¹ Jesu ariho marikiza kumvaelezera anafunzie kumi na airi, weuka achenda fundisha na kuhubiri kahi za midzi yao. ² Johana Mubatizaji ariho sikira kuhusu mahendo ga Jesu Masihi, achihuma ujumbe kula jela kuchirira kpwa anafunzie, ³ namvo mvachimuza, "We ndiwe ureambwa undadza ama kuna munjine hamalwa humurinde?" ⁴ Jesu achimvajibu achimvamba, "Endani mukamwelezere na mumwambire Johana Mubatizaji gago mugonago na go musikirago. ⁵ Vipofu mvaona, viwete mvenenda, enye mahana mvahola, viziwi mvasikira, afu mvafufulwa, na Injili yahubiriwa kpwa masikini. ⁶ Ana baha mutu iye asiye bahatisha dzulu yangu." ⁷ Atu mvariho uka, Jesu achanza kunena dzulu ya Johana, "Mwenda lolani ko jangbwani-tefe zichi sumbishwa ni peho? ⁸ Ala ninoni murekpwenda lola- mwanamulume adzevala nguo laini? Kpwa ujeri, mvavalao mavazi madzo nikuishi kahi za nyumba za afalume. ⁹ Ala mweuka mukaloleni-Nabii? Ndevyo, namwambira, kumutsupa Nabii. ¹⁰ Yuyu ndiye ariye andikirwa, "Lola, namuhuma mujumbe wangu mberezo usoni, ambaye andatengeza njira mberezo." ¹¹ Ujeri namwambira, kahi za mvariovyalwa ni ache, kakuna ariye mubomu kumuriko Johana Mubatizaji. Ala ariye mutite kahi za ufalume wa mulunguni ni mubomu kumuriko iye. ¹² Hangu siku za Johana Mubatizaji, mpaka sasa, ufalume wa Mulunguni ni wa nguvu, na enye nguvu niku uhala kpwa nguvu. ¹³ Kpwa kukala manabii na sheria, mvekala mvachitabiri muhaka wakati wa Johana; ¹⁴ na kala mutayari kugakubali gaga, be yuyu ndiye iye Eliya, iye adzaye. ¹⁵ Ariye na masikiro ga kusikira, na asikire. ¹⁶ Nichihalanishe na noni chizazi chino? Ni mufano wa ahoho mvasasigao maeneo ga sokoni, mvachehana ¹⁷ na kpwamba, "Heapigira chivoti ala kamuvinire. Heomboleza, ala kamuririre." ¹⁸ Kpwa kukala Johana wekudza bila kurya mukahe wala kunwa muvinyo, mvachamba, "Ana pepo muchafu." ¹⁹ Mwana wa Adamu wekudza achirya na kunwa naye mvachamba, "Muloleni, ni mulafi na murevi, musena wa atoza ushuru na enye dambi! Ala hekima yathibitishwa ni mahendoge." ²⁰ Jesu weanza kuichemera midzi ambamo wemuhenda miujiza kpwa kukala mvekala kamvadzatubu. ²¹ Shakaro, kolazini! Shakaro Bethisaida! Kpwa miujiza mibomu irohendeka kpwenu, kalaho miujiza iyo yehendeka Tiro na Sidoni, mvandekala mvetubu kapindi kpwa kuvala magunia na kudzihaka ivu. ²² Ala namvambira, indakala rahisi kpwa Tiro na Sidoni kusitahimili siku za hukumu kuriko mwimwi. ²³ We Kaperinaumu, wafikiria undenulwa mpaka mulunguni? Sevyo. Undateremushwa mpaka tsini kuzimu. Here kpwa Sodoma, hata kundehendeka miujiza here irivyo hendeka kpwako, bado indekalako ta rero. ²⁴ Ala namba vivi, indakala rahisi kpwa ntsi ya Sodoma siku ya hukumu kuriko uwe. ²⁵ Muda uwo Jesu achamba, "Nakusifu uwe, Paba, Bwana wa Mulunguni na Ntsi, kpwa kukala wemvafitsa mambo gaga enye hekima, na ufahamu, na uchigafunula kpwa ahoho atite. ²⁶ Paba kpwa kukala wevihenza matsoni mwako. ²⁷ Mambo gosi gelaviwa kpwangu kula kpwa Paba, na kakuna amumanyaye Paba isihokala mwana, na yoyosi ambaye mwana wahenza kumufunulira. ²⁸ Nzoni kpwangu, mwimwi muyugikao na kuremerwa ni misigo miziho, nami nindamoyeza. ²⁹ Dzenjizeni nira yangu na mudzifundishe kula kpwangu, kpwa kukala mimi ni mupore na munyenyekevu wa moyo na mundapata kuoya mioyoni mwenu. ³⁰ Kpwa kukala nira yangu ni nyembamba na musigo wangu wamvemva.