachidza kpwa Jesu kula Jerusalemu. Vachuza, ² "Kpwa noni anafunzio vakahala kutua mila za akare? Vachirya kamvoga mikono." ³ Achimvajibu achimvamba, "Be mbona mwi mwahenda chinyume na sheria za Mulungu kpwa chisingbwa cha mila zenu? ⁴ Kpwa kukala Mulungu weamba, 'Muheshimu Pabayo na Mameyo,' na 'Anenaye mai kuhusu pabaye ama mameye hakika andafa.' ⁵ Ala mwi nikpwamba, 'Yoyosi amwambaye pabaye ama mameye, 'Msaada wowosi ambao undeuhochera kula kpwangu ni zawadi kula kpwa Mulungu" ⁶ mutu iye kashurutishwa kumuheshimu pabaye.' Kpwa njira ii, mudzirigaluza neno ra Mulungu kukosa heshimaye kpwa kuchiza mbere tamaduni zenu. ⁷ Mwi anafiki! Ni jeri nabii Isaya wetabiri kumvahusu ariho amba, ⁸ 'Kpwa milomo yao ndiho atu mvaniheshimu, ala roho zao zikure sana nami. ⁹ Mvaniabudu bule kpwa kukala, mvafundisha mafundisho garigo gao, malakizo ga adamu." ¹⁰ Kisha achimveha kundi achimvamba, "Sikizani na munelewe- ¹¹ Kakuna chitu chenjiracho mulomoni mwa mutu chiwezacho kumwenjiza najisi. Isihokala chombolacho mulomoni mwakpwe." ¹² Ndiho anafunzi mvachimutua Jesu mvachimwamba, "Wamanya Mafarisayo mvetsikirwa mvariho sikira maneno urigo ganena?" ¹³ Jesu achimvajibu achimvamba, "Chila muhi ambao Paba wa mulunguni kaunyalire undang'olwa. ¹⁴ Richanani namvo, ni vilongozi vipofu. Chipofu achilongoza chipofu munziwe, mvosi mvandenjira dingbwini." ¹⁵ Petero achijibu achimwambira Jesu, "Helezere maanaye fumbo riro." ¹⁶ Jesu achimuza, "Bado kamudza elewa? ¹⁷ Kamwelewa kukala chochosi chenjiracho tumboni chombola musalani? ¹⁸ Ala vyombolavyo mulomoni vila na moyoni. Ndo vitu vyenjizavyo mutu najisi. ¹⁹ Kpwa kukala, kula kpwa moyo wa mwanadamu, mawazo machafu, walagi, uzinzi, uzembe, wevi, ushahidi wa ulongo, na matusi. ²⁰ Vivi ndivyo vitu vimwenjizavyo mutu najisi. Ala kurya kuhumira mikono michafu kakunajisi mutu." ²¹ Jesu achuka achenda sehemu za midzi ya Tiro na Sidoni. ²² Mara, mwanamuche mu-kanani achidza kula iyo sehemu. Achipiga kululu achamba, "Nonera mbazi Bwana, Mwana wa Daudi! Mwanangu wa chiche apagawa ni mapepo." ²³ Ala Jesu kamujibire chitu. Anafunzie mvachimutua mvachimuvoya, mvachimwamba "Mwinge, ahauke kpwa kukala wahupigira kululu." ²⁴ Ala Jesu achimvajibu, achimvamba, "Sihumirwe kpwa yoyosi isihokala kpwa ng'onzi zirizo angamika za Israeli." ²⁵ Ala, mwanamuche achidza, achizama mbereze, achimwamba, "Bwana, nisaidia." ²⁶ Achimujibu, achamba, "Si sawa kuhala mukahe wa ana kisha umvatsuhire anakuro." ²⁷ Achimwamba, "Ndevyo Bwana, ala hata anakuro nikurya masala ga chakurya chigbwacho kula kpwa meza za mabwana ao." ²⁸ Kisha Jesu achimujibu, "Mwanamuche, imaniyo ni bomu. Na vikahendeke here uhenzavyo." Mwanawe achihola kula saa iyo. ²⁹ Jesu achihauka haho achenda hehi na bahari ya Galilaya. Achipanda murima achenda sagala kuko. ³⁰ Makusanyiko ga atu mvachimutua. Mvachimuhirikira virema, vipofu, mabubu na viwete na anjine anji akongo. Mvachimvaika maguluni ha Jesu, achimvahoza. ³¹ Kusanyiko ra atu mvachishukuru na kpwangalazika kpwa kona mabubu mvachinena, viwete mvachenenda, mvario holoza mvachihola na vipofu mvachona. Mvachimutukuza Mulungu wa Israeli. ³² Jesu achimveha anafunzie achimvamba, "Namvonera mbazi atu mvamva kpwa kukala mvadzikala nami siku tahu kare na kamvana cha kurya. Senzi hurichane namvo bila kurya, sevyo anjine mvandenda zimia njirani." ³³ Anafunzie mvachimuza, "Ni hiko haweza kupata mikahe ya kutosha weruni kuno kumvekusha atu mvosi ano?" ³⁴ Jesu achimvauza, "Muna mikahe mingahi?" Mvachamba, "Fungahe, na visamaki vichache tu." ³⁵ Jesu achimva amuru kusanyiko mvasagale weruni. ³⁶ Achihala yo mikahe fungahe na o samaki, naye baada ya kushukuru, achi imega achimvapa anafunzi. Anafunzi mvachiapa kusanyiko. ³⁷ Atu mvosi mverya kpwekuha. Baadaye, mvachikusanya kahu fungahe tele za mabaki ga mikahe. ³⁸ Mvosi mvarorya, mvekala alume elifu nne, kuusa ache na ahoho. ³⁹ Halafu Jesu achimvatsamula makusanyiko achenjira kpwenye mashua achenda sehemu ya Magadani.