¹ Wakati uwo Jesu wekpwenda siku ya sabato kuchirira na minda ya atu. Anafunzie mvachikala mvana nzala mvachanza kuvunza masuche kurya. ² Ala Mafarisayo mvariho ona gago, mvachimwambira Jesu, "Lola anafunzio mvavunza sheria mvahenda gasigo ruhusiwa siku ya sabato." ³ Jesu achimvajibu achimvamba, "Kamudza soma jinsi Daudi arivyo henda wakati arihokala ana nzala hamwenga na atue arokala namvo? ⁴ Namuna arivyo enjira ndani ya nyumba ya Mulungu na kuirya mikahe iriyoikpwa wakfu, ambayo yekala si halali kpwakpwe kuirya na mvo arimvokala anamvo, ala halali kpwa Makuhani? ⁵ Bado kamudzasoma kahi za sheria, kukala kahi za siku ya sabato makuhani ndani ya hekalu nikubananga sabato, ala kamvana makosa? ⁶ Ala namvamba, ariye mubomu kuriko ro hekalu munaye haha. ⁷ Kala munderelewa riri maanaye; natamani mbazi si sadaka; musindemvahukumu mvasio na makosa, ⁸ kpwa kukala Mwana wa Adamu ndiye Bwana wa sabato." ⁹ Kisha Jesu achuka haho achenda kahi za sinagogi rao. ¹⁰ Lola, kpwekala na mutu ariye kala yuholoza mukono. Mafarisayo mvachimuza Jesu, mvachimwamba, "Je, ni sawa kuhoza mutu siku ya sabato?" ili kpwamba mvaweze kumushitaki kpwa kuhenda dambi. ¹¹ Jesu achimvauza achimvamba, "Ni hiye kahi yenu, ariye ichikala ng'onziye ni mwenga, na iyo ng'onzi ichigbwa ndani dingbwini siku ya sabato, kandaigbwira na kuyomboza ndani ya ro dingbwi? ¹² Je, nihicho chenye thamani kutsupa, kpwani mutu, katsupa yo ng'onzi?! Kpwa vivyo bai, ni sawa kuhenda madzo siku ya Sabato." ¹³ Chisha Jesu achimwamba ye mukongo, "Hebu goloza mukono." Achiugoloza, nawo uchihola uchikala here o munjine muzima. ¹⁴ Ala Mafarisayo mvachombola na kupanga mvandivyo mwangamiza. Mvetafuta na kupanga njira ya kumolaga. ¹⁵ Jesu arihomanya dzambo riro, achihauka haho. Atu anji mvemutua, naye achimvahoza osi. ¹⁶ Achimva lakiza mvasimutangaze kpwa atu. ¹⁷ ili ritimire, ririro nenwa ni Nabii Isaya, kpwamba, ¹⁸ "Lola, mutumishi wangu niriye mutsagula, muhenzwi wangu, kahi za iye nafusi yangu ihenzezwa. Nindaika Roho wangu dzuluye, naye andaitangaza hukumu kpwa Mataifa. ¹⁹ Kandahangaika wala kurira; wala kakuna andesikira sautiye vichochoroni. ²⁰ Kandavunza mwanzi udzio dhurika; kandazima tambi yoyosi yombozayo mosi, mpaka hukumu ya hachi indiho shinda. ²¹ Na kpwa dzinare, mataifa mvandakala na kuluhiro." ²² Mutu fulani chipofu na bubu, arekala yupagawa ni pepo achafu, achirehewa kpwa Jesu. Achihozwa chiwango cha kona na kunena. ²³ Atu mvosi vachangalazika, vachamba, "Yawezekana mutu yuno akale ni Mwana wa Daudi?" ²⁴ Ala wakati Mafarisayo mvariho sikira kuhusu uu muujiza, mvachamba, "Yuyu mutu komboza pepo kpwa nguvuze mwenye isiho kala kpwa nguvu za Belizebuli, mubomu wa Pepo osi achafu." ²⁵ Jesu achimvamanya maazo gao achimvamba, "Chila ufalume udzogavika wenye, nikubanangika, na chila mudzi ama nyumba idzo gavika kaiweza kpwema. ²⁶ Ichikala shetani andamusa shetani, be yugavika iye mwenye. Ufalume we undemadze? ²⁷ Ichikala nomboza pepo kpwa nguvu za Belizebuli, afuasi enu mvandaomboza kpwa njira hiyo? Kpwa dzambo riri be mvandakala mahakimu enu. ²⁸ Ala, ichikala nomboza pepo kpwa Roho wa Mulungu, be ufalume wa Mulungu udziafikira. ²⁹ Mutu wawezadze kpwenjira nyumba ya mwenye nguvu na akeya bila kumufunga nyugbwe kpwanza? ³⁰ Yoyosi asekala hamwenga nami, yu chinyume nami, naye asiye kusanya hamwenga nami, watapanya. ³¹ Vivyo namvambira, chila dambi na kufuru mvanenazo adamu zaweza kusamehewa, ala kufuru kpwa Roho wa Mulungu kainda samehewa kamare. ³² Yoyosi anenaye chinyume ya Mwana wa Adamu, andasamehewa. Ala andenena chinyume na Roho Mutakatifu, kanda samehewa, si urimwengu uu wala udzao. ³³ Uhende muhi kukala mudzo na tundare, ama uhende muhi ukale mui na tundare, kpwa kukala muhi wamanyikana kpwa tundare. ³⁴ Mwi chizazi cha nyoka, kpwa kukala muai, mwawezadze kunena madzo? Kpwa kukala, kula kpwa manji garigo moyoni, mulomo ndigo undaganena. ³⁵ Mutu mudzo kahi za akiba mbidzo, zirizo moyoni womboza madzo, na mutu mui kahi za akiba mbii zirizo moyoni, womboza go mai. ³⁶ Namvamba vivi, siku ya hukumu chila mutu andalavya hesabuye kpwa chila neno aroritamuka. ³⁷ Kpwa kukala, kpwa chila neno undatalwa hachi, na kpwa chila neno undenjira hukumuni." ³⁸ Kahi za andishi na Mafarisayo mvachimujibu Jesu mvachamba, "Mwalimu, havoya konyeswa mu-ujiza." ³⁹ Ala Jesu achimvajibu achimvamba, "Chizazi chii na chishenzi nikubuga miujiza. Ala kakuna ishara indo onyeswa kpwao zaidi ya muujiza wa nabii Jonah. ⁴⁰ Here jinsi nabii Jonah arivyo ishi tumboni mwa samaki siku tahu usiku na mutsana, vivyo ndivyo Mwana wa Adamu andivyo kala siku tahu mutsana na usiku mbirani. ⁴¹ Atu a Ninawi mvandaema mbere za hukumu hamwenga na chizazi cha atu a chizazi chichi na kumvahukumu. Kpwa kukala mvetubu wakati wa mahubiri ga Jonah, na lolani, mutu mubomu kumutsupa Jonah tiyu yuhaha. ⁴² Malikia wa mwakani andaema siku ya hukumu hamwenga na atu a chizazi chichi na kumvahukumu. Kpwa kukala wekudza kula mwisho wa dunia kusikiza hekima ya mufalume Selemani; na lola, mumwenga mubomu kumutsupa Selemani tiyu yuhaha. ⁴³ Wakati pepo muchafu amuricha mutu, nikuchirira sehemu ziso na madzi kutafuta hatu ha kuoya, ala akosaho ⁴⁴ nikpwamba, "Nindauya kpwangu nyumbani niriko laa." Achuya, akapata nyumba ni tuhu na yesherwa ichipangbwato. ⁴⁵ Ndiho nikpwenda, akahala anzie fungahe mvario na nguvu kumuriko, mvadze mvaishi mumo. Hali ya iye mutu sasa yakala mbii kutsupa ho mwanzo. Vivyo ndivyo chindekala chizazi chichi chii." ⁴⁶ Jesu ariho kala bado achere kunena na kusanyiko ra atu, mameye na nduguze mvachikala mvanze, mvamala kunena naye. ⁴⁷ Mumwenga achimwamba, "Lola, mameyo na nduguzo mvanze mvamala kunena nawe." ⁴⁸ Ala Jesu achimujibu achimuza, "Mame ni hiye na ndugu zangu ni himvo?" ⁴⁹ Achigoloza mukono upande kuriko kala anafunzie achamba, "Lolani, aa ndo mame na ndugu zangu! ⁵⁰ Kpwa kukala, chila ahendaye mahenzo ga Paba ariye mulunguni, iye ndiye ndugu yangu, ndugu yangu wachiche na mame."