¹ Muvokereni yoyosi arie ni munyonge kahiza Imani; bila kulavya hukumu dzulu ya azoge. ² Mutu mmwenga yuna Imani ya kurya chochosi, mnjine arie ni munyonge yunarya mboga hacheye. ³ Mtu arie yunarya chila chitu asimuvarye iye asiyerya chila chitu. Na iye arie karya chitu chochosi asimuhukumu munjine arie yunarya chila chitu. Kwa kukala Mulungu yudzimuhenza. ⁴ We, u ani ariye unamuhukumu muhumiki wa mwenye mtu munjine. Ni mbere za Bwanawe kukala yunaima hube. Ela yundaunulwa, kwa kukala Bwana yunaweza kumuhenda aime. ⁵ Mtu mumwenga, yunakuluvira tsiku mwenga kuriko iyawe. Muyawe kuluvira chikala tsiku kara kara. Hebu chila mutu na akubali kahiza akiliye mwenye. ⁶ Iye agwiraye tsiku yanagwira kwa ajili ya Bwana. Na kwa iye aryaye, yunarya kwa ajili ya Bwana. Kwa kukala yanamuva Mulungu shukrani. Iye arie karya yunadzi kahazi kutsarya kwa ajili ya Bwana. Iye pye yunomboza shukrani kwa Mulungu. ⁷ Kwa kukala kakuna ariye yunaishi kwa nafsiye, na kakuna afaye kwa iye mwenye. ⁸ Kwa kukala kala hunaishi, hunaishi kwa ajili ya Bwana. Na hunafa, hunafa kwa ajili ya Bwana. ⁹ Kwa kukala ni kwa kusudi riri Kristo wafa na kuishi kaviri, kukala akale Bwana wa osini ariofu na ario muyo. ¹⁰ Ela we nikwadze una muhukumu nduguyo? Nawe nikwadze una muvurya nduguyo? Kwa kukala siswi hosini hundaima mbere za chihi cha hukumu cha Mulungu. ¹¹ Kwa kukala idziandikwa, "Here niishivyo," yunamba Bwana, "Kwangu mimi chila vindi rindamutwa na chila lurimi lundomboza nguma kwa Mulungu." ¹² Kwa vivyo, chila mmwenga wehu yandalavya hisabuye mwenye kwa Mulungu. ¹³ Kwa vivyo husenderere kaviri kuhukumiana, ela kanda vavo kata shauri hivino, kukala kakuna endeka chikwazo hebu muhego kwa nduguye. ¹⁴ Ninamanya na dzikubali kahiza Bwana Jesu, kukala kakuna chitu chiricho nichikolo chenye. Ni kwa iye hacheye azaye kukala chochosi ni chikolo kwa kukala kwakwe ni chikolo. ¹⁵ Ichikala kwa chausa cha chakurya nduguyo yunasononeka kwenenda kaviri kahiza uhenzo. Usimubanange mutu kwa chakuryacho arie kwa ajiliye Kristo wafa. ¹⁶ Kwa vivyo musiriche mahendo genu madzo gakahenda atu kumuvurya. ¹⁷ Kwa kukala utawali wa Mulungu si kwa ajili ya chakurya na chinwadzi aa ni kwa ajili ya hachi, reri na nyemi kahiza Roho mutungu. ¹⁸ Kwa kukala iye amuhumikiraye Kristo kwa njira ii yukubalika kwa Mulungu na yukubalika kwa atu. ¹⁹ Kwa vivyo bee na hutue mautu ga reri na mautu garigo ganamujenga mutu na munjine. ²⁰ Usibanange kazi ya Mulungu kwa chausa cha chakurya. Vitu vyosini kwa ujeri ni vidzo, ela ni vii kwa mtu yuyahu ariye yunarya na kumuhenda iye kudzikwala. ²¹ Ni vidzo kutsarya nyama, wala kunwa uchi hebu chochosi chiricho kuchirira chicho yana kwazwa. ²² Zizi Imani za chihacheye nazo, zike kahi ya awe na Mulungu. Yadzihaswa yuyahu ariye kadzihukumu mwenye kwa chira achikubalicho. ²³ Ariye na kutsa-amini yudzihukumiwa ichikala yunarya, kwa chausa kayombola na Imani. Na chochosi chisicho-kala kwa Imani ni dambi.