¹ Wakati uwo, Mufalume Herode achisikira habari za Jesu. ² Achimvambira atumishie, "Yuyu ni Johana Mubatizaji; afufuka kula kuzimu. Ndiho ana nguvu zizi zimuhenderazo kazi." ³ Kpwa kukala Herode wekala yumufunga Johana, achimuhirika jela kpwa kukala Herodia, wekala ni mulamuwe-mukaza Filipo. ⁴ Kpwa kukala Johana wekala yumwamba, "Si sheria na si hachi uwe Herode kumuhala Herodia ufa." ⁵ Herode wemala kumolaga, ala achogoha atu kpwa kukala mvemumanya Johana Mubatizaji here nabii. ⁶ Siku ya sherehe ya kuvyalwa kpwa Herode irihofika, mwana wa Herodia wa chiche achivina mbere za ajeni a mufalume mpaka Herode achitsamirwa. ⁷ Majibuge, ichikala kumwahidi kpwa kurya chiraho kukala andamupa chochosi andicho chimala kpwakpwe. ⁸ Kpwa kushauriwa ni mameye, achamba, "Nirehera haha henye sahani, chitswa cha Johana Mubatizaji." ⁹ Mufalume achisikitika kpwa voyo riro, ala kpwa wekala yudzerya chiraho mbere za atu osi mvarokala hamwenga naye chakuryani, achiamurisha rihendeke riro dzambo. ¹⁰ Achihuma chitswa cha Johana Mubatizaji chichenda katwa kuko jela. ¹¹ Chitswa chichirehewa kpwenye sahani, musichana achichipewa achenda mupa mameye. ¹² Anafunzi a Johana mvachidza hala mwiri, mvachenda zika. Kula haho, mvachenda mwambira Jesu. ¹³ Jesu ariho sikira, achikulaa kuko ndani ya mashua achenda lalo rinjine mafitsoni. Makundi ga atu variho sikira vivyo, mvachimutua kuko kpwa magulu kula midzini. ¹⁴ Ndiho Jesu achimvatua, achona kundi ni bomu achikala na mbazi kpwao achimvahoza akongo ao. ¹⁵ Dzulo ririho enjira, anafunzie mvachidza mvachimwamba, "Ii ni sehemu ya kanda, na dzulo rifika. Mvainge ano atu, ili mvaweze kpwenda vijijini mvakadzigulire utu wa kurya." ¹⁶ Ala Jesu achimvamba, "Kamvana haja ya kpwenda. Mvapeni chakurya mvarye." ¹⁷ Mvachimwamba, "Haha huna mikahe mitsano na samaki airi." ¹⁸ Jesu achimvamba, "Nireherani." ¹⁹ Ndiho Jesu achiamuru atu mvasagale uwanjani. Achihala yo mikahe mitsano na mvo samaki airi. Achenula chitswa achilola mulunguni, achi-ihasa, achimega mikahe vipande achimvapa anafunzie, anafunzi mvachiapa atu mvachirya. ²⁰ Mvosi mverya kpwekuha. Baadaye, masala gosi gachikusanywa-kahu kumi na mbiri tele. ²¹ Mvariorya mvekala here alume elifu tsano, ache na ahoho kanda. ²² Upesi achilakiza anafunzi mvenjire mashuani mvende mbereze upande wa hiri, hali achi afumula atu. ²³ Baada ya kuafumula, achenda dzulu ya murima hacheye achivoya. Dzulo ririho fika, wekala yukuko hacheye. ²⁴ Ala mashua ichikala ikure sana na pwani kahi ya bahari, sababu ya kusukumwa ni maimbi ga bahari, maana peho yekala yapiga upande wao (yekala mbii). ²⁵ Kahi za usiku wa zamu ya nne, Jesu achimvatua, kuno wafyoga dzulu ya bahari (madzi). ²⁶ Anafunzi mvariho mona wenenda dzulu ya madzi, mvachidzi yeyehuka mvachamba, "Ni pepo!" mvachikpwatya kupiga kululu za woga. ²⁷ Ala Jesu achinena namvo achimvamba, "Dzipeni moyo, ndimi! Musogoheni." ²⁸ Petero achimujibu achimwamba, "Bwana, kala ndiwe niamuru nikutue dzulu ya madzi." ²⁹ Jesu achimwamba, "Nzo." Petero achombola kula kpwa mashua achi fyoga dzulu ya madzi kumutua Jesu. ³⁰ Ala Petero ariho ona uziho wa maimbi, achanza kogoha. Achikpwatya kuzama, kpwa sauti bomu achamba, "Bwana, nokola!" ³¹ Jesu achigoloza kare mukono, achimugbwira Petero, achimwamba, "Mutu mwenye imani tepe, mbona udzogoha?" ³² Jesu na Petero mvariho enjira kahi za mashua, kusi richiricha. ³³ Ndiho anafunzi kahi za mashua mvachi muabudu Jesu mvachimwamba, "Hudzamini jeri uwe u Mwana wa Mulungu." ³⁴ Mvariho kala mvadzivuka, mvachifika ntsi ya Genesareti. ³⁵ Atu a sehemu iyo mvariho mutambua Jesu, mvachihuma ujumbe chila hatu jirani mvachimurehera chila mutu arekala mukongo. ³⁶ Mvachimuvoya kala mvanderuhusiwa hata kuguta tu vazi ra kpwakpwe, na chila ariye riguta wehola.