¹ Siku iyo Jesu achombola nyumbani achenda sagala pwani ya bahari. ² Kundi bomu ra atu mvachikusanyika kumuzunguluka, sasa achenjira kahi za mashua achiricha kundi ra atu ufuoni. ³ Kisha Jesu achimvambira mambo manji sana kpwa mafumbo. Achimvamba, "Lolani, mukurima mumwenga wekpwenda achinyala mbeyu. ⁴ Ariho kala wazinyala, mbeyu zinjine zichigbwa kanda-kanda ya barabara, tsongo mvachidza mvachizitota. ⁵ Mbeyu zinjine zichigbwa dzulu ya iwe, kazipatire mutsanga wa kutosha. Zichimera haraka sana, kpwa kukala mutsanga wekala kautosha. ⁶ Ala dzuwa ririho aka, mitse ichisha kpwa kukala yekala kaina mizi, ichinyauka. ⁷ Mbeyu zinjine zichigbwa kahi za mihi ya miya. Miya ichikula ichi ilingila ichifa. ⁸ Mbeyu zinjine zichigbwa kahi za mutsanga mudzo wa rutuba, ichivyala mazao, manjine mara gana zaidi, manjine mara mirongo mihandahu zaidi, manjine mara mirongo mihahu zaidi. ⁹ ariye na masikiro, asikire." ¹⁰ Anafunzi mvachimutua Jesu mvachimuza, "Mbona wanena kpwa kundi ra atu kuhumira mafumbo?" ¹¹ Jesu achimvajibu achimvamba, "Mwimwi mudzipewa nafasi kpwelewa mambo gahendekago kahi za ufalume wa Mulungu, ala mvamvo kamvapewerwe. ¹² Kpwa kukala yoyosi ariye nacho andapewa vinjine, naye andakala na vinji. Ala yoyosi asekala nacho, be ta cho chichache aricho nacho andahokpwa. ¹³ Iyo ndo sababu nanena namvo kahi za mafumbo: Idzaho mvaona, kamvaona ujeri. Na idzaho mvasikira, kamvasikira wala kamvelewa. ¹⁴ Kpwao mvamvo, unabii wa Isaya utimira, wambao, "Kusikira, mundasikira, ala kamundaelewa; kona, mundaona, ala kamundamanya. ¹⁵ Kpwa kukala maroho ga mvamva atu gakala mafu, na kpwa masikiro gao kamvasikira, na matso pia mvagafunga. Sevyo, mvandeona kpwa matso gao, mvakasikira kpwa masikiro gao na mvakaelewa na maroho gao mvaka galuka, nami nindeahoza." ¹⁶ Ala matso genu gabarikiwa, kpwa kukala gaona; na masikiro genu, kpwa kukala gasikira. ¹⁷ Ujeri namvambira kukala manabii anji na atakatifu mvetamani kugaona gaga mugaonago ala kamvagaonere. Mvetamani mvagasikire gaga mugasikirago, ala kamvagasikirire. ¹⁸ Sikizani sasa fumbo ra mukurima arenyala mbeyu. ¹⁹ Mutu yoyosi achisikira neno ra ufalume wa Mulungu ala asirelewe, shetani nikudza akanyakua yo mbeyu idziyo nyalwa mwakpwe rohoni. Ii ndiyo mbeyu iriyonyalwa kanda-kanda ya barabara. ²⁰ Zirizo nyalwa kahi za mawe ni mutu ambaye nikusikira neno na kurihochera kpwa furaha, ²¹ isihokala kpwa kana mizi ndaniye wakala naro muda mufuhi sana. Majezo, misukosuko ama mateso gachimupata kpwa sababu ya riro neno, wauya na nyuma. ²² Zirizo nyalwa kahi za mihi ya miya, yuyu ni mutu ambaye nikusikira neno, ala mambo ga duniani na ulongo wa utajiri ukamuzunguluka, naye akasala chihuhu bila chivyazi. ²³ Mbeyu iriyonyalwa kahi za mutsanga wa rutuba, yuyu ni yuyatu mutu ambaye wasikira neno na kurelewa. Nikuvyala matunda na chakurya, kpwa mara gana mwenga, kunjine mara mirongo mihandahu na kunjine mara mirongo mihahu kutsupa zo zirizo nyalwa." ²⁴ Jesu achimvapa fumbo rinjine. Achimvamba, "Ufalume wa mulunguni ni here mutu arenyala mbeyu mbidzo sana mwakpwe mundani. ²⁵ Enye mvariho kala mvarere, haduiwe achenda mumo mundani naye achinyala mbeyuye mbii kahi ya iyo mbeyu mbidzo kisha achihauka. ²⁶ Mimera ichimera, mazao gachipatikana, yo mbeyu mbii nayo ichonekana. ²⁷ Ahenzi kazie mvachidza mvachimuza, 'Bwana, kunyalire mbeyu mbidzo yenye mwako mundani we? Sasa kpwekpwe ilaa nahi?' ²⁸ "Mwenye munda achimvamba, 'Hadui ndiye adziye gahenda gago.' Ahenzi kazie mvachimuza, 'Sasa wamala hende hukaburuge?' ²⁹ "Mwenye munda achimvamba, 'Hata. Kpwa kukala muchiburuga, mwaweza mukairima ta yo ngano. ³⁰ Richani ngano na kpwekpwe zimere hamwenga mpaka wakati wa kuvuna. Ichifika wakati wa kuvuna, nindamvambira mvandio vuna, "Kpwanza ombozani kpwekpwe yosi, ifungeni hamwenga muyoche, ala ngano ikusanyeni muyike mwangu palani." ³¹ Kisha Jesu achimvapa fumbo rinjine. Achimvamba, "Ufalume wa Mulungu uhere tembe ya haradali ambayo mutu wekpwenda inyala mundani mwakpwe. ³² Tembe ya haradali ndo tite kuriko tembe zosi. Ala ichidzakula, muhiwe ni mubomu kuriko mihi yosi. Wakala muhi ambao tsongo osi angani nikujenga vitsunzi vyao mwenye tagaa za kpwakpwe. ³³ Jesu achimvambira fumbo rinjine. "Ufalume wa Mulunguni ni here tsatsu ambayo mwanamuche wehala achi-itsanganya na vipimo vihahu vya unga mpaka donje ra unga richumuka." ³⁴ Gago gosi Jesu wemvambira atu kpwa mafumbo; na kamvambirire chochosi isihokala kpwa fumbo. ³⁵ Vivi wevihenda ili gosi arigonena kuchirira nabii gatimire, ariho amba, "Nindafugula mulomo wangu kpwa mafumbo. Nindanena mambo ambago gefitswa kula musingi wa urimwengu." ³⁶ Kisha Jesu achimvaricha kundi ra atu achenda nyumbani. Anafunzie mvachimwendera mvachimwamba, "Helezere fumbo ra mbeyu ironyalwa mundani." ³⁷ Jesu achimvajibu achimvamba, "Anyalaye mbeyu mbidzo ni Mwana wa Adamu. ³⁸ Munda ni urimwengu; na mbeyu mbidzo ni ana a ufalume. Kpwekpwe ni ana a shetani. Na hadui ariyekudza nyala mbeyu mbii ni shetani. ³⁹ Mavuno ni mwisho wa dunia, na avunaji ni malaika. ⁴⁰ Kpwa vivyo, hali kpwekpwe zichikusanywa na kochwa mohoni, ndivyo indivyo kala mwisho wa urimwengu. ⁴¹ Mwana wa Adamu andahuma malaikae, namvo mvandakusanya kula kpwa ufalume wa kpwakpwe osi mvario vikwazo na mvasotua malakizo ga Mulungu. ⁴² Mvandamvatsuha kpwenye moho, ambako kundakala na viriro na kuluma meno. ⁴³ Ndiho atakatifu mvandang'ala here dzua kahi za ufalume wa Paba yao. Mwenye masikiro, na asikire. ⁴⁴ "Ufalume wa mulunguni u here chitu cha thamani bomu chirefitswa mundani. Mumwenga ariho chipata achenda achichifitsa hakpwe. Kpwa raha ariyo kala nayo, achenda achikuza chila chitu chiricho chakpwe, achigula riro shamba arimofitsa cho chitu. ⁴⁵ Keheri, ufalume wa Mulunguni u here mumwenga ariye na biashara atafutaye lulu yenye thamani. ⁴⁶ Achidzapata mwenga iriyo ya thamani sana, wenda akakuze chila chitu aricho nacho enende akagule iyo lulu mwenga. ⁴⁷ Kisha, ufalume wa Mulunguni u here nyavu iriyo tandwa baharini, ichigbwira chila aina ya samaki. ⁴⁸ Irihodzala samaki, avuvi mvachi ivuha mpaka pwani. Kisha mvachikpwatya kutsagula samaki adzo mvachenjiza kpwenye pakatsa, mvara ai mvachia udzya madzini. ⁴⁹ Ndivyo indivyo kala mwisho wa urimwengu. Malaika mvandadza mva-atenganishe atakatifu na enye dambi. ⁵⁰ Mvanda atsuha enye dambi mohoni, kundiko kala na viriro na kuluma meno. ⁵¹ "Mudzelewa gosi gano?" Anafunzie mvachijibu, "Ndevyo." ⁵² Kisha Jesu achimvamba, "Kpwa vivyo chila mwandishi adziyekala mwanafunzi wa ufalume wa mulunguni ni here mutu mwenye nyumba, ombozaye vitu vya kapindi na visha kula kpwa hazinaye." ⁵³ Ndiho ichifika wakati Jesu achikala yumarikiza mafumbo ga kpwakpwe, achihauka haho. ⁵⁴ Kisha Jesu achenjira sehemu ya kpwao achenda fundisha kahi za sinagogi. Mvachi angalazika muno mvachamba, "Yuno mutu wapatahi hekima ino na wapatahi zino nguvu za kuhenda miujiza? ⁵⁵ Yuno si mwana wa yuya mutsongi wa mbao? Mameye si Maria yuno? Nduguze, si Jakobo, Josefu, Simioni na Judasi? ⁵⁶ Nduguze achiche si mvamva mvario nasi? Wegapatahi gosi gano?" ⁵⁷ Achimva tsukizya. Ala Jesu achimvamba, "Nabii kana heshima kpwao na kpwa atue." ⁵⁸ Kahendere miujiza minji kuko kpwa kukala kamva mwaminire.