¹ Ahenzwi, ni henzo ririrodze adziro hupa Paba kukala nasi hwehewe ana a Mulungu, na vivi ndivyo hurivyo. Kpwa riri, urimwengu kauhutambua kpwa kukala kaumutambuire iye. ² Ahenzwi, sisi vivi hu ana a Mulungu, na kaidza manyikana hundivyo kala. Hamanya kukala Masihi andiho onekana, hunda halana naye, kpwa kukala hundamona here arivyo. ³ Na chila mumwenga ariye na ujasiri uu kuhusu wakati udzao uriwo erekezwa kpwakpwe, ni kudzi takasa mwenye here iye arivyo mutakatifu ⁴ Chila mutu endereraye kuhenda dambi, nikuvunza sheria. Kpwa kukala dambi ni uvunzaji wa sheria. ⁵ Mwamanya Masihi weikpwa lwazu ili kuzusa dambi kamare, ala ndaniye kamuna dambi ⁶ Kakuna hata mumwenga akalaye ndaniye na kpwenderera kuhenda dambi. Kakuna mutu hata mumwenga akalaye kahi za dambi chikala adzimona ama kumu fahamu iye (Masihi). ⁷ Ahenzwi, musikubalini kukengbwa ni mutu yoyosi. Ahendaye hachi ni mwenye hachi, dzahere vivyo Masihi naye arivyo mwenye hachi. ⁸ Ahendaye dambi ni wa ibilisi kpwa kukala shetani ni muhenda dambi hangu jadi. Kpwa riri Mwana wa Mulungu weikpwa lwazu ili aweze kuzibananga kazi za shetani. ⁹ Yoyosi arevyalwa ni Mulungu kahenda dambi, kpwa kukala mbeyu ya Mulungu ni kukala ndaniye. Kaweza kpwenderera kuhenda dambi kpwa kukala adzivyalwa ni Mulungu. ¹⁰ Kahi za riri, ana a Mulungu na ana a shetani mvamanyikana. Iye asiye henda chiricho na hachi, si wa Mulungu, wala iye ambaye kaweza kumuhenza nduguye ¹¹ Kpwa kukala uu ndiwo ujumbe murio usikira kula mwanzo, kukala huhenzane sisi kpwa sisi ¹² Si here Kaini ariye laa kpwa mwovu achimolaga nduguye. Je, chiricho muhenda amolage nduguye ni noni? Kpwa kukala mahendoge gekala maovu, ga nduguye gachikala ga hachi. ¹³ Ndugu zangu, musangalazike, endaho urimwengu undamva tsikirirwa. ¹⁴ Hamanya hudzombola kare chifoni na kpwenjira uzimani, kpwa kukala hahenza ndugu. Yoyosi ariye kana uhenzo nikukala kahi za chifo. ¹⁵ Mutu yoyosi amutsikirirwaye nduguye ni molagi. Na mwamanya kukala uzima wa kare na kare kaukala ndani ya molagi. ¹⁶ Kahi za riri hamanya henzo, kpwa kukala Masihi wewomboza uzimawe kpwehu. Nasi yahupasa kugomboza maisha gehu kpwa kusudi ra ndugu. ¹⁷ Lakini, yoyosi ariye na vitu, na wamona nduguye mwenye uhitaji lakini akauzuiliya moyowe wa mbazi dzuluye, je, uhenzo wa Mulungu wakaladze ndaniye? ¹⁸ Anangu ahenzwi, husihenze kpwa milomo wala kpwa maneno mahuhu bali kahi za mahendo na ujeri. ¹⁹ Kahi za riri hamanya kukala sisi hukahi za jeri, na mioyo yehu yathibitisha kahi za iye. ²⁰ Ichikala mioyo yehu yahu hukumu, Mulungu ni mubomu kuriko mioyo yehu, na iye wamanya mambo gosi. ²¹ Ahenzwi, ichikala mioyo yehu kainda hukumu, hunawo ujasiri kpwa Mulungu. ²² Na chochosi huvoyacho hunda chihochera kula kpwakpwe, kpwa kukala hazigbwira amurize na hahenda mambo gamu hamirago mbereze. ²³ Na ii ndiyo amuriye: Hapaswa kpwamini kahi za dzina ra mwanawe Jesu Masihi na kuhenzana sisi kpwa sisi. Dzahere arivyo hupa amuriye. ²⁴ Azitiiye amurize ni kukala ndaniye. Na kpwa riri, hamanya kukala wakala ndani yehu, kpwa iye Roho ariye hupa sisi.