¹ Nanena ujeri kahi-za Kristo, sinena ulongo, nia yangu inashuhudia vhamwenga nami kahi-za Roho mutsunyu. ² Nina shonono nyinji na utsungu usiosira moyoni mwangu. ³ Kukala ningahenza mimi nilavhizwe na kutengwa na Kristo kwa ajili ya enehu haswa, arahu ario ni adamu angu kwa chimwiri, ⁴ Ao ni Israeli , ario na hali ya kuhendwa ana, a-utukufu, a-malagano, na zawadi ya sharia,kumwabudu Mulungu na chilagane. ⁵ Ao ni anzilishi, ariko Kristo wakudza kwa hishima kuvala mwiri uu-ariye iye ni Mulungu wa vyosini na iye ahewe nguma kare na kare , Amina. ⁶ Ela sikulala vilagane vya Mulungu vidzishindwa kutimira. Kwa kukala sichila mutu ariye Israeli ni mu-Israeli kamare. ⁷ Sevyo hata kwa chivyazi cha Aburahamu kukala ni ahohoe kamara. Ela, “nikuchirira Isaka chivyazicho unda-ihiwa. ⁸ vivi ni kwa kukala , ahoho a chimwiri katalwa vyakukala ni ahoho a Mulungu. Ela ahoho a chilagane anatalwa vyakukala ni lukolo. ⁹ kwa kukala riri ni neno ra chilagane ; ''kwa muda dza nindakudza , na Sera yundapata mwana.'' ¹⁰ Si riri hacheye, ela bada ya Rebeka kupata tumbu kwa mutu mumwengu, Isaka babehu – ¹¹ Kukala ahoho we kadzavyalwa na wakala kadzahenda neno rarosi ridzo hebu, ili kukala kusudi ra Mulungu karakara na kutsagulwa ritimire. ¹² Wala si kwa mahendo, ela ni kwa chausa cha yuyahu anenaye ,” Mukulu yandamhumikira muvaha.” ¹³ Dza irivyokala yandikwa: Yakobo namuhenza, Ela Esau namutsikirirwa . ¹⁴ Vino hambedze? Je kuna kubaguwa kwa Mulungu? Sevyo. ¹⁵ Kwa kukala yananena na Musa,” nindakala na rehema kwa yuyahu nende murehemu, na nindakal na mbazi kwa yuya nendemonera mbazi.” ¹⁶ Kwa vivyo si kwa chausa cha ahenzaye, wala kwa chausa cha achimbiraye, ela kwa chausa cha Mulungu onyesaye mbazi. ¹⁷ Kwa kukala mandiko gananena kwa Farao, “Kwa kusudi riri ra- chivyakwe na kukala nonyese mukotse wangu kahi-za uwe, na ili kukala dzina rangu ritangazwe kahi-za tsi yosi.” ¹⁸ Kwa vivyo , Mulungu ni kukala na mbazi kwa yoyosi amuhenzaye, na kwa amuhenzaye ni kumuhenda, asituwe malagizo. ¹⁹ Chisa kwangu undamba, “kwadze uchere ona kosa? Ni yuvie arie muvumirira mahenzo ge?” ²⁰ Chinyumeche, mwanadamu uwani ajibuye chinyume cha Mulungu? Kuna uwezekano wowosi wa chiricho-umbwa kunena na aumbaye" Ni kwadze wanihenda vino mino?” ²¹ Je aumbaye kana hachi dzulu ya udongo kutengeza chiya ga mahumizi chihicheye kula donje rirahu-rirahu, na chiya chiyawe chinjine kwa mahumizi ga chila siku? ²² Vidze ichikala Mulungu ariye na utayari wa konyesa koroye na kuhenda mukotsewe kumanyikana, wafaha kwa uvumirivu wa kutosha kwa viya vya koro virivyotarishwa kwa kubananga? ²³ Nidze ichikala wahenda vivi ili kukala onyese unji wa utukufu wa kwakwe dzulu ya via vya mbazi, arivyo vitarisha kare kwa ajili ya utukufu? ²⁴ Nidze ichikala wahenda vivi pye kwehu, ariye pye wahiha, si kwa Ayahudi acheya, ela pye kula kwa atu a mataifa? ²⁵ Dza enenavyo pye nkahiza Hosea. “Ninda-ahia atu angu ario ka-akarire atu angu, na muhenziwe arie kahenzerwe. ²⁶ Na indakala kukala vhara arivhonenwa kwao, ‘mwimwi kamuatu angu', vhavho andaihiwa ‘ana a Mulungu arie hai.’ ²⁷ Isaya yunarira kwa ajili ya Israeli, ''hata kala isabu ya ana a Izraeli ingadza here ni mutsanga wa bahari, ni masaza hacheye gandigo okolwa, ²⁸ Kwa kukala Bwana yundaitimiza neno ra kwakwe dzulu ya tsi mapema na chikamilifu.'' ²⁹ ngadza here Isaya arivyo nena kapindi, ''kala Bwana wa majeshi karichire chivyazi nyuma kwa ajili yehu,hungakala ngadzahere sodoma,na hungakala ngadzahere Gomora.'' ³⁰ Huneneni kavhiri? arivyokala atu a mataifa, ario kaiyeyere hachi,achipata hachi, hachi kwa imani. ³¹ Ela Israeli, ariye waiyeya hachi ya sharia, kaifikirire sharia. ³² Ni kwadze sevyo? kwa kukala kaiyeyere kwa imani, ela kwa mahendo. Adzikwala dzulu ya dziwe ra kudzikwala, ³³ ngadzahere irivyo andikwa, ''Lola, ninaika dziwe ra kudzikwala kahiza sayuni na mwamba wa kukosa. Yoyosi ande-amini kandakala na webu.''